قازىرگى تاڭدا ASTRA PLAT قوعامدىق كولىكتەردە ءجۇرۋ اقىسىن تولەۋدىڭ ەلەكتروندىق جۇيەسىن ەنگىزۋ – ەلوردانىڭ وسى سالاسىن دامىتۋداعى ماڭىزدى ماسەلەلەردىڭ ءبىرى. كۇنى كەشە ۇيىمداستىرىلعان ءباسپاسوز ءماسليحاتىندا سالا ماماندارى جۋرناليستەردىڭ ساۋالدارىنا جان-جاقتى جاۋاپ بەرىپ, جاڭا جۇيەنى ەگجەي-تەگجەيلى ءتۇسىندىردى.
باسقوسۋدا «استانا-LRT» فيليالى تولەم جۇيەلەرى ورتالىعىنىڭ جەتەكشىسى سەرگەي پوپوۆ جاقىن ارادا باس قالا مەكتەپتەرىندە كولىك كارتاسىن تاراتۋ جۇمىستارى جۇرەتىنىن جەتكىزدى. «مەكتەپ كولىك كارتاسىن تەك ASTRA PLAT ارنايى پورتالىنا تىركەلگەن وقۋشىلار عانا الا الادى. ءار ءبىلىم ورداسىندا بۇل پورتالمەن جۇمىس ىستەيتىن جاۋاپتى مامان بەكىتىلگەن. جاڭا وقۋ جىلىنىڭ باستالۋىنا بايلانىستى استانادا 12000 جەتكىنشەك مەكتەپ تابالدىرىعىن اتتادى. مىنە, وسى بالالارعا كولىك كارتالارىن ۇلەستىرۋ جوسپارلانۋدا. سونىمەن قاتار, ەلوردالىق ورتا ءبىلىم بەرەتىن مەكەمەلەردە وتكەن وقۋ جىلىنىڭ سوڭىندا كەيبىر وقۋشىلار كولىك كارتالارىن الىپ ۇلگەرمەگەن» دەدى سەرگەي پوپوۆ.
جيىن بارىسىندا «استانا-LRT» جشس-ءنىڭ جولاۋشىلار كولىگى بويىنشا مامانى ءابدىحاميت تاماباەۆ بيىلعى جىلدىڭ كوكتەمىندە جۇرگىزىلگەن دايىندىق جۇمىستارى اياسىندا ەلوردادا 78000 وقۋشى كولىك كارتاسىن العان. «بالالار ونى ASTRA PLAT جۇيەسىنىڭ ەكىنشى جانە كەزەكتى كەزەڭدەرى ىسكە قوسىلعاندا پايدالانا الادى. سونىمەن قاتار, ولار وقۋشىلارعا ارنالعان ءتاريفتى ەنگىزىپ, بونۋس رەتىندە ءبىر اۆتوبۋستان ەكىنشىسىنە تەگىن اۋىسىپ وتىرا الادى.
ASTRA PLAT جول ءجۇرۋ اقىسىن تولەۋدىڭ ەلەكتروندىق جۇيەسىن ەنگىزۋدىڭ بارلىق كەزەڭى ىسكە قوسىلعانشا بالالار قالانىڭ قوعامدىق كولىكتەرىندە جول اقىسىن قولما-قول تولەۋلەرىنە نەمەسە قاعاز جول ءجۇرۋ بيلەتتەرىن كورسەتۋلەرىنە بولادى» دەدى ءابدىحاميت تاماباەۆ. ول ءوز سوزىندە ەگەر مەكتەپ كولىك كارتاسى جوعالعان جاعدايدا, ونى ASTRA PLAT جۇيەسىنىڭ ەكىنشى كەزەڭى ىسكە قوسىلعاندا قايتا جاساتۋعا بولاتىندىعىن جەتكىزدى. اتا-انا بالاسىمەن بىرگە ارنايى كاسسالارعا كەلىپ, ءبىرىنشى بەرىلگەن كارتانىڭ اقىسىن – 400 تەڭگەنى تولەپ, جاڭاسىن الا الادى. وزدەرىمەن بىرگە جەكە قۇجاتتارى بولۋى ءتيىس. وسى تۇستا ايتا كەتەرلىگى, جۇيە تولىق ىسكە قوسىلعانشا, قالا اۋماعىندا وتىز اۆتومات پەن ون كاسسا ورناتىلماق.
مامانداردىڭ مالىمەتىنشە, ASTRA PLAT جول اقىسىن تولەۋدىڭ ەلەكتروندىق جۇيەسىن ەنگىزۋدىڭ ءاربىر كەزەڭىندە ونىڭ جۇمىس ىستەۋ قاعيداسى مەن قولدانۋى, بونۋستارى مەن كارتانى دۇرىس پايدالانۋى جايىندا تولىق اقپارات تاراتىلىپ, جۇرگىزىلگەن الەۋمەتتىك ساۋالنامالار ناتيجەلەرى جاريالانىپ وتىرادى. «الدىن الا جۇرگىزىلگەن باقىلاۋدان بۇل جۇيەنىڭ ءبىرىنشى كەزەڭىنىڭ جولاۋشىلار تاراپىنان جاقسى قابىلدانعانىن بايقاۋعا بولادى. بۇل استانا قالاسىنىڭ كولىك سالاسىنىڭ دامۋ تاريحىندا ءبىرىنشى رەت قالا ماڭىنا قاتىنايتىن اۆتوبۋستاردا قولدانىلدى. ال جاڭا جۇيەنىڭ وڭ باعالانۋىن جول اقىسى ورتاشا ەسەپپەن 50 تەڭگەگە, كەيبىر ايماقتارعا, ماسەلەن, باباتايعا 120 تەڭگەگە, ارشالىعا 100 تەڭگەگە ارزانداعانىمەن بايلانىستى. تاريفتەر سانى 84-تەن 5-كە دەيىن قىسقاردى. الەۋمەتتىك جەڭىلدىكتەرگە يە ازاماتتارعا تەگىن جۇرۋگە مۇمكىندىك بەرىلدى» دەدى «استانا-LRT» جشس-ءنىڭ جولاۋشىلار كولىگى بويىنشا مامانى ءابدىحاميت تاماباەۆ.
ءباسپاسوز ءماسليحاتى بارىسىندا 9 قىركۇيەك كۇنى الاش تاس جولىنداعى «كوك بازار» ايالداماسىندا № 39, 120 اۆتوبۋستاردىڭ جۇرگىزۋشىلەرى مەن كوندۋكتورلارى اراسىندا ورىن العان جانجال دا ءسوز بولدى. كولىكتىك باقىلاۋ قىزمەتىنىڭ جەتەكشىسى مۇحتار ءجۇمادىل كەلەڭسىز جاي تۋدىرعان جۇمىسشىلاردىڭ بارلىعىنا سوگىس بەرىلىپ, جۇمىستان قۋىلعاندىعىن ءمالىم ەتتى. «وقيعاعا بايلانىستى كولىكتىك باقىلاۋ قىزمەتى جانجالعا قاتىسقان بارلىق ادامنان تۇسىنىكتەمە الدى. جەلىدە مۇنداي جاعدايعا جول بەرىلمەيدى. ەكى جاق تا جول ەرەجەسى ءتارتىبىن جانە جولاۋشىلار مەن جۇك تاسىمالى ەرەجەسىن بۇزعان. بىراق بەرگەن تۇسىنىكتەمەلەرىنە سايكەس, ەكى جاق تا ىشكى ىستەر ورگاندارى مەن مەديتسينالىق مەكەمەلەرگە جۇگىنبەگەن. جانجالعا قاتىسقان بارلىق ادامعا قاتاڭ سوگىس جاريالانىپ, قايتا جۇمىسقا قابىلدانۋ قۇقىعىنان ايىرىلىپ, جۇمىستان شىعارىلادى. ءتارتىپ بۇزۋشىلار اۆتوبۋس پاركتەرىنىڭ «قارا تىزىمىنە» ەنگىزىلدى» دەدى م. ءجۇمادىل.
اسحات رايقۇل
