ەلوردادا 16 جانە 23 ءساۋىر كۇندەرى جالپىقالالىق سەنبىلىك پەن اعاش وتىرعىزۋ وتەدى. قالا اكىمدىگى كاسىپورىنداردى, ميب-تەردى جانە تۇرعىنداردى سەنبىلىككە بەلسەندى قاتىسۋعا شاقىرادى.
Cەنبىلىكتە مەنشىك يەلەرى بىرلەستىكتەرىنە (ميب/پيك) اۋماقتاردى اباتتاندىرۋ ءۇشىن كوشەتتەر بەرىلەدى.
بۇگىنگى تاڭدا نۇر-سۇلتان قالاسىندا كۇن سايىن كوشەلەر مەن اشىق اۋماقتاردى سانيتارلىق تازالاۋ جالعاسۋدا. ەلوردانىڭ بارلىق ءتورت اۋدانىندا قىستان كەيىنگى اباتتاندىرۋ جانە تازالاۋ جۇمىستارى ءجۇرىپ جاتىر. وعان جۇزدەگەن كوممۋنالدىق قىزمەت مامانى مەن ارنايى تەحنيكا جۇمىلدىرىلدى.
ماسەلەن, تروتۋارلار مەن اسفالت جولدار ارنايى تەحنيكانىڭ كومەگىمەن, ال كوگالدى تۇستار مەن باسقا دا اشىق اۋماقتار قولمەن تازالانادى. سول سياقتى كوپىرلەر, ەسكەرتكىشتەر, تروتۋارلار, جول بەلگىلەرى, قورشاۋلار جۋىلادى, ال گۇلزارلار, ساياباقتار, قوعامدىق كەڭىستىكتەر قوقىستان تازارتىلىپ, قوقىس جاشىكتەرى بويالۋدا.
بيىل دا قالانى كوگالداندىرۋ جۇمىسى ارى قاراي جالعاسادى. وتكەن جىلى ەلوردادا 1 ملن-عا جۋىق جاسىل جەلەك وتىرعىزىلدى.
