مەملەكەتتىك ورگاندار وكىلدەرى استاناداعى شارىن بازارىنىڭ كاسىپكەرلەرىمەن كەزدەستى. اتاپ ايتقاندا, ساۋدا كوميتەتىنىڭ توراعاسى ايدار ابىلدابەكوۆ, مەملەكەتتىك كىرىستەر كوميتەتى توراعاسىنىڭ ورىنباسارى ءانۋار سۇلەيمەنوۆ, استانا قالالىق ينۆەستيتسيا جانە كاسىپكەرلىك باسقارماسى باسشىسىنىڭ ورىنباسارى ماقسات جاڭاباەۆ جانە باسقا دا مەملەكەتتىك ورگانداردىڭ وكىلدەرى شارىن بازارىنىڭ ساۋداگەرلەرىنە جاڭا سالىق كودەكسىنىڭ نورمالارى تۋرالى اقپارات بەردى, دەپ حابارلايدى astana-akshamy.kz.
بۇل كەزدەسۋدە سونىمەن قاتار ءموبيلدى اۋدارىمدار, تاۋارلاردى شەكارا ارقىلى تاسىمالداۋ, كارانتيندىك جانە فيتوسانيتاريالىق سەرتيفيكاتتار بەرۋ بويىنشا پروبلەمالىق ماسەلەلەر تالقىلاندى. سونداي-اق ساۋداگەرلەر ساتۋ سوماسىنىڭ 0,95% – QR ارقىلى تولەگەن كەزدە بولشەك سالىق مولشەرلەمەسىن, سونداي-اق بانك كوميسسياسىن قايتا قاراۋ بويىنشا ۇسىنىستار ەنگىزدى, بۇل ولاردىڭ پىكىرىنشە, ازىق-تۇلىك باعاسىن, ونىڭ ىشىندە ءامات-تى تومەندەتۋگە مۇمكىندىك بەرەدى.
بازار ساۋداگەرلەرىمەن وسىنداي كەزدەسۋلەر ۇنەمى وتكىزىلىپ تۇرادى. بۇعان دەيىن ساۋدا كوميتەتىنىڭ توراعاسى ايدار ابىلدابەكوۆ وتكەن جىلدىڭ قىركۇيەك ايىندا شارىن بازارىنىڭ ساۋداگەرلەرىمەن كەزدەسكەن بولاتىن.
شارىن كوتەرمە بازارى «سولتۇستىك» كوكونىس حابىنەن جەمىستەر مەن كوكونىستەر ەلوردانىڭ ءىرى ساۋدا جەلىلەرىنە عانا ەمەس, اقمولا جانە قاراعاندى وبلىستارىنىڭ جاقىن ماڭداعى اۋداندارىنا دا جەتكىزىلەدى. وسىعان بايلانىستى ساۋداگەرلەرگە الەۋمەتتىك ماڭىزى بار ازىق-تۇلىك تاۋارلارى باعاسىن رەتتەۋ ءۇشىن 15% ساۋدا ۇستەمەسىن ساقتاۋدىڭ ماڭىزدىلىعى تاعى دا ەسكە سالىندى.
