استاناداعى №68 ورتا مەكتەبىندە «الاش جولى – تاۋەلسىز قازاقستان» اتتى مەكتەپ پەداگوگيكالىق ۇجىمىنىڭ, وقۋشىلار مەن اتا-انالاردىڭ عالىمدارمەن كەزدەسۋى بولىپ ءوتتى.
الدىمەن مەكتەپ ديرەكتورى ءشارىپحان جاكەنباي, بيىلعى وقۋ جىلىنىڭ باسىندا استانا قالاسى ءبىلىم باسقارماسىنىڭ قولداۋىمەن «الاش جولى» تاجىريبەلىك الاڭى اشىلعانىن ايتتى. جاھاندانۋ زامانىندا جاستارىمىز اقپارات اعىنىندا اداسپايتىن دۇرىس باعىت-باعدار الىپ, ءارتۇرلى تەرىس اعىمدار, لاڭكەستىك پەن ءدىني ەكسترەميزمنىڭ ىقپالىنا ءتۇسىپ كەتپەس ءۇشىن وسى جەردە پاتريوتتىق, وتانسۇيگىشتىك تاربيە بەرىلمەدى. وسىعان وراي, الاش قايراتكەرلەرىنىڭ ءومىرى مەن حالىققا قىزمەتىن, بىلىمگە, عىلىمعا دەگەن, ۇلتىمىزدى ازاتتىققا, ەگەمەندىككە جەتكىزۋ جولىنداعى جانقيارلىق ەڭبەگىن جاستارىمىزدىڭ ساناسىنا ءسىڭىرۋ ماقساتىندا ۇيىمداستىرىلعان شاراعا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عالىمدارى, فيلولوگيا عىلىمدارىنىڭ دوكتورلارى ديحان قامزابەكۇلى مەن امانتاي ءشارىپ, گەوگرافيا عىلىمدارىنىڭ دوكتورى وردەنبەك مازباەۆ جانە «تۇران» ۋنيۆەرسيتەتىنىڭ پروفەسسورى مۇحامەدكارىم قۇرساباەۆ قاتىستى. قوناقتار ءاربىر جاس ازامات الدىندا كەلەشەكتىڭ باستى ومىرلىك قۇندىلىعى – وتانىمىزدىڭ تاعدىرىنا ەرەكشە جاۋاپكەرشىلىكپەن قاراپ, ونىڭ مۇددەسىن قورعاۋعا ءازىر بولىپ, حالقىمىزدىڭ مادەنيەتى مەن ءداستۇرىن قۇرمەتتەپ, العا اپارۋ مىندەتىنىڭ تۇرعانىن تىلگە تيەك ەتتى. ءاربىر الاش قايراتكەرىنىڭ ءومىر جولى, وتانعا, حالىققا قىزمەت ەتۋدىڭ ۇلگىسى, «الاش» قوزعالىسى يدەيالارىنىڭ ءالى دە, وزەكتى ەكەندىگى تۋرالى قۇندى ويلار ايتىپ, جاستاردى ۇرپاق ساباقتاستىعىنا ۇندەدى.
استانا قالاسى ءبىلىم باسقارماسى باسشىسىنىڭ ورىنباسارى قاسىمحان سەنعازيەۆ شارانى قورىتىندىلاي كەلە, بۇگىنگى تاۋەلسىزدىگىمىزدى تۇعىرلى ەتۋدە, جاستاردى وقىتۋ مەن تاربيەلەۋگە الاش جولىن تاڭداعان مەكتەپ ۇجىمىنا ساتتىلىك تىلەپ, ۇتىمدى ۇسىنىستار ايتتى. جيىن سوڭىندا الاش قايراتكەرلەرى تۋرالى ولەڭدەر وقىلىپ, پاتريوتتىق اندەر شىرقالدى.
س.شابكەنوۆا,
استانا قالاسىنداعى №68ورتا مەكتەبى
ديرەكتورىنىڭ تاربيە ءىسى جونىندەگى ورىنباسارى
