ەل تاۋەلسىزدىگى كۇنىنە وراي, «اتامەكەن» قازاقستان كارتاسى» ەتنو-مەموريالدىق كەشەنى ەلوردالىق ۇستازدار اراسىندا «ۇزدىك ساباق», «ۇزدىك پەداگوگ» بايقاۋىن ۇيىمداستىرعان بولاتىن. شارا اياسىندا 208 مۇعالىم اشىق اسپان استىنداعى مۇراجايدا وقۋشىلارىمەن ساباق وتكىزىپ, ءبىلىم تاجىريبەلەرىن ساراپقا سالدى. مەرەكە كۇنى تاۋەلسىزدىك سارايىندا سايىستىڭ قورىتىندىسى جاريالانىپ, بەلسەندىلىك تانىتقان ۇستازدار مەن شاكىرتتەرگە «اتامەكەن» كەشەنىنىڭ العىسحاتى مەن سىي-سياپاتتارى سالتاناتتى جاعدايدا تاپسىرىلدى.
ماراپاتتاۋ ءراسىمىنىڭ الدىندا جيىنعا قاتىسۋشىلار ساراي ىشىنە ەكسكۋرسيا جاسادى. وندا ەگەمەندىگىمىزدى ايشىقتايتىن قۇجاتتارمەن, ەلوردانىڭ اسەم عيماراتتارىنىڭ ماكەتتەرىمەن, باسقا دا قۇندى, تاعىلىمدى ءجادىگەرلەرمەن تانىستى.
انۇرانىمىزبەن باستالعان باسقوسۋ ۇلتتىق گۆارديا ءانسامبلىنىڭ سۇيەمەلدەۋىمەن ءانشى جانات شىبىقباەۆتىڭ ورىنداۋىنداعى «وتانىم» انىمەن جالعاستى. كەشكە جينالعان قاۋىم ساپ تۇزەگەن جاۋىنگەرلەردىڭ ونەرىن تاماشالادى.
جيىندى مۇراجاي كەشەنىنىڭ ديرەكتورى ءۇمىتحان مۇڭالباەۆا اشىپ, ءسوز سويلەدى. «ءبىزدىڭ ۇجىم استاناداعى پەداگوگتارمەن تىعىز قارىم-قاتىناستا جۇمىس ىستەيدى. تمد ەلدەرىندە تەڭدەسى كەمدە-كەم رۋحاني وردامىزدىڭ تاعىلىمىن بۇگىنگى بۋىنعا كەڭىنەن ءسىڭىرۋ ماقساتىندا وسىنداي يگى باستامانى بيىل ەكىنشى مارتە قولعا الىپ,
ابىرويمەن اتقارىپ وتىر. مۇراجايعا كەلىپ ساباق وتكىزگەن ءار مۇعالىم دە, ءتالىم العان ءار وقۋشى دا قازاق دالاسىن كوزىمەن كورىپ, ارالاعانداي اسەر الادى. سول ارقىلى بايتاق ەلىمىز بەن جەرىمىزدىڭ كەشەگىسىن ۇعادى, بۇگىنىن بىلەدى, ەرتەڭگە كۇش-جىگەر الادى», – دەدى ءۇمىتحان داۋرەنبەكقىزى.
بايقاۋدىڭ قورىتىندىسىنا ورالساق, «ۇزدىك پەداگوگ» اتالىمىندا باس جۇلدەنى №8 ورتا مەكتەپتىڭ مۇعالىمى بەيبىتحان سەيىتحان مەن №70 مەكتەپ-ليتسەيدىڭ ۇستازى گۇلنار تاجىباەۆا يەلەندى. «ۇزدىك ساباق» اتالىمى بويىنشا تاعى دا №8 ورتا مەكتەپتەن ايگۇل ايماحانوۆا مەن №41 ورتا مەكتەپ مۇعالىمى ناتاليا حوحلوۆا الدىڭعى لەكتەن كورىندى.
اسحات رايقۇل
