15 ساۋىردەن باستاپ قازاقستان استىق پەن ۇننىڭ ەكسپورتىنا شەكتەۋ قويادى. اۋىل شارۋاشىلىعى ءمينيسترىنىڭ ءبىرىنشى ورىنباسارى ايداربەك ساپاروۆ ەلدەگى بار استىق پەن ۇننىڭ كولەمى ىشكى قاجەتتىلىكتى وتەۋگە جەتەتىنىن مالىمدەدى. ول ىشكى نارىقتاعى تاپشىلىقتى جويۋ جانە ۇن تارتاتىن كاسىپورىنداردى جۇكتەۋ ءۇشىن شەكتەۋ شارالارى قاجەت ەكەنىن ايتتى.
«2022 جىلعى 1 ساۋىردە سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ جونىندەگى ۆەدومستۆوارالىق كوميسسيا 15 ءساۋىر مەن 15 ماۋسىم ارالىعىندا بيداي مەن ۇن ەكسپورتىنا كۆوتالاردى ەنگىزۋ تۋرالى شەشىم قابىلدادى. بيدايعا ارنالعان كۆوتانىڭ كولەمى 1 ميلليون, ۇنعا 300 مىڭ توننا» دەدى ا.ساپاروۆ ورتالىق كوممۋنيكاتسيالار قىزمەتىندە وتكەن ونلاين بريفينگتە.
ءمينيستردىڭ ءبىرىنشى ورىنباسارى ىشكى نارىقتاعى ناقتى جاعدايدى باعالاۋ ءۇشىن مينيسترلىك ۇلتتىق ستاتيستيكا بيۋروسىمەن جانە جەرگىلىكتى اتقارۋشى ورگاندارمەن بىرلەسىپ, وڭىرلەردەگى بيداي قورىن تۇگەندەۋ جۇمىستارىن جۇرگىزىپ جاتقانىن ايتتى. «7 ساۋىردەگى جاعداي بويىنشا قورلار 118 مىڭ توننا ۇندى قۇرايدى, ونىڭ ىشىندە تۇراقتاندىرۋ قورلارىندا – 10 مىڭ توننا, «اينالىم سحەماسى» شەڭبەرىندە 22 مىڭ توننا, وندىرۋشىلەردە 48 مىڭ توننا, قويمالاردا شامامەن 20 مىڭ توننا جانە ساۋدا وبەكتىلەرىندە 18 مىڭ توننا. كورسەتىلگەن كولەم ىشكى قاجەتتىلىكتى قامتاماسىز ەتۋ ءۇشىن جەتكىلىكتى. سونىمەن قاتار, «ازىق-تۇلىك كورپوراتسياسىنىڭ» رەسۋرستارىندا 800 مىڭ توننادان استام استىق بار, ولار قاجەت بولعان جاعدايدا جاعدايدى تۇراقتاندىرۋ ءۇشىن ىشكى نارىققا جىبەرىلەتىن بولادى» دەپ تولىقتىردى ايداربەك ساپاروۆ.
