التىن كۇز ەلىمىزدىڭ استاناسىن جارقىن رەڭككە بوياپ, اينالاسىن ەرەكشە قۋانىشقا بولەگەنى بەلگىلى. وقۋشىلار جىل سايىن كۇزگى دەمالىسىن اسىعا كۇتەدى. وسى ورايدا ەلوردالىق وقۋشىلاردىڭ كۇزگى دەمالىسىن قالاي وتكىزگەنىن ءبىلۋ ماقساتىمەن قالاداعى ءىرى ويىن-ساۋىق كەشەندەرىنە ارنايى بارعان ەدىك.
كۇزگى كانيكۋلدا ءار وقۋشى وزىنە قولايلى, جايلى ورىندى تاڭدايدى, كەيبىرى پارك پەن كينوتەاترعا, تەاترعا بارسا, كەيبىرى باسسەين مەن انتيكافەگە نەمەسە ويىن-ساۋىق كەشەنىنە بارادى. بۇدان بولەك, كوپتەگەن ءجاسوسپىرىم بوس ۋاقىتىن ءبىلىمىن ۇشتاۋ ءۇشىن ءوزىن دامىتۋعا ارنايدى.
اۋا رايىنىڭ سالقىنداۋىنا بايلانىستى وقۋشىلار دەمالىس ۋاقىتىن جىلى, جابىق جەردە وتكىزگەندى قالايدى. مىسالى, 5-سىنىپقا دەيىنگى وقۋشىلارعا بەلسەندى دەمالىس ۇنايدى. سوندىقتان دا ولار دەمالىستا اتا-اناسىمەن, دوستارىمەن Mega Silk Way, «حان شاتىر» سياقتى ءىرى ويىن-ساۋىق جانە ساۋدا-ساتتىق ورتالىعىنا ءجيى سوعىپ, Kango باتۋت پاركىنە, Mega مۇز ايدىنى مەن Chaplin كينوتەاترىنا جانە تاعى دا باسقا قىزىقتى جەرلەرگە باردى.
«حان شاتىر» ويىن-ساۋىق ورتالىعىندا بالالاردىڭ كوپ شوعىرلانعان Famecity, Sky Beach Club, Chaplin كينوتەاترى سياقتى الاڭدارى بار. كينوتەاتردا بالالار بيلەتى 1400-2000 تەڭگە ارالىعىندا, ال باسسەيننىڭ باعاسى 4-14 جاسقا دەيىنگى بالالار ءۇشىن – 7000 تەڭگە, ودان ۇلكەندەرگە بيلەت قۇنى – 12000 تەڭگە. سونداي-اق Sky Beach Club-تا ءارتۇرلى جەڭىلدىك بار. مىسالى, 3 جاسقا دەيىن بارلىعى تەگىن جانە كوپبالالى وتباسىعا تولىق كۇن ءۇشىن 50 پايىز جەڭىلدىك بەرىلگەن. «كۇزگى دەمالىستا جاي كۇندەرگە قاراعاندا بالالار سانى 60 پايىزعا ءوستى» دەيدى Sky Beach Club مامانى. ال Chaplin كينوتەاترى اكىمشىلىگى وسى مەزگىلدە وقۋشىلاردىڭ سانى 70-80 پايىزعا وسكەنىن ايتادى. Famecity ويىن الاڭىنداعى بالالار سانى 50 پايىزعا وسكەن.
Mega Silk Way ويىن-ساۋىق كەشەنىندەگى Kango باتۋت پاركىندە بارلىق ءتاريفتى جالپىلاما الساق, باعاسى 3700-67000 تەڭگە ارالىعىندا. بۇل الاڭدا 1 جاسار بالادان باستاپ ەرەسەكتەرگە دەيىن كوڭىل كوتەرە الادى. Happylon اتتراكتسيوندار الاڭىندا بالالار مەن وتباسىلارعا ۇسىنعان كوپتەگەن جەڭىلدىك بار. مىسالى, كوپبالالى وتباسى, قانشا اقشا سالسا دا, ونى 2 ەسە ەتىپ كارتاسىنا جۇكتەيدى. بۇل – وتە كەرەمەت ۇسىنىس. سونىمەن قاتار تۋعان كۇن يەسىنە ءار اتتراكتسيوندا 30 پايىز كولەمىندە جەڭىلدىك بەرىلەدى. ال Mega Chaplin كينوتەاترى وكىلىنىڭ ايتۋىنشا, وسى كەزدە وقۋشىلار سانى 75-80 پايىزعا ارتقان.
– قازىرگى كەزدە العا قويعان, كوزدەگەن ماقساتىم مەن ارمانىم – بيولوگيا مەن حيميانى وقىپ, جوعارى وقۋ ورنىنا ءتۇسۋ. نەگىزى, ءبىلىم الۋ پروتسەسىمە كوڭىلىم تولمايدى, سوندىقتان ءوزىمدى دامىتۋعا بارىنشا كۇش سالامىن. ماعان وسى كۇزگى دەمالىس ۇناپ جاتىر, سەبەبى ساباقتا مەنتالدى دەنساۋلىعىم ناشارلاپ كەتكەنىن سەزىپ ءجۇردىم, اسىرەسە باقىلاۋلاردا قاتتى كۇيزەلىس بولدى, دەمالىسقا شىعا سالا سونىمەن جۇمىس ىستەدىم. ينتروۆەرت بولعاندىقتان, قاتتى شۋلى جەردى جاقسى كورمەيمىن, ويىن-ساۋدا ورتالىقتارىنا كوپ بارا بەرمەيمىن, مەن ءۇشىن ۇيدە نوۋتبۋكپەن كينو كورىپ دەمالۋ – كەرەمەت دەمالىس, – دەيدى 10-سىنىپ وقۋشىسى گۇلميرا ماراتقىزى.
– وزىمە سۋرەت سالعان ۇناعاندىقتان, ۋاقىتىمدى وسىعان ارنايمىن جانە ويىن-ساۋىق كەشەنىنە بارىپ ءجۇرمىن. بوس ۋاقىتىمدا كىتاپحاناعا بارىپ, مەلودراما جانرىنداعى كىتاپتاردى وقىعاندى ۇناتامىن, – دەيدى 6-سىنىپ وقۋشىسى جانسايا قايرات.
IT سالاسىندا مىقتى مامان بولۋ ءۇشىن تالپىنىپ جۇرگەن 10-سىنىپ وقۋشىسى ابىلاي ايتجان دەمالىسىن جوعارى وقۋ ورنىنا ءتۇسۋ ءۇشىن دەپ بىرنەشە جوبا جاساپ, وسى سالادا تاعى باسقا پروگراممالاۋ ءتىلىن ۇيرەنىپ جۇرگەنىن ايتادى. ايتۋىنشا: «مەكتەپتەن بەرىلگەن وسى كۇزگى دەمالىستىڭ ارقاسىندا بىتپەي قالعان كوپتەگەن شارۋامدى, ياعني قانشاما ايگىلى IT ماماندارىمەن كەزدەسىپ, قازىر جاڭا ستارتاپتاردى باستاۋدى كوزدەپ وتىرمىن» دەيدى بولاشاق IT مامانى.
گۇلنازىك بالتابەك – نازارباەۆ زياتكەرلىك مەكتەبىنىڭ 9-سىنىپ وقۋشىسى. كۇزگى كانيكۋلدا ءبىلىمىن شىڭداپ, كوپ كىتاپ وقىپ, ءوزىن-ءوزى دامىتىپ, الداعى وليمپيادالارعا دايىندالۋ ۇستىندە.
وسى دەمالىستا ءبىر بايقاعانىمىز – ەلوردادا انتيكافە سانى كۇن ساناپ كوبەيۋدە. انتيكافە – كوبىنەسە جاسوسپىرىمدەرگە ارنالعان, ياعني كافەنىڭ ىشىندە قانشاما ويىن-ساۋدا نەمەسە ءارتۇرلى جانرداعى كىتاپتارمەن بىرگە بالالاردىڭ كوڭىلىن كوتەرەتىن كافە (مىسالى, JJ-Room, Gotham جانە ت. ب.). وعان باراتىن وقۋشىلار قاتارى كوپ.
وسىلايشا, كۇزگى كانيكۋلدى ءار وقۋشى ارقالاي وتكىزۋ ۇستىندە. دەمالىستا بالالار مەنتالدى جانە فيزيكالىق تۇرعىدان دەمالىپ جاتقانىن بايقادىق.
اياۋلىم ميرەحان,
اقسەلەۋ سەيدىمبەك اتىنداعى №54 مەكتەپ-ليتسەيدىڭ 10-سىنىپ وقۋشىسى
