ەلباسى اففيناج زاۋىتىن ارالادى
تاياۋدا پرەزيدەنت نۇرسۇلتان نازارباەۆ استاناداعى «تاۋ كەن التىن» جشس-ءنىڭ اففيناج زاۋىتىندا بولدى. يندۋستريالدىق پارك اۋماعىندا جۇزەگە اسقان ماڭىزدى جوبا قۇرىلىسىن 2011 جىلى ەلباسى ءوزى سالتاناتتى تۇردە باستاپ بەرگەن ەدى. زاۋىت قىزمەتىنىڭ باستى باعىتى – باعالى مەتالداردى ەلەكترلىك-حيميالىق اففيناجداۋ.
اففيناج زاۋىتى – الەمدە التىن شىعاراتىن التىنشى كاسىپورىن. مەملەكەت باسشىسى زاۋىتتى ارالاۋ بارىسىندا ءوندىرىس تسەحتارىنىڭ جۇمىسىمەن جانە شىعارىلعان ءونىم ۇلگىلەرىمەن تانىستى. جالپى قۇنى 5,6 ملرد تەڭگە تۇراتىن كاسىپورىن «استانا – جاڭا قالا» ارناۋلى ەكونوميكالىق ايماعى اۋماعىندا ورنالاسقان. جىلىنا 25 توننا التىن جانە 50 توننا كۇمىس وندىرەدى. الداعى ۋاقىتتا وتاندىق يننوۆاتسيالىق تەحنولوگيانى ەنگىزۋ ەسەبىنەن 75 تونناعا دەيىن جەتكىزۋ مۇمكىندىگى بار. «جوبا وسى سالاداعى الەمدىك وزىق ۇلگىلەرگە سايكەس ازىرلەنگەن.اففيناج تەحنولوگياسىن تاڭداۋدا ەكولوگيالىق تالاپتاردى ساقتاۋعا اسا ءمان بەرىلدى. بۇل رەتتە قورشاعان ورتاعا زالالىن تيگىزبەيتىن ءارى بارلىق تالاپتارعا سايكەس كەلەتىن باعالى مەتالدار اففيناجىنىڭ ەلەكترلىك-حيميالىق تەحنولوگيالارى تاڭدالىپ الىندى. زاۋىت قازىرگى تاڭدا حالىقارالىق ۇلگىدەگى العاشقى ءونىمدى شىعارا باستادى»
دەيدى كاسىپورىن ديرەكتورى مەيرامعالي تىلەۋجانوۆ.
يتاليانىڭ الدىڭعى قاتارلى «ىەسو» جابدىقتارىمەن جاساقتالعان زاۋىتتا زەرگەرلىك ءونىمدەردەن باسقا تەحنيكالىق ماقساتتاعى ونىمدەر شىعارۋ جايى قاراستىرىلۋدا. وسىلايشا حيميالىق, مەديتسينالىق, زەرگەرلىك جانە وزگە دە سالالاردى باعالى مەتالداردان الىنعان بۇيىمدارمەن قامتاماسىز ەتۋگە جول اشىلماق.
كاسىپورىن باسشىسىنىڭ ايتۋىنشا, بۇگىندە زاۋىتقا شيكىزات تاسىمالداۋ جونىندە قازاقستاننىڭ تاۋ-كەن سالاسىنىڭ وندىرۋشىلەرىمەن مەموراندۋم جاسالعان. الداعى ۋاقىتتا زاۋىتتىڭ باعالى ونىمدەرى حالىقارالىق باعام بويىنشا قازاقستان رەسپۋبليكاسىنىڭ ۇلتتىق بانكىنە جانە الەمدەگى باسقا دا ساتىپ الۋشىلارعا وتكىزىلەدى.
شىعارىلاتىن قۇيمالاردىڭ سالماعى ءارتۇرلى ءارى ستاندارتقا ساي. زاۋىت ەكونوميكالىق جاعىنان عانا ەمەس, تەحنولوگيالىق جاعىنان دا ءتيىمدى. قۋانارلىعى, مۇنداعى جۇمىسشىلاردىڭ بارلىعى – شەتەلدە دايارلىقتان وتكەن ءوزىمىزدىڭ ماماندار.