تاۋەلسىزدىكتىڭ 25 جىلدىعى اياسىندا «قۋاتتى ءوڭىر – قۋاتتى قازاقستان» وڭىرلەردىڭ استانا قالاسىنداعى كۇندەرىنە سايكەس 1-2 قازان ارالىعىندا ماڭعىستاۋ وبلىسىنىڭ مادەنيەت جانە ونەرى كۇندەرى وتەدى.
1 قازان كۇنى ساعات 16.00-دە بەيبىتشىلىك جانە كەلىسىم سارايىندا ماڭعىستاۋ وبلىستىق تاريحي-ولكەتانۋ مۋزەيىنىڭ «جاڭعىرعان اسىل مۇرا» جانە وبلىستىق كىتاپحانانىڭ «ءتۇپ-توركىنىن تورگە وزدىرعان ماڭعىستاۋ» اتتى كورمەلەرى اشىلادى.
«جاڭعىرعان اسىل مۇرا» كورمەسى استانالىقتاردى «ۇلىستىڭ ۇرانى – ءپىر بەكەت», «ماڭعىستاۋدىڭ ءداستۇرلى قولدانبالى ونەرى», «تۇبەك تابيعاتىنىڭ تاڭعاجايىپتارى», «قازىنالى ولكەنىڭ قارىشتى قادامدارى», «2014-2015جج. ماڭعىستاۋ وبلىسىندا جۇرگىزىلگەن ارحەولوگيالىق جۇمىستار» اتتى كورمە بولىمدەرىمەن تانىستىرادى. «ۇلى دالا ابىزى» اتتى كورمە قويىلىمى قازاقستاننىڭ ەڭبەك ەرى, حالىق جازۋشىسى ءا.كەكىلباەۆتىڭ ءومىرى مەن شىعارماشىلىعى تۋرالى ايتاتىن بولادى.
«ءتۇپ توركىنىن تورگە وزدىرعان ماڭعىستاۋ» اتتى كورمەسىندە ماڭعىستاۋ وبلىسىنىڭ ەل تاۋەلسىزدىگىنىڭ 25-جىلدىعىندا جەتكەن جەتىستىكتەرى, ءوڭىردىڭ تاريحى مەن اكىمشىلىك-تەرريتوريالىق كارتاسى, اۋىل شارۋاشىلىعىنىڭ, مەديتسيناسىنىڭ, مادەنيەتىنىڭ دامۋى تۋرالى مالىمەت بەرەتىن ءباسپاسوز ماتەريالدارى مەن كىتاپتارى قامتىلعان.
ءدال وسى كۇنى ساعات 18.00-دە بەيبىتشىلىك جانە كەلىسىم سارايىندا «جاڭعىرعان ماڭعىستاۋدان – جاسامپاز استاناعا» ماڭعىستاۋ وبلىسى ونەر شەبەرلەرىنىڭ گالا-كونتسەرتى وتەدى. كونتسەرتتىك باعدارلامادا ماڭعىستاۋ وبلىسىنىڭ اتاقتى, كەڭىنەن تانىمال, جان-جاقتى مۋزىكالىق جانرداعى, ءارتۇرلى باعىتتاعى اسپاپتى جانە ۆوكالدى مەكتەپتەرىنىڭ ونەرپازدارىنىڭ ونەرىن تاماشالاۋ قاراستىرىلعان.
مۋزىكالىق-پوەزيالىق تەاترلاندىرىلعان باعدارلاما ەرەكشە فورماسى بار ءۇش بولىمنەن تۇرادى: ەتنو-فولكلورلىق, اكادەميالىق جانە ەسترادالىق. كونتسەرتتە مۇرات وسكىنباەۆ اتىنداعى ماڭعىستاۋ وبلىستىق فيلارمونياسىنىڭ «اقجارما» فولكلورلىق ءانسامبلى, ءانشى سوليستتەرى, «اباي» اتىنداعى مادەني-دەمالىس كەشەنىنىڭ «جورعا» بي ءانسامبلى, دجاز ءانسامبلى, «ەرتەگىلەر» توبى, سونداي-اق قر ەڭبەگى سىڭگەن قايراتكەر ايگۇل قوسانوۆا, «قۇرمەت» وردەنىنىڭ يەگەرى تامارا اسار, «قازاقستان داۋىسى – 2015» جوباسىنىڭ جۇلدەگەرى باۋىرجان رەتباەۆ جانە ت.ب. ونەر كورسەتەدى.
2 قازان كۇنى ساعات 11.00-دە استانا قالاسىندا قر ۇلتتىق اكادەميالىق كىتاپحاناسىندا قازاقستان رەسپۋبليكاسىنىڭ ەڭبەك ەرى, حالىق جازۋشىسى ءابىش كەكىلباەۆتىڭ ءومىرى مەن شىعارماشىلىعىنا ارنالعان «ءابىش الەمى» جۋرنالىنىڭ تۇساۋكەسەرى وتەدى. تانىس-تىرىلىم بارىسىندا وبلىستىق كىتاپحانانىڭ «اڭىزعا اينالعان ابىز» اتتى كىتاپ كورمەسى مەن وبلىستىق تاريحي-ولكەتانۋ مۋزەيىنىڭ «ۇلى دالا ابىزى» اتتى جىلجىمالى كورمەسى ۇيىمداستىرىلادى. كورمەگە قالامگەردىڭ ومىردەن وتكەننەن كەيىنگى شەتەل جازۋشىلارىنىڭ, قوعام قايراتكەرلەرىنىڭ, پارلامەنت, سەنات دەپۋتاتتارىنىڭ باسپاسوزدە جاريالانعان ماتەريالدارى جانە باسقا تىلگە اۋدارىلعان كىتاپتارى قويىلادى.
18.00-دە م.گوركي اتىنداعى مەملەكەتتىك اكادەميالىق ورىس دراما تەاترىندا ن.ءجانتورين اتىنداعى مۋزىكالىق-دراما تەاترىنىڭ ءابىش كەكىلبايۇلى شىعارماسىنىڭ جەلىسىمەن ساحنالانعان «شىڭىراۋ» درامالىق قويىلىمى كورسەتىلەدى.
ماڭعىستاۋ وبلىسى اكىمىنىڭ ءباسپاسوز قىزمەتى
