استانادا بوكەيحان جانە اعىباي باتىر كوشەسى بويىندا بىرجاقتى قوزعالىس ەنگىزىلەدى
20 تامىزدان باستاپ استانادا بوكەيحان جانە اعىباي باتىر كوشەسى بويىندا بىرجاقتى قوزعالىس ەنگىزىلەدى. اباي داڭعىلىنان باستالىپ, رەسپۋبليكا داڭعىلىمەن اياقتالاتىن جولدىڭ ۇزىندىعى 0,99 شاقىرىم بولماق.
قوزعالىس باعىتىن وزگەرتۋدەگى باستى ماقسات – اباي داڭعىلىنداعى (بەيبىتشىلىك پەن رەسپۋبليكا كوشەسى اراسىنداعى بولىكتە) جۇكتەمەنى ازايتۋ.
العاشقى 10 كۇندە جول پوليتسيا قىزمەتكەرلەرى اپاتتىق جاعدايلاردىڭ الدىن الۋ ءۇشىن پروفيلاكتيكالىق شارالار جۇرگىزەدى. وسىدان كەيىن اتالعان جولداردا ججە بۇزۋشىلارىنا قاتىستى اكىمشىلىك شارالار قولدانىلا باستايدى.
ايتا كەتەيىك, ەگەر بۇل كوشەلەردە قارسى بەتتەگى جولعا شىعىپ, ەرەجە بۇزساڭىز, 5 مينيمالدى ەسەپتىك كورسەتكىش كولەمىندە نەمەسە 10605 تەڭگە ايىپپۇل تولەيسىز.
ەسكە سالا كەتەيىك, بيىل بىرجاقتى قوزعالىستاعى جولدار اۋەزوۆ, جەلتوقسان, كەنەسارى, يانۋشكەۆيچ كوشەلەرىندە جانە اباي داڭعىلىندا ەنگىزىلگەن ەدى.
«استانا LRT» جشس-نىڭ كۇندەلىكتى مونيتورينگى بويىنشا ەلورداداعى اتالعان جولداردا كولىك قوزعالىسى ايتارلىقتاي جاقسارعان, ياعني:
- ورتاشا قوزعالىس جىلدامدىعى 30% ءوستى;
- قيىلىستاردا كىدىرىس ۋاقىتى 78 سەكۋندتان 40-قا دەيىن ازايدى;
- كولىك قۇرالدارىنىڭ قارقىندىلىعى 20% ارتتى;
«استانا LRT» كومپانياسى بىرجاقتى قوزعالىستى ەلوردانىڭ باسقا دا كوشەلەرىنە ەنگىزۋدى زەرتتەپ جاتىر. ناقتىراق, تاڭعى جانە كەشكى قاربالاس ساتتەرىندەگى كولىك اعىنىنىڭ قارقىنى ەسەپتەلۋدە.
