استانا قالاسى اكىمدىگىنىڭ الدىنداعى ورتالىق الاڭدا ەلىمىزدىڭ باس مەرەكەسى – تاۋەلسىزدىك كۇنىنە ارنالعان كونتسەرت ءوتتى. ازاتتىعىمىزدى ۇلىقتاعان قازاقستاندىق ەسترادا جۇلدىزدارى اسەم اندەردەن شاشۋ شاشىپ, شىڭىلتىر ايازعا قاراماستان الاڭعا جينالعان حالىققا كوتەرىڭكى كوڭىل-كۇي سىيلادى.
كونتسەرتتى جىلداعى ءداستۇر بويىنشا ەلوردالىق فيلارمونيانىڭ ءبىر توپ انشىلەرى باستادى. تالاي دارىننىڭ جولىن اشقان «ءان جۇرەگىم – استانا» بايقاۋىنىڭ ديپلومانتى سايران برالينا, «جاس قانات-2011» بايقاۋىنىڭ «قولا قانات» يەگەرى گۇلميرا جۇمابەكوۆا سالعان اندەردىڭ اراسىندا جاڭا اندەرمەن قاتار ەستايدىڭ «قورلانى» سەكىلدى كلاسسيكالىق تۋىندىلار بولدى.
ولاردان كەيىن ەلگە تانىمال انشىلەر شىعىپ, استانا اسپانىن ءان مەن كۇيگە بولەدى. بىرنەشە جىل بۇرىن «ءبىزدىڭ مۋزىكامىز وسىنداي!» دەپ مۇحيتتىڭ ارعى جاعىنداعى جۇرتتى تاڭداندىرعان «ۇلىتاۋ» توبى ءبىراز قيقۋ تۋدىردى. اتىنا زاتى ساي «ەركە» توبى نازدى اندەرگە سالدى. «جالىن» توبى جالىنداتتى, «دابىل» دۋەتى ساحنا تورىندە «دابىلداتتى». «رەترو» توبى ەسكىرمەس اندەردى حالىق جادىندا جاڭعىرتتى. «الامان» تريوسى مەن «KZ» توبى دا وزدەرىنىڭ حيت اندەرىن تارتۋ ەتتى. جەكە ورىنداۋشىلار; ساحنادان كورىنبەي ءجۇرىپ ساعىندىراتىن قىدىرالى بولمانوۆ, دوس, اسەل وماروۆا, باقىت شاداەۆا, دوسىمجان تاڭاتاروۆ, مەدەت شايكەلوۆ ەل-جۇرتتى بيلەتتى. ءتورت ساعاتقا سوزىلعان كونتسەرت مەرەكەلىك وتشاشۋمەن اياقتالدى.
امانعالي شميتۇلى
