قاي مەرەكەگە دە بەلسەندى اتسالىسىپ جۇرەتىن ەلوردانىڭ جولاۋشىلار تاسىمالداۋ كاسىپورىندارى بۇل جولى تاۋەلسىزدىكتىڭ 21 جىلدىعى قۇرمەتىنە كوڭىلدى تاپقىرلار كلۋبى ويىنىن ۇيىمداستىردى.
پوليتەحنيكالىق كوللەدج عيماراتىندا وتكەن جارىسقا №1,2,3,4 اۆتوبۋس پاركتەرى مەن «جورعا» جانە «تەمىر تۇلپار» جشس كوماندالارى قاتىستى. اۆتوبۋس جۇرگىزۋدى عانا بىلەتىندەي كورىنەتىن كولىك مەكەمەلەرىنىڭ قىزمەتكەرلەرى سايىس بارىسىندا ازىل-قالجىڭعا دا شەبەر, ونەردەن دە قۇرالاقان ەمەستىگىن اڭعارتتى. كولىك جۇرگىزۋشىلەرى مەن كوندۋكتور قىز-جىگىتتەر تاۋەلسىزدىگىمىزدىڭ تاريحى مەن ماڭىزىن بەينەلەيتىن كورىنىستەر قويىپ, وسىناۋ مەرەيلى مەرەكەمىزدىڭ كەيدە جاڭا جىل مەيرامىنىڭ كولەڭكەسىندە قالىپ قوياتىنىن دا سىن تەزىنە الدى.
تاۋەلسىزدىك العالى ءالى كۇنگە دەيىن مەملەكەتتىك دەڭگەيگە جەتە الماي جاتقان قازاق ءتىلىنىڭ جاي-كۇيى دە كتك كوماندالارىنىڭ استارلى ازىلدەرىنە ارقاۋ بولدى. ادەمى ازىلدەر مەن شىنايى كۇلكىگە قۇرىلعان كوڭىلدى جارىس №2 اۆتوبۋس پاركى كومانداسىنىڭ جەڭىسىمەن اياقتالدى. ەكىنشى ورىندى №1 اۆتوبۋس پاركى ەنشىلەسە, ءۇشىنشى ورىنعا №4 اۆتوبۋس پاركى لايىق دەپ تانىلدى.
ق.نۇرعالي
