استانا
استانا قالاسى ءبىلىم باسقارماسى مەن «Clean City NC» كومپانياسى جانە الەۋمەتتىك ماڭىزى بار باستامالاردى دامىتۋ قورىنىڭ باسشىلارى ءوزارا كەلىسىمگە قول قويدى. كەلىسىمگە سايكەس, استانانىڭ بارلىق مەكتەپتەرىندە تۇرمىستىق قالدىقتاردى ءبولىپ سالۋعا ارنالعان كونتەينەرلەر قويىلماق. ال تۇرمىستىق قالدىقتاردى ءبولىپ سالاتىن وقۋ ورىندارىنا سىيلىق رەتىندە كەڭسەنىڭ كەرەك-جاراقتارى تاراتىلادى.
الماتى وبلىسى
بيىلعى جازدا «جاسىل ەل» جاستار جاساعىنىڭ الماتى وبلىسىنداعى فيليالىندا 1695 جاس ەڭبەك ەتتى. ولار ەكى اي كولەمىندە ءشوپ شاۋىپ, قوقىس تازالاپ, اعاش سۋارىپ, ارىقتاردى قوقىستان تازالادى.
جامبىل وبلىسى
ءۇش تىلدە وقىتۋ جۇيەسىنە كوشۋ بويىنشا وتكەن وقۋ جىلىندا جامبىل وبلىسىندا 45 مەكتەپتە بيولوگيا, حيميا, فيزيكا, ينفورماتيكا پاندەرى اعىلشىن تىلىندە جۇرگىزىلگەن بولاتىن. ال بيىلعى 1 قىركۇيەكتەن باستاپ وسى پاندەر ءوڭىردىڭ 185 مەكتەبىندە اعىلشىن تىلىندە وقىتىلادى.
تۇركىستان وبلىسى
تۇركىستان وبلىسىندا پوليەتيلەن مەن پلاستيك بوتەلكەلەردى قايتا وڭدەۋ جانە شتاپەلدىك تالشىق شىعارۋ زاۋىتىنىڭ قۇرىلىسى اياقتالدى. زاۋىت تولىقتاي ىسكە قوسىلعان كەزدە 250-دەن اسا جۇمىس ورنى اشىلادى.
قوستاناي وبلىسى
قوستاناي وبلىسىندا ەگىن جيناۋ ناۋقانى باستالدى. وبلىس بويىنشا 4,6 ملن گەكتار القاپتان استىق جينالادى. قازىرگى تاڭدا 120 مىڭ گەكتار جەرگە وراق ءتۇستى.
اتىراۋ
اتىراۋدا تەگىن Wi-Fi جەلىسى ورناتىلعان 25 ورىن پايدا بولادى. عالامتورعا تەگىن كىرۋ ورىندارى قالانىڭ ورتالىق اۋماقتارىندا ورنالاسادى. اتالمىش جوبا Smart اتىراۋ جانە «اقىلدى قالا» تۇجىرىمداماسى اياسىندا قۇرىلىپ وتىر.
قىزىلوردا وبلىسى
قىزىلوردا قالاسىنداعى كاسىپكەرلەر ۇيىندە وبلىستىق «وزىڭە سەنە باستا» اتتى مۇمكىندىگى شەكتەۋلى كاسىپكەرلەر ونىمدەرىنىڭ وبلىستىق كورمە-بايقاۋى ءوتتى. بايقاۋ جەڭىمپازدارى قاسيەت ورال 1 ملن تەڭگە, ەرلىبەك جارماحانوۆ 700 مىڭ تەڭگە, اسلان ەرتوحاەۆ 500 مىڭ تەڭگە سىياقىعا يە بولدى.
