استانالىقتاردىڭ ءال-اۋقاتى ارتادى
استانا قالالىق ءماسليحاتىندا الەۋمەتتىك-مادەني دامۋ بويىنشا 2017-2019 جىلدارعا ارنالعان بيۋدجەتتىك جوبانى تالقىلاعان تۇراقتى كوميسسيانىڭ وتىرىسى ءوتتى. وندا ءۇش جىلدىق بيۋدجەت جايى, مەديتسينا سالاسى جانە الەۋمەتتىك توپتارعا كومەك كورسەتۋ ماسەلەلەرى تالقىلاندى. جيىندا ەلوردالىقتاردىڭ ءال-اۋقاتىن, ءومىر ءسۇرۋ دەڭگەيىن ارتتىرۋ, جۇمىسسىزدىق دەڭگەيىن تومەندەتۋ, زەينەتكەرلەردى, ارداگەرلەردى قولداۋعا باعىتتالعان باعدارلامالار ءسوز بولدى.
ءۇش جىلدىق بيۋدجەت جايى
استانا قالالىق ءماسليحاتىندا الەۋمەتتىك-مادەني دامۋ بويىنشا 2017-2019 جىلدارعا ارنالعان بيۋدجەتتىك جوبانى تالقىلاعان تۇراقتى كوميسسيانىڭ وتىرىسى ءوتتى.
جيىندا قالالىق ەكونوميكالىق جانە بيۋدجەتتىك جوسپارلاۋ باسقارما باسشىسىنىڭ ورىنباسارى گۇلنار ءجۇسىپوۆا ەلوردانىڭ الەۋمەتتىك-مادەني دامۋى بويىنشا الداعى ءۇش جىلعا ارنالعان بيۋدجەتتىك جوبالار تۋرالى كەڭىرەك بايانداما جاسادى. وندا بايانداماشى ءار سالاعا تەرەڭىرەك توقتالدى. استانا قالاسىنىڭ 2017-2019 جىلدارعا ارنالعان بيۋدجەت جوباسى قازاقستان رەسپۋبليكاسىنىڭ بيۋدجەت كودەكسىنە, جەرگىلىكتى بيۋدجەتتەردى ازىرلەۋ ەرەجەسىنە سايكەس ازىرلەنىپ, دايىندالعان.
«قر ۇلتتىق ەكونوميكا مينيسترلىگىنىڭ استانا قالاسى بويىنشا بەلگىلەگەن ءۇش جىلدىق بيۋدجەت شىعىستارىنىڭ جالپى كولەمى 73,8 ملرد تەڭگە سوماسىندا جوسپارلانعان, ونىڭ ىشىندە: 2017 جىلعا – 20,4 ملرد تەڭگە; 2018 جىلعا – 21,5 ملرد تەڭگە; 2019 جىلعا 31,9 ملرد تەڭگە قاراستىرىلعان. سونىمەن بىرگە, بولجام بويىنشا اعىمداعى شىعىندارعا 6,5 پايىز كوەففيتسيەنت پايدالانادى» دەدى ول.
ايتا كەتەرلىك, بيۋدجەت شىعىستارى نەگىزىنەن ەلوردا ازاماتتارىنىڭ ءومىر ءسۇرۋ دەڭگەيىن جاقسارتۋعا, الەۋمەتتىك قورعاۋعا جانە مادەني شارالاردى وتكىزۋگە باعىتتالعان.
ودان كەيىن ءسوز العان دەنساۋلىق ساقتاۋ باسقارماسىنىڭ باستىعى ەرىك بايجۇنىسوۆ دەنساۋلىق ساقتاۋعا بايلانىستى بيۋدجەتتىك جوبانى
ەگجەي-تەگجەيلى بايانداپ, ءوزى باسقارىپ وتىرعان باسقارمانىڭ الداعى جىلى اتقاراتىن جۇمىستارىنا قىسقاشا شولۋ جاسادى. باسقارما باسشىسى ءوز سوزىندە كەلەر جىلى مىندەتتى الەۋمەتتىك مەديتسينالىق ساقتاندىرۋ مەن پەدياتر, پسيحياتر ماماندارىن دايارلاۋعا دا باسىمدىق بەرىلىپ وتىرعاندىعىن جەتكىزدى. ءماسليحات دەپۋتاتى قاراقات ابدەننىڭ ەلوردانىڭ ىرگەسىندە ورنالاسقان ەلدىمەكەندەردە ەمحانالار جەتىسپەيدى دەپ ايتقان ساۋالىنا ەرىك ابەنۇلى «بۇل باعىتتا ارناۋلى باعدارلاما ازىرلەندى. ەگەر ول جۇزەگە اسسا, اتالعان ماسەلە ءوز شەشىمىن تابادى. بىراق شاعىن جيناقى ەمحانا تۇرىندە بولادى» دەدى ول.
جەدەل جاردەم كولىكتەرى جاڭارادى
سونداي-اق, كەلەر جىلى ەلوردادا «ەكسپو-2017» حالىقارالىق كورمەسى وتەتىندىكتەن, قالالىق جەدەل جاردەم ماشينالارىن جاڭارتۋعا قارجى قارالعان. بۇگىندە 6-7 جىلدان بەرى ۇزبەي جۇرگەن 31 جەدەل-جاردەم كولىگى ەسكىرگەن. ەندى سولاردىڭ ورنىنا جاڭا كولىك ساتىپ الىنباق. ارينە, الەمدىك كورمەگە شەت مەملەكەتتەردەن قوناقتار كوپ كەلەدى. سوندىقتان, ولارعا قىزمەت كورسەتۋ ءۇشىن قالالىق اۋرۋحانالار جوعارعى تالاپقا ساي بولۋ قاجەت. سول ماقساتتا ەلوردالىق اۋرۋحانالارداعى قابىلداۋ بولىمدەرى حالىقارالىق ستاندارتقا سايكەس جاڭارتىلماق.
سونىمەن بىرگە, استاناداعى توزىعى جەتىپ تۇرعان تەمىرجولشىلار اۋرۋحاناسى دا كۇردەلى جوندەۋدەن وتپەك. ءوز سوزىندە قالانىڭ باس ءدارىگەرى مەكتەپ مەديتسيناسىنا دا اۋقىمدى قارجى ءبولىنىپ وتىرعاندىعىن ايتتى. «ءبىز بيىل ءبىلىم باسقارماسىنان 10 مەكتەپتىڭ مەديتسيناسىن قابىلداپ الدىق. الداعى جىلى 20 مەكتەپتى قابىلداماقپىز. سول باعىتتا جاڭا باعدارلاما ازىرلەپ, مەديتسينالىق مامانداردى قايتا دايىنداۋدى قولعا الدىق» دەدى ول.
ارداگەرلەرگە كومەك ازايمايدى
استانا قالاسىنىڭ جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ باستىعى ەرمەك وسپانوۆ ءوز بايانداماسىندا ەلوردالىقتاردىڭ ءال-اۋقاتىن, ءومىر ءسۇرۋ دەڭگەيىن ارتتىرۋ, كەدەيلىك, جۇمىسسىزدىق دەڭگەيلەرىن تومەندەتۋگە باعىتتالعان باعدارلامالار مەن حالىقتىڭ الەۋمەتتىك ءالسىز توپتارىن – زەينەتكەرلەردى, مۇمكىندىگى شەكتەۋلى ادامداردى, از قامتىلعانداردى, جۇمىسسىز ازاماتتاردى اتاۋلى قولداۋعا ارنالعان شارالار جايىندا ءسوز قوزعادى. اسىرەسە, سوعىس جانە ەڭبەك ارداگەرلەرىنە جاسالىپ وتىرعان كومەككە ەرەكشە توقتالىپ ءوتتى.
ال استانا قالاسىنىڭ مادەنيەت, مۇراعاتتار جانە قۇجاتتاما باسقارما باسشىسىنىڭ ورىنباسارى ناريما مۇحامبەتالينا «ءبىزدىڭ باسقارما ءۇشىن الداعى جىل وتە اۋقىمدى شارالارعا تولى بولماق. استانادا «ەكسپو-2017» حالىقارالىق كورمەسى وتەدى. سول كورمە اياسىندا 1000-نان استام مادەني شارا ۇيىمداستىرىلادى. سوندىقتان باعدارلامالاردىڭ دەنى سوعان باعىتتالدى. بۇگىنگى ۋاقىتتا قالاداعى مادەنيەت سالاسىنىڭ مەكەمەلەرى وعان دايىندىقتى باستاپ كەتتى» دەدى ول. وسى ماقساتتا بيىلعى جىلى بىرقاتار مادەني عيماراتتارعا جوندەۋ جۇمىستارى جۇرگىزىلگەن. ول ءالى دە جالعاسىن تاپپاق.
ازامات ەسەنجول