استانا
استاناداعى «جاعالاۋ-3» تۇرعىن ءۇي كەشەنىندە قارتتاردىڭ دەمالىسىنا ارنالعان كەزەكتى شاعىن ورتالىق اشىلدى. وعان ەسىل اۋدانىنىڭ اكىمدىگى اۋداننىڭ ارداگەرلەر كەڭەسىمەن بىرگە مۇرىندىق بولىپ, ورتالىقتىڭ اشىلۋىنا اتالمىش كەشەنگە قىزمەت كورسەتەتىن «ارمان» جوندەۋ-پايدالانۋ ۋچاسكەسى اتسالىستى.
الماتى
الماتىدا تمد بويىنشا بالاماسى جوق جوعارى تەحنولوگيالىق جاڭا زاۋىت سالىندى. ينجەنەرلىك جۇيەلەردى قورعايتىن ءونىم شىعاراتىن كاسىپورىن «Tokyo Rope Manufacturing» ترانسۇلتتىق كورپوراتسياسىنا تيەسىلى. نىسان قۇرىلىسى جاپوندىق ينۆەستيتسيا ەسەبىنەن جۇرگىزىلدى. زاۋىت جىلىنا 17 مىڭنان اسا ءونىم شىعارادى. جاڭا كاسىپورىندا بۇرعىلايتىن انكەرلەر, اسا ءتوزىمدى مەتالل ارقاندار, تاۋ جانە كارەردە قولدانىلاتىن بولات تورلار شىعاراتىن جانە تەحنيكالىق پارامەترى جاعىنان وتە قۇندى جابدىقتار ورناتىلعان. جاپون فيرماسىنىڭ بولات ارقاندارى الەمدەگى 20 ءىرى كوپىردىڭ 12-ءسىنىڭ قۇرىلىسىندا قولدانىلعان.
قىزىلوردا
قىزىلوردادا بەلگىلى ديريجەر, قر حالىق ءارتىسى, مەملەكەتتىك سىيلىقتىڭ لاۋرەاتى تولەپبەرگەن ابدىراشەۆكە ەسكەرتكىش ورناتىلادى. بۇل جاڭالىقتى وبلىس اكىمى قىرىمبەك كوشەرباەۆ جاڭاقورعان اۋدانىندا وتكەن رەسپۋبليكالىق عىلىمي-تاجىريبەلىك كونفەرەنتسيادا ءمالىم ەتتى. سىر ەلىنىڭ ابىرويىن اسقاقتاتقان تالانتتاردىڭ ءبىرى – تولەپبەرگەن ابدىراشەۆ تۋرالى حالىق قاھارمانى نۇرعيسا تىلەنديەۆ: «تولەپبەرگەن قازىردىڭ وزىندە الەمدىك ونەردىڭ ەلەۋلى تۇلعاسى» دەپ باعا بەرگەن. سىرداريانىڭ سول جاعالاۋىندا سالىنىپ جاتقان جاڭا قالاداعى كوشەلەردىڭ بىرىنە ت.ابدىراشەۆتىڭ ەسىمى بەرىلمەك.
اقمولا
اقمولالىق ارحەولوگتار ايماقتا بۇرىن-سوڭدى كەزدەسپەگەن قۇندى جادىگەر تاپتى. قولادان سوعىلعان القانى ماماندار ءوڭىردىڭ سولتۇستىك قازاقستان وبلىسىمەن شەكارالاس اۋماعىندا, ەسىل وزەنىنىڭ بويىندا قازبا جۇمىستارىن جۇرگىزۋ بارىسىندا كەزىكتىرگەن. ونى وسىدان 4 مىڭ جىل بۇرىن اۋقاتتى ايەل تاققان بولۋى مۇمكىن. جاقىندا عانا زەرەندى اۋدانىنداعى اتاقتى كەڭوتكەل قورىمىندا دا قولا داۋىرىنە تيەسىلى التىن اشەكەيلەر تابىلعان بولاتىن. مامانداردىڭ ايتۋىنشا, ارادا مىڭداعان جىل وتسە دە, اشەكەيلەر جاقسى ساقتالعان. بولجام بويىنشا, بۇل جەردە رۋ باسىنىڭ ايەلى جەرلەنگەن بولۋى مۇمكىن. جالپى, اتالعان قورىمدا 150-دەن استام ارحەولوگيالىق نىسان بار.
باتىس قازاقستان
ورالداعى كەمە قۇراستىرۋ زاۋىتى تاۋەلسىزدىگىمىزدىڭ 27 جىلىندا 27 سۋ كولىگىن جاساپ شىعاردى. ولاردىڭ قاتارىندا جەڭىل سالماقتاعى كاتەرلەرمەن قاتار زاماناۋي قوندىرعىلارمەن جانە قارۋجاراقتارىمەن جابدىقتالعان ارتيللەريالىق كەمەلەر دە بار. تولىقتاي جاڭعىرتۋدان وتكەن كاسىپورىن قازىر سۋ ىعىستىرعىشى 600 تونناعا دەيىن جەتەتىن الىپ كەمەلەردى قۇراستىرۋعا قاۋقارلى. تەڭىزشىلەر تاپسىرىسىمەن جاسالىپ جاتقان «بارىس» ۇلگىسىندەگى سوعىس كاتەرىنىڭ دە كاسپيدى بەتكە الار كۇنى الىس ەمەس.
قاراعاندى
مەملەكەتتىك قىزمەتتىڭ 20 جىلدىعىنا ارنالعان رەسپۋبليكالىق شارا ءوتتى. ونى ۇيىمداستىرعان مەملەكەتتىك قىزمەت ىستەرى جانە سىبايلاس جەمقورلىقپەن كۇرەس اگەنتتىگى. وسى شارادان جينالعان 1,4 ملن تەڭگە اۋىر دەرتكە شالدىققان بالالاردى ەمدەۋگە ارۋجان سايننىڭ «دوم» قايىرىمدىلىق قورىنا اۋدارىلدى. اتالعان اكتسيانى ەرجان شىنكەەۆ, ماكسيم راكوۆ سياقتى تانىمال سپورتشىلار دا قولدادى.
شىمكەنت
شىمكەنتتە كوررەكتسيالىق باعىتتاعى ەكى بالاباقشا اشىلدى. 110 ورىندىق نىساندى كاسىپكەر-مەتسەنات, «قازاقستاننىڭ 100 جاڭا ەسىمى» جوباسىنىڭ جەڭىمپازى قايرات مولداسەيىتوۆ ءوز قارجىسىنا سالدىرعان. جوبانىڭ جالپى قۇنى – 280 ملن تەڭگە. جاڭا ورتالىقتىڭ ءبىرى پسيحيكالىق دامۋى شەكتەۋلى بالالارعا ارنالعان. ال ەكىنشىسى تىرەك-قيمىل فۋنكتسيالارى بۇزىلعان بالعىنداردى دامىتۋعا باعىتتالعان.
