استاناعا قولايلى 4 ءموبيلدى قوسىمشا

بۇگىندە اركىمنىڭ يەلىگىندەگى ۇيالى تەلەفون كىشىگىرىم كومپيۋتەرگە اينالعانى انىق. بايلانىس قۇرالى ءوزىنىڭ تىكەلەي قىزمەتىنەن بولەك, ادام ءومىرىن جەڭىلدەتۋ ءۇشىن ويلاپ تابىلعان. ارينە, ەگەر ونىڭ بارلىق مۇمكىندىكتەرىن دۇرىس پايدالانا الساق. «اقىلدى» تەلەفون ارقىلى بىرتىندەپ «اقىلدى» استاناعا جول سالىنىپ جاتىر. وسى ورايدا «استانا اقشامى» گازەتى ەلوردالىقتار مەن قالا قوناقتارىنا كۇندەلىكتى تىرشىلىكتە پايدالى بولاتىن  4 ءموبيلدى قوسىمشانى نازارلارىڭىزعا ۇسىنادى.

1. Smart Astana
بۇل ءموبيلدى قوسىمشا, اتى ايتىپ تۇرعانداي, استانانىڭ ەڭ يننوۆاتسيالىق جوباسىنا اينالۋدى كوزدەيدى. قوسىمشاعا كىرگەن سوڭ «بۇكىل قالا سەنىڭ سمارتفونىڭدا» دەگەن جازۋ شىعادى. راسىمەن دە, قالاعا قاتىستى بارلىق كەرەك مالىمەتتى وسى جەردەن تاباسىز. «استانا Innovation» كومپانياسىنىڭ باسقارما توراعاسى ولجاس سارتاەۆتىڭ ايتۋىنشا, قوسىمشانىڭ جاڭارتىلعان نۇسقاسىندا 60-تان استام مەملەكەتتىك قىزمەت ءتۇرى كورسەتىلگەن. سونداي-اق, 12 كوممەرتسيالىق مەكەمە ءوز قىزمەتتەرىن ۇسىنادى. بۇگىندە كابينەتتەردى ارالاپ, كەزەكتە تۇرىپ, الدەقايدا قوڭىراۋ شالۋدىڭ قاجەتى جوق دەيدى قۇراستىرۋشىلار. كەز كەلگەن ازامات قالا اكىمدىگىنىڭ باسشىلىعىنا, ونىڭ ىشىندە اۋدان اكىمدىكتەرى مەن قالالىق باسقارمالاردىڭ قابىلداۋىنا وسى جەردە جازىلا الادى. قوسىمشا ارقىلى دارىگەردى ۇيگە شاقىرۋعا نەمەسە ونىڭ قابىلداۋىنا جازىلۋعا, بالاڭىزدىڭ بالاباقشاعا كەزەگىن بىلۋگە, كوممۋنالدىق قىزمەتتەردى تولەۋگە, پويىزدار مەن اۆتوبۋستار كەستەسىن قاراۋعا جانە وزگە قىزمەتتەردى پايدالانۋعا مۇمكىندىك بار.
حالىق اراسىندا كەڭىنەن تانىلعان naimi.kz – ءۇي شارۋاسىنا قاجەت مامانداردىڭ بازاسى, hipo.kz – جۇمىس ىزدەۋ پورتالى, gippokrat.kz – ءدارى-دارمەكتەردى ىزدەۋ جانە تاپسىرىس بەرۋ ورنى, zenge.kz – تاماققا تاپسىرىس بەرۋ سايتى Smart Astana قوسىمشاسىندا بىرىكتى.

ەسكەرتپە: قوسىمشا كۇننەن-كۇنگە جەتىلىپ, از-كەم كەمشىلىكتەر اقىرىنداپ جويىلۋدا. Smart Astana-نىڭ باستى كەمشىلىگى – قازاق تىلىندە جەتىك «سويلەمەيتىنى».
ءموبيلدى قوسىمشانى جاساۋشىلار تەحنيكالىق اقاۋ­لار بولعان جاعدايدا support_sa@e-akimat.kz پوشتاسىنا نەمەسە https://t.me/smartastanabot تەلەگرام چات-
بوتىنا مىندەتتى تۇردە جازۋدى وتىنەدى. سونىمەن قاتار, smart.astana.kz پورتالىندا تەحنيكالىق كومەك رەتىندە ونلاين-چات جۇمىس ىستەپ تۇرادى. قوسىمشانىڭ جۇمىسى جايلى ەسكەرتۋلەر مەن تىلەكتەرىڭىزدى دە سول جەرگە جىبەرۋگە بولادى.

2. «Astra bus» قوسىمشاسىن تەلەفونعا جۇكتەسەڭىز,
قالاداعى قوعامدىق كولىكتەر تۋرالى بارلىق ماعلۇماتتى تاباسىز. ا نۇكتەسىنەن ب نۇكتەسىنە دەيىن جەتۋ ءۇشىن وزىڭىزگە كەرەك مەكەنجايدى تەرىپ, ءدال سول مەزەتتە قانداي اۆتوبۋس قاي جەردە ءجۇرىپ كەلە جاتقانىن كورەسىز. وسىلايشا, ءوز باعدارىڭىزدى الدىن الا جوسپارلايسىز. سونداي-اق, ءموبيلدى قوسىمشادا اۆتوبۋس مارشرۋتتارىنىڭ كەستەسى مەن ءجۇرۋ ينتەرۆالى تۇگەل بەرىلگەن. كولىك قوزعالىسىنا قاتىستى ەڭ سوڭعى جاڭالىقتار دا وسىندا. تۋرا وسى قوسىمشادا 574-777 نومىرىنە حابارلاسىپ, قوعامدىق كولىكتىڭ جۇمىسىنا قاتىستى ءوز ۇسىنىستارىڭىز بەن وتىنىشتەرىڭىزدى قالدىرا الاسىز.
ەسكەرتۋ: ازىرشە قوسىمشا بارلىق اۆتوبۋستاردىڭ ءجۇرىپ وتكەن جولىن كورسەتپەيدى. قالادا 20-دان استام №9 باعدارلى اۆتوبۋس بار دەسەك, ولاردىڭ ءۇش-تورتەۋى عانا Astra bus ءموبيلدى قوسىمشانىڭ قىزمەتىنە قوسىلعان. جاڭادان ساتىپ الىنعان اۆتوبۋستار بىرتىندەپ بۇل جۇيەگە ەنگىزىلەتىن بولادى. وكىنىشتىسى, ينتەرفەيستىڭ ءتىلى تەك ورىس تىلىندە.

3. Ticketon.kz
شاھاردا كورسەتىلىپ جاتقان كينولار, تەاترداعى قويىلىمدار, ءتۇرلى كونتسەرتتەر جانە سپورتتىق شارالار جايلى اقپاراتتى Ticketon.kz ءموبيلدى قوسىمشاسى ارقىلى بىلە الاسىز. جاقسىسى, ءدال وسى جەردە قالاعان شاراعا بيلەتتى ۇيدەن شىقپاي-اق ساتىپ الۋعا بولادى.
ەسكەرتۋ: قازىرگى تاڭدا قوسىمشادا ەلورداداعى بارلىق مادەني ورىندار تۋرالى اقپارات جوق. ءموبيلدى قوسىمشاعا قاراعاندا ticketon.kz سايتىمەن جۇمىس ىستەۋ الدەقايدا جەڭىلىرەك. قوسىمشانىڭ ەڭ ءبىر وسال تۇسى وسى دەر ەدىم.

4. Point +.
كوشە بويىندا تۇرىپ, جاقىن ماڭداعى بانكوماتتى Google-دان ىزدەپ تۇرماۋ ءۇشىن بۇل ءموبيلدى قوسىمشانى جۇكتەۋگە كەڭەس بەرەمىز. قوسىمشا وزىڭىزگە قاجەت بانك بولىمشەلەرى مەن بانكوماتتاردىڭ قاي جەردە ورنالاسقانىن, ايىرباستاۋ بولىمشەلەرى مەن ۆاليۋتانىڭ اعىمداعى كۋرسىن كورسەتىپ تۇرادى. سونداي-اق, نوتاريۋستار, زەينەتاقى قورلار, ساقتاندىرۋ كومپانيالار, حالىققا قىزمەت كورسەتۋ ورتالىعىنىڭ مەكەنجايىن كورىپ قانا قويماي, ءسىز تۇرعان جەردەن قانشالىقتى الشاق ورنالاسقانىن بىلە الاسىز. Point + قوسىمشاسىندا ۇيالى تەلەفون وپەراتورلارىنىڭ بولىمشەلەرى تۋرالى دا اقپارات بار.
ەسكەرتۋ: كەيبىر مەكەنجايلار دەرەكتەر بازاسىندا ساقتالماعان.

گۇلدانا تالعاتقىزى