بۇگىن فۋتبولدان قازاقستان چەمپيوناتىنىڭ پرەمەر-ليگاسىندا سوڭعى تۋردىڭ ويىندارى وتەدى. وسى تۋردىڭ ناتيجەسىندە قولا جۇلدەگەر بەلگىلى بولادى. ال التىن مەدال يەگەرى چەمپيونات اياقتالماي-اق انىقتالىپ قويدى. «استانا» بيىل ءۇشىنشى مارتە قاتارىنان ەل چەمپيونى اتاعىن جەڭىپ الدى. ءدال وتكەن جىلداعىداي الماتىنىڭ «قايرات» كومانداسى كۇمىستى ولجالادى.
«استانا» فۋتبول كلۋبى بۇگىندە ەل سپورتىنىڭ ءمارتەبەلى ۇجىمىنا اينالىپ وتىر. 2009 جىلى قۇرىلعان كوماندا بيىل سەگىزىنشى رەت ۇلتتىق بىرىنشىلىكتە باق سىنادى. بەس چەمپيوناتتا جۇلدەگە قول سوزدى. پرەمەر-ليگاعا قوسىلعان جىلى بىردەن جەڭىمپاز بولاتىنداي ويىن كورسەتكەن دە ەدى. الايدا «اقتوبە» كومانداسىنان وزا المادى. ال اقتوبەلىكتەر بولسا, سول جىلى ەلىمىزدىڭ چەمپيوناتىن بەسىنشى رەت جەڭىپ العان بولاتىن. سونداي-اق ءۇش رەت قاتارىنان التىن جۇلدە يەلەنىپ, رەكوردتىق كورسەتكىشكە دە قول جەتكىزگەن.
مىنە, وسى رەكوردتى بيىل «استانا» دا قايتالاپ وتىر. جالپى «استانا» سوڭعى ءۇش جىلدا تاماشا ونەر كورسەتىپ كەلە جاتقانىن ايرىقشا اتاپ وتكەنىمىز ءجون. بولگاريا مامانى ستانيمير ستويلوۆ كوماندانىڭ تىزگىنىن ۇستاعالى استانالىق كوماندا تەك قانا ەل چەمپيوناتى مەن كۋبوك باسەكەلەرىندە توپ جارىپ قويماي, ۋەفا اياسىنداعى تۋرنيرلەردە دە تابىستى ونەر كورسەتە باستادى.
«استانا» بيىلعى چەمپيوندىق اتاقتى «وقجەتپەس» كومانداسىمەن ويىننان كەيىن يەلەندى. كوكشەتاۋدا وتكەن ماتچتا ەسەپ اشىلماعان. ال «استانا» ءۇشىن ءبىر-اق ۇپاي قاجەت بولعاندىقتان, وسى تەڭ ويىننىڭ ناتيجەسى چەمپيوندىققا جەتكىزدى.
ايتۋلى ماتچتان كەيىن باس باپكەر ستويلوۆ ءوزىنىڭ قۋانىشىمەن ءبولىستى. «مەنىڭ فۋتبولشىلارىم مەن ءۇشىن ناعىز باتىرلار. ءۇشىنشى رەت قاتارىنان ەل چەمپيونى اتاعىن جەڭىپ الدى. اسىرەسە, كوماندانىڭ جانكۇيەرلەرىنە ايتار العىسىم شەكسىز. بۇل جەڭىسكە ولار دا ورتاق. وسىنداي دەڭگەيدە ويناۋىمىزعا بارلىق جاعدايدى جاساي بىلگەن كلۋب باسشىلىعىنا دا ريزاشىلىعىمدى بىلدىرەمىن. «استانا» فۋتبولشىلارى شىنىمەن دە باتىرلار عوي, ويتكەنى ولار بيىل ءۇش مايداندا قاتار ونەر كورسەتىپ كەلەدى. ۇلتتىق چەمپيونات, ەل كۋبوگى, سونىمەن قاتار ەۋروپا تۋرنيرلەرىندە ويناپ ءجۇر. ونىڭ ۇستىنە قانشاما فۋتبولشىمىز قازاقستان ۇلتتىق قۇراماسىندا ونەر كورسەتەدى» دەپ اعىنان جارىلدى «استانا» تىزگىنىن ۇستاعان بولگاريالىق باپكەر.
«استانا» فۋتبول كلۋبىنىڭ باس مەنەدجەرى سايان حاميتجانوۆ تا كوماندانىڭ جارقىن جەڭىسىنە وراي ءوز پىكىرىن ورتاعا سالدى. «استانا» كومانداسىنىڭ جەڭىسى – بۇل ۇلكەن ەڭبەكتىڭ جەمىسى. قاتارىنان ءۇش رەت چەمپيوندىق تۇعىرعا كوتەرىلۋ – ەرەكشە كورسەتكىش. بۇل بۇكىل كوماندانىڭ ورتاق جەڭىسى دەپ سانايمىن. وسى ورايدا الدىمەن كوماندانىڭ جانكۇيەرلەرىن قۇتتىقتاعىم كەلەدى. ستانيمير ستويلوۆ باستاعان باپكەرلەر ۇجىمىنا دا, كلۋبتىڭ اكىمشىلىگىنە دە العىسىمدى بىلدىرەمىن. ال جاسىل الاڭدا وينايتىن فۋتبولشىلارىمىز, ارينە, ەرەكشە قۇرمەتكە يە. «استانا» ءۇشىن ماۋسىم ءالى اياقتالعان جوق. ءبىز ءالى ۋەفا اياسىنداعى ەۋروپا ليگاسىندا ويىندارىمىزدى جالعاستىرامىز. الداعى بەيسەنبىدە «وليمپياكوس» كومانداسىن قابىلدايمىز» دەيدى «استانا» فۋتبول كلۋبىن العا جەتەلەپ كەلە جاتقان سايان حاميتجانوۆ.
ەۋروپاعا اشىلعان تاعى ءبىر ەسىك
ءۇش دۇركىن قازاقستان چەمپيونى اتانعان «استانا» وسىمەن ءۇشىنشى رەت ەۋروپاداعى ەڭ ءدۇبىرلى دوپ دوداسىنا قاتىسۋعا مۇمكىندىك الدى. بىلتىر چەمپيوندار ليگاسىنا تۇڭعىش رەت قاتىسقان ەلوردالىقتاردىڭ تۇساۋى توپتىق كەزەڭدە كەسىلدى.
ءساتتى باستاما
چەمپيوندار ليگاسىنىڭ ىرىكتەۋ كەزەڭىنەن ءارى اسۋى نەعايبىل «استانا» ايدى اسپانعا بىراق شىعارىپ, كارى قۇرلىقتىڭ قاۋقارلى كوماندالارىنىڭ ات باسىن ەلگە بۇرعىزىپ ەدى. وسى جولىن بيىل دا جالعاپ, توپتىق كەزەڭگە وتۋگە ءسال ساتتىلىك جەتىسپەي قالدى. وعان مويىعان استانالىقتار جوق, ەسەسىنە ەۋروپا ليگاسىندا ايانىپ قالماۋدا.
بىلتىر «استانا» ىرىكتەۋ كەزەڭىنىڭ ەكىنشى تۋرىندا
سلوۆەنيانىڭ «ماريبور» كومانداسىن جالپى ەسەپ بويىنشا 3:2 ەسەبىمەن قاپى قالدىرعان. بۇل ماتچ ەلوردالىقتاردىڭ ەسىنەن ءالى كەتە قويعان جوق. العاشقى ماتچتا سىرت الاڭدا
1:0 بولىپ ۇتىلىپ كەلىپ, ءوز الاڭىندا وتكەن ماتچتا قارسىلاستار تاعى دا گول سالعان. سونىمەن ءۇش گول سالسا عانا كەلەسىگە وتەدى. بۇل ورىندالماستاي كورىنگەنىمەن, استانالىقتار ءۇش سول سوعىپ, ماقساتىنا جەتتى.
ودان كەيىن فينليانديالىق «حيك» كومانداسىنا تاپ بولدى. بۇل ماتچ تا وڭايعا سوقپاي, زورعا دەگەندە 4:3 ەسەبىمەن العا شىقتى. ال پلەي-وفتا كيپرلىك «اپوەل» كلۋبىنان ايلاسىن اسىردى.
وسىلايشا, توپتىق كەزەڭگە وتكەن «استانا» سول جىلى فينالدا ويقاستاعان «اتلەتيكو
مادريد» كومانداسىمەن جانە «بەنفيكا», «گالاتاساراي» سەكىلدى تىسقاققان كلۋبتارمەن ايقاستى. اجەپتاۋىر ايبات كورسەتكەن ەلوردالىقتار جانكۇيەرلەرىن جەرگە قاراتپاي, ءوز جەرىندە وتكەن ماتچتاردىڭ بارىندە جەڭىلگەن جوق. وسىعان قاراپ-اق, «استانانىڭ» چەمپيوندار ليگاسىنداعى دەبيۋتىن ءساتتى ءوتتى دەپ باعالاۋعا بولادى. راسىندا دا, ەۋروپانىڭ ەڭ تانىمال فۋتبول ساراپشىلارى «استانا» ءبىزدى تاڭعالدىردى» دەپ پىكىر ءبىلدىردى.
ەلوردالىقتار ەۋروپا ليگاسىندا
ال بيىل «استانانىڭ» كارى قۇرلىققا جورىعى ەۋروپا ليگاسىمەن تۇگەسىلمەك. ەكىنشى جىل قاتارىنان ەل چەمپيونى بولعان ەلوردالىقتار العاشقى قادامىن چەمپيوندار ليگاسىندا باستاعانىمەن, توپتىق كەزەڭگە ءبىر تابان جاقىن قالعاندا جولدان تايدى.
بۇل جولى ىرىكتەۋ كەزەڭىن بىردەن ەكىنشى راۋندتان باستاعان «استانا» ليتۆالىق «جالگيريس» كومانداسىمەن كۇش سىناستى. ءبىرىنشى ويىن سىرت الاڭدا تەڭ اياقتالىپ, قارىمتا ماتچتا 2:1 ەسەبىمەن اۋپىرىمدەپ باسىم ءتۇستى.
ءسويتىپ, ءۇشىنشى ىرىكتەۋ راۋندىندا شوتلانديانىڭ ايگىلى «سەلتيگىنە» تاپ بولدى. بۇل – ءبىزدىڭ سىرالعى قارسىلاسىمىز. بۇرىن ءبىزدىڭ ەلگە تابانى تيگەن ولار «شاحتەرمەن» ءبىراز تارتىسقان. العاشقى ماتچ «استانا ارەنادا» ءوتىپ, قوس كوماندا ءبىر-ءبىر گولدان سوقتى. ال جاۋاپتى ويىندا 2:1 ەسەبىمەن ەسە جىبەردى.
وسىلايشا چەمپيوندار ليگاسىنىڭ توپتىق كەزەڭىنە وتە الماعان «استانا» بىردەن ەۋروپا ليگاسىنىڭ توبىنا توپ ەتە ءتۇستى. قازىرگى ۋاقىتتا «ۆ» توبىندا «اپوەل», «وليمپياكوس» جانە «يانگ بويز» كوماندالارمەن ءبىرىنشى ويىندى وتكىزدى. الدىمەن «اپوەل»-مەن ويناپ, 2:1 ەسەبىمەن جەڭىلدى. سودان كەيىن ءوز ۇيىندە شۆەيتساريالىق «يانگ بويز» كلۋبىمەن تەڭ ءتۇستى. ال گرەكيالىق «وليمپياكوس» كومانداسىنان 4:1 ەسەبىمەن ويسىراي ۇتىلدى. ەندى 3 قاراشا كۇنى وسى كوماندامەن قارىمتا ماتچ وتەدى.
ەكى رەت چەمپيون بولعانداعى «استانانىڭ» ەۋروپاداعى جولى وسىلاي ءوربىپ جاتىر. ەندى كەلەسى جىلى تاعى دا چەمپيوندار ليگاسىنىڭ توپتىق كەزەڭىنە وتۋگە بارىن سالىپ كورمەك. مۇنىڭ ءدامىن تاتىپ كورگەن ەلوردالىقتار ىشكى بىرىنشىلىكتەگى جەڭىستەر ءىرى دوپ دودالارىنا اشىلاتىن ەسىك ەكەنىن ەسكەرەدى. سونىڭ ناتيجەسىندە بيىل ءۇشىنشى مارتە چەمپيون اتانىپ, تاعى ءبىر جولدامانى يەلەندى.
سايان حاميتجانوۆ, «استانا» كومانداسىنىڭ باس مەنەدجەرى:
– بيىل ءبىز التىن جۇلدەگە قول جەتكىزدىك جانە ەۋروپا ليگاسىنىڭ توپتىق كەزەڭىنە تۇستىك. بۇل – ءبارىمىزدىڭ ورتاق جەڭىسىمىز. ونىڭ ىشىندە جانكۇيەرلەردىڭ دە ۇلەسى زور. كوماندامىز تاعى ءبىر رەت قازاقستانداعى ەڭ كۇشتى كلۋب ەكەنىن دالەلدەدى. بۇعان مەرزىمىنەن بۇرىن جەتكەنىمىزدى ەرەكشە اتاپ وتكەن ءجون. ەگەر چەمپيوندىقتىڭ تاعدىرىن سوڭعى تۋرعا قالدىرعاندا, پسيحولوگيالىق تۇرعىدان كومانداعا اۋىر تيەتىن ەدى. سوندىقتان بيىلعا جوسپارلانعان ەڭ نەگىزگى جوسپار ورىندالدى. ەندى تەك ەۋروپا ليگاسىن, سونداي-اق, قازاقستان كۋبوگىن ويلاۋىمىز كەرەك.
ستانيمير ستويلوۆ, «استانا» كومانداسىنىڭ باس باپكەرى:
– ءار ماۋسىم – ءبىز ءۇشىن ۇلكەن سالتانات. دەگەنمەن چەمپيوندىق وڭايلىقپەن كەلگەن جوق. ۇپاي جوعالتتىق. الماتىلىق «قايراتتان» ءوز الاڭىمىزدا جانە قوناقتا ەسە جىبەرىپ, جاقىنداتۋعا ىڭعاي بەرىپ قويدىق. بىراق ءبىز سوڭىندا دەگەنىمىزگە جەتىپ, ەڭسەمىز بارىنەن بيىك بولدى. نەگىزگى كوزدەگەنىمىز ورىندالدى. ەندى
ەۋروپا ليگاسىندا ۇپايىمىزدى مولايتۋعا كۇش
سالامىز. ايازعا قاراماي استانالىقتار ءبىزدى قولداۋعا كەلەدى دەپ ويلايمىن. ستاديوننىڭ توبەسى – جابىق, ءىشى – جىلى, ەنەرگياعا تولى بولادى.
تاڭات نوسەرباەۆ,«استانا» شابۋىلشىسى:
– ءبىز ەۋروپا ليگاسىندا بار بولعانى ءبىر-اق ۇپاي الدىق. الايدا الدا ءالى ءۇش ماتچ بار. ەل چەمپيونى بولعانىمىزعا توقمەيىلسىمەي, سوڭىنا دەيىن شايقاسۋعا بار كۇش-جىگەرىمىزدى سالامىز. جاقىندا «وليمپياكوس» كومانداسىمەن جاۋاپتى ويىن. جاراقات الىپ قالعانىمىزعا, شارشاعانىمىزعا قاراماستان, جانكۇيەرلەردىڭ قالىڭ قولداۋىنىڭ ارقاسىندا جاقسى ناتيجە كورسەتەمىز دەپ ويلايمىن.
دميتري شومكو, «استانا» قورعاۋشىسى:
– مەنىڭ ويىنىما كوڭىلى تولعان جۇرتقا العىسىم شەكسىز. ءبىز, ارينە, تەمىردەن جارالماعانبىز, ماۋسىم سوڭىنا قاراي شارشاعانىمىز ءبىلىنەدى. «استانا» – ەلىمىزدىڭ ەڭ مىقتى فۋتبول كومانداسى ەكەنىن دالەلدەۋ ءۇشىن ءبىز بارلىق ماتچتاردا جاقسى ويىن ورنەگىن كورسەتۋگە تىرىسامىز. بىزگە تەك ەلوردالىقتار عانا ەمەس, بۇكىل ەل جانكۇيەر بولىپ وتىر. سول ءۇشىن «وليمپياكوس» كومانداسىمەن بولاتىن ويىندا ايانىپ قالمايمىز.
ابزال بەيسەبەكوۆ, «استانا» قورعاۋشىسى:
– مەن ءوزىمدى ءالى «استانانىڭ» «ارداگەر» ويىنشىسى رەتىندە سانامايمىن. وسىدان ەكى جىل بۇرىن ەۋروپالىق ليگادا دوپ تەۋىپ, دالىرەك ايتقاندا, پولشالىق «كورونا» كومانداسىندا ويناپ ازداپ ءتاجىريبە جينادىم. قازىر مەن قازاقستان بىرىنشىلىگىندە عانا ەمەس, ەۋرو كۋبوكتاردا ويناپ ءجۇرمىن. ەگەر ەۋروپانىڭ مىقتىراق كوماندالارىنان ۇسىنىس بولىپ جاتسا, مانسابىمنىڭ جاڭا كەزەڭى تۋرالى ويلانىپ كورۋگە بولادى. ازىرگە جولىم «استانامەن» بايلانىستى بولعاندىقتان, باسقا كلۋب تۋرالى ويلاعان جوقپىن. ەۋروپا ليگاسىندا ويىنىمىزدان جاڭىلمايمىز دەپ سەنەمىن.
بەتتەردى دايىنداعاندار: عالىم قوجابەكوۆ, ورىنبەك وتەمۇرات
