استانا
«استانا – ءومىر سۇرۋگە جايلى جانە قاۋىپسىز قالا» باعدارلاماسى شەڭبەرىندە ەسىل اۋدانىندا رۇقسات ەتىلمەگەن جەرگە تاستالعان قالدىقتاردى جيناۋ جانە تاسىمالداۋ بويىنشا سەنبىلىك ۇيىمداستىرىلدى. ەكى كۇندە پوليگونعا 647 توننا قۇرىلىس قالدىقتارى شىعارىلدى.
تۇركىستان وبلىسى
وتىرار اۋدانىنىڭ ورتالىعى ءشاۋىلدىر اۋىلىندا مىڭ ادامعا لايىقتالعان جاڭا مەشىت اشىلدى. «ەسەن انا» دەپ اتالاتىن مەشىتتىڭ اشىلۋ سالتاناتىنا ارنايى قاتىسقان قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي سەرىكباي قاجى وراز قاسيەتتى قۇران كىتابىن سىيعا تارتتى.
الماتى وبلىسى
تالدىقورعان قالاسىنىڭ ورتالىق الاڭىندا جەتىسۋدىڭ جەتى وزەنىن ورنەكتەگەن, اۋەن ىرعاعىمەن بيلەپ, ءتۇرلى-ءتۇستى جارىقتارمەن بەزەندىرىلگەن جەتى سۋبۇرقاق ىسكە قوسىلدى. سۋبۇرقاقتاردىڭ سالتاناتتى اشىلۋىنا قازاق ەستراداسىنىڭ جۇلدىزدارى قاتىستى. مەرەكەلىك شارا وتشاشۋعا ۇلاستى.
جامبىل وبلىسى
قالا كۇنىنە وراي, تارازداعى حالىق قاھارمانى ق.رىسقۇلبەكوۆ اتىنداعى ساياباقتا قايرات رىسقۇلبەكوۆتىڭ ەسكەرتكىشى بوي كوتەردى. ءمۇسىن بيىكتىگى – 2,8 مەتر. سونىمەن قاتار اتالمىش ساياباقتا ءبىرقاتار جاڭا نىساندار سالىنىپ, ەسكىرگەندەرىنە جاڭعىرتۋ جۇمىستارى جۇرگىزىلدى.
شىمكەنت
شىمكەنتتە ءداستۇرلى «دوستىق داستارحانى» حالىقارالىق پالاۋ فەستيۆالى ءوتتى. شاراعا ەلىمىزدىڭ بىرقاتار ايماقتارى مەن كورشىلەس ەلدەردىڭ 30-دان اسا اسپازى قاتىستى. بايقاۋ قورىتىندىسى بويىنشا ءبىرىنشى ورىندى 13 جاستاعى ەڭ جاس اسپاز بابامۇرات ءابدراحمانوۆ جەڭىپ الدى.
پاۆلودار وبلىسى
اقسۋدا قالا كۇنى مەرەكەسىنە وراي, الامان بايگە, اۋدارىسپاق, قىز قۋ, قوشقار كوتەرۋ سىندى ۇلتتىق سپورت تۇرلەرىنەن جارىستار ءوتتى. قوشقار كوتەرۋ سايىسىندا قىزىلجار اۋىلىنىڭ تۇرعىنى ەراسىل سىزدىقوۆ 60 كەلى قوشقاردى 61 رەت كوتەرىپ, جەڭىمپاز اتاندى.
قىزىلوردا وبلىسى
وبلىس ورتالىعىندا «التىن ءدان» مەرەكەسى اياسىندا وتكەن جارمەڭكەگە وبلىستىڭ بارلىق اۋداندارىنىڭ ديقاندارى قالا جۇرتىنا 1500 تونناعا جۋىق اۋىلشارۋاشىلىعى ونىمدەرىن ۇسىندى.
اقتوبە وبلىسى
اقتوبەدە وتكەن جالپى قالالىق سەنبىلىككە 8 مىڭنان اسا ادام مەن 100 تەحنيكا جۇمىلدىرىلدى. ءبىر كۇندە قاراعاي, اققايىڭ, تەرەك, الما اعاشتارىنىڭ 10 مىڭ كوشەتى مەن 500 بۇتا وتىرعىزىلدى.
