ەلوردامىزدا ەكسپو اياسىندا وتەتىن ايشىقتى شارانىڭ ءبىرى استانالىق حالىقارالىق جەڭىل اتلەتيكا مارافونى بولماق. كەشە وسى جارىسقا ارنالعان ءباسپاسوز ءماسليحاتى ءوتىپ, مارافوننىڭ وتەتىنى تۋرالى ءۇش جاقتى كەلىسىمگە قول قويىلدى.
ايتۋلى مارافون شانحاي ىنتىماقتاستىق ۇيىمى مەن قر مادەنيەت جانە سپورت مينيسترلىگى اراسىنداعى الدىن الا جاسالعان كەلىسىمنىڭ نەگىزىندە جۇزەگە اسىرىلادى. كەلىسىم بويىنشا حالىقارالىق مارافون مەن بيىل 25 جىلدىعى اتالىپ وتىلەتىن ازياداعى ءوزارا ءىس-قيمىل جانە سەنىم شارالارى جونىندەگى كەڭەس (اوسشك) وتكىزەتىن «ازياداعى ءوزارا ءىس-قيمىل مەن سەنىم شارالارى جونىندەگى ءماجىلىس» فورۋمى بىرىكتىرىلىپ وتىر.
حالىقارالىق مارافوننىڭ ۇيىمداستىرۋشىلارى كەشە استاناداعى Hilton «Garden Inn Astana» قوناق ۇيىندە باس قوسىپ, جارىستىڭ رەگلامەنتىن جاريالادى. مارافون 2017 جىلدىڭ 27 تامىز كۇنى استانا قالاسىنىڭ سول جاعالاۋىنداعى نەگىزگى كوشەلەردە وتەدى. جارىستار ءۇش قاشىقتىقتا, اتاپ ايتقاندا 42 كم, 10 كم جانە 2017 مەتر بويىنشا ۇيىمداستىرىلادى. ۇيىمداستىرۋشىلاردىڭ بولجامى بويىنشا مارافونعا شامامەن 5000 ادام قاتىسادى دەپ كۇتىلۋدە.
كەلىسىمگە قول قويعان قر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ, قازاقستاننىڭ جەڭىل اتلەتيكا فەدەراتسياسىنىڭ ءبىرىنشى ۆيتسە-پرەزيدەنتى ەلدار تابانوۆ جانە «شانحە» مادەنيەت جانە سپورت يۋننان كومپانياسىنىڭ ءتورايىمى چجان تسين حالىقارالىق مارافون جايلى جان-جاقتى اڭگىمەلەپ بەردى. بۇل جارىسقا الەمدەگى ۇزدىك 30 مارافونشى دا شاقىرىلاتىن بولىپ وتىر.
استانالىق حالىقارلىق مارافوندى قىتايدىڭ «حالىقتىق تەلەديدارى» مەن «حالىقتىق سايتى» تىكەلەي ەفيردەن كورسەتەتىن بولادى.
سونىمەن, استانادا الەم نازارىن وزىنە اۋداراتىن مارافون وتكەلى تۇر.
عالىم قوجابەكوۆ
