استانا
استاناعا گاز قۇبىرىن تارتۋ بيىلعى جەلتوقسان ايىندا باستالادى. «سارىارقا» ماگيسترالدى گاز قۇبىرىنىڭ «قىزىلوردا–جەزقازعان–قاراعاندى–تەمىرتاۋ–استانا» باعىتى بويىنشا ءبىرىنشى كەزەڭى 2019 جىلدىڭ جەلتوقسان ايىنا دەيىن اياقتالادى.
الماتى وبلىسى
جەتىسۋ ءوڭىرىنىڭ بۇرحان, شەڭگەلدى, قىرعاۋىلدى قورىمدارىنداعى ارحەولوگيالىق قازبا جۇمىستارى بارىسىندا تابىلعان, تەمىر داۋىرىنە تيەسىلى جۇزگە تارتا كونە زات پەن بۇيىمنىڭ اراسىندا كەراميكالىق ىدىستار, جەبەنىڭ قولادان جاسالعان ۇشتارى جانە التىن اشەكەيلەر مۋزەيگە تابىستالدى. ەندى ولار م.تىنىشپاەۆ اتىنداعى وبلىستىق تاريحي-ولكەتانۋ مۇراجايىندا ساقتالادى.
باتىس قازاقستان وبلىسى
وبلىستىق اۋرۋحانا جانىنان «اللەرگولوگيا ورتالىعى» اشىلدى. مۇندا 50-دەن اسا اللەرگەندى تەكسەرىپ, سىرقات سىرىن تاپ باسۋعا مۇمكىندىك بار. ەندى ءتۇرلى اللەرگياسى بار ناۋقاستار ءبىر جەردەن دياگنوستيكادان ءوتىپ, بىلىكتى مامانداردىڭ جاردەمىنە جۇگىنە الاتىن بولادى.
اتىراۋ وبلىسى
اتىراۋدا اۆستريالىق «بورەاليس» كومپانياسى گاز-حيميالىق كاسىپورنىن اشادى. بۇل جونىندە بريۋسسەلدە وتكەن قازاقستاندىق-ەۋروپالىق بيزنەس-فورۋمدا شەشىم قابىلداندى.
پاۆلودار وبلىسى
وبلىس ورتالىعىندا كەلەسى جىلدان باستاپ قوعامدىق كولىكتە ەلەكتروندى بيلەت جۇيەسى ەنگىزىلەدى. پاۆلودار استانا جانە الماتىدان كەيىنگى قوعامدىق كولىك قىزمەتىن جەتىلدىرۋگە كىرىسكەن ءۇشىنشى قالا بولادى. ءبىرىنشى كەزەكتە ەلەكتروندى بيلەتتەۋ جۇيەسى اۆتوبۋس مارشرۋتتارىنا, سودان كەيىن بىرتە-بىرتە ترامۆايلاردا دا ورناتىلادى.
تۇركىستان وبلىسى
ماقتاارال اۋدانىندا جاڭادان سالىنعان اسفالت-بەتون زاۋىتى ىسكە قوسىلدى. ينۆەستيتسيانىڭ جالپى قۇنى 300 ملن تەڭگەنى قۇرايدى. الداعى ۋاقىتتا دايىن ءونىم قازاقستان بويىنشا ساتىلادى دەپ جوسپارلانىپ وتىر.
شىعىس قازاقستان وبلىسى
بۇگىندە سەمەي قالاسى بويىنشا 67 مەكتەپ بولسا, سونىڭ تەك 9-ىنا عانا ۇلت تۇلعالارىنىڭ ەسىمى بەرىلگەن ەكەن. ەندى بۇعان دەيىن نومىرمەن اتالىپ كەلگەن 8 مەكتەپ اباي, م.اۋەزوۆ, ق.ساتپاەۆ, ب.مومىشۇلى, ى.التىنسارين, ءا.ءبوكەيحانۇلى, ا.بايتۇرسىنوۆ جانە پەداگوگ ت.قۇتجانوۆ ەسىمىمەن اتالاتىن بولادى.
قاراعاندى وبلىسى
قاراعاندىدا بۇقار جىراۋدىڭ 350 جىلدىعىنا ارنالعان «بۇقار جىراۋدىڭ ءومىرى مەن شىعارماشىلىعى – بۇگىنگى قوعامنىڭ رۋحاني قۇندىلىعى» اتتى حالىقارالىق عىلىمي-تاجىريبەلىك كونفەرەنتسيا ءوتتى. جيىن اياسىندا «كومەكەي اۋليە» اتتى دەرەكتى ءفيلمنىڭ تۇساۋكەسەرى ۇيىمداستىرىلدى.
