استاناداعى تاۋەلسىزدىك سارايىندا فرانتسۋز يمپەراتورى ناپولەون بوناپارتتىڭ ءومىرى مەن ەرلىگىنە ارنالعان «ناپولەون. ءومىر. اڭىز» اتتى كورمە اشىلدى.
كورمەگە 300-گە جۋىق جادىگەر, ونىڭ ىشىندە ونەر تۋىندىلارى, قولجازبالار مەن ناپولەون ءداۋىرىنىڭ جيھازدارى قويىلعان. ولاردىڭ بارلىعى سول كەزدەگى فرانتسيانىڭ شىعارماشىلىق, عىلىمي جانە ساياسي ءومىر سالتىنان سىر شەرتىپ, سونداي-اق, فرانتسۋز يمپەراتورى كەزىندەگى ازاماتتىق قوعامداعى وزگەرىستەردى كورسەتەدى.
كورمە فرانتسيانىڭ قازاقستانداعى جىلىنىڭ قورىتىندى شاراسى رەتىندە ۇيىمداستىرىلىپ وتىر. ۇيىمداستىرۋشىلار قازاقستاندىق كورەرمەنگە پاريجدەن ارنايى اكەلىنگەن فرانتسيانىڭ باعا جەتپەس مادەني قازىنالارىن تاماشالاۋعا مۇمكىندىك بەرىپ وتىر.
«بۇل زاتتاردىڭ بارلىعى ناپولەوننىڭ جەكە بۇيىمدارى, ول ولاردى ءوز قولىمەن ۇستاعان, كۇندەلىكتى ومىرىندە قولدانعان. بۇل كورمە سونىسىمەن دە قۇندى. ءبىر وكىنىشتىسى ونىڭ داۋىسىنىڭ جازباسى جوق. ناپولەون تەك اڭىزعا اينالعان تۇلعا عانا ەمەس, ەڭ باستىسى ەت پەن سۇيەكتەن جاراتىلعان قاراپايم ادام بولعان», – دەپ اتاپ ءوتتى فرانتسيانىڭ قازاقستانداعى توتەنشە جانە وكىلەتتى ەلشىسى فرانسيس ەتەن كورمەنىڭ اشىلۋىنا بايلانىستى وتكەن ءباسپاسوز ءماسليحاتىندا.
«300 جادىگەردەن تۇراتىن كورمە ناپولەون قورى, ۆەرسال, فونتەنبلو جانە مالمەزون قالاسىنداعى ناپولەوننىڭ جوزەفينامەن تۇرعان ءۇيى سياقتى مۇراجايلاردان جينالعان. ءبىز وسى كورمەنىڭ ءدال استانادا اشىلعانىنا وتە قۋانىشتىمىز», – دەدى كورمە كۋراتورى, «ناپولەون» قورىنىڭ ديرەكتورى تەرري لەنتس.
ايتا كەتۋ كەرەك, كورمەنى ۇلتتىق مۇراجايلار بىرلەستىگى – ۇلكەن ساراي جانە «ناپولەون» قوعامدىق قورى فرانتسيانىڭ قازاقستانداعى ەلشىلىگىنىڭ باستاماسىمەن, استانا قالاسى اكىمدىگىنىڭ قولداۋىمەن ۇيىمداستىرىپ وتىر.
كورمە 23 اقپانعا دەيىن سوزىلادى. وعان كەلەم دەۋشىلەرگە 21 جەلتوقساننان باستاپ ەسىك اشىق.
اۆتور: ءابۋ-اسقار مەكەشۇلى
