تاۋەلسىزدىك سارايىندا «رۋحاني جاڭعىرۋ» باعدارلاماسى اياسىندا استانانىڭ 20 جىلدىعىنا ارنالعان «اقاناەۆتار اۋلەتى» اتتى كورمە اشىلدى. ونىڭ اشىلۋ سالتاناتىنا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ, استانا قالاسى اكىمىنىڭ ورىنباسارى ەرمەك امانشاەۆ قاتىستى.
اۋلەتتىڭ ۇلكەنى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى, قازاقستان رەسپۋبليكاسى كوركەمونەر اكادەمياسىنىڭ پرەزيدەنتى اماندوس اقاناەۆ بيىل مەرەيلى جەتپىس جاستىڭ جوتاسىنا شىعىپ وتىرسا, ونىڭ شىعارماشىلىعىنا جارتى عاسىر تولىپ وتىر. اتالمىش كورمە قىلقالام شەبەرىنىڭ ومىرىندەگى وسى ايتۋلى داتالارعا دا ارنالدى.
كورمەگە بەينەلەۋ ونەرىنىڭ ءارتۇرلى جانرىنداعى, «عارىش», «تاريح», «تابيعات», «كوشپەندىلەر», «ەجەلگى اڭىزدار» تاقىرىپتارىن قامتىعان 150-دەن استام كارتينا قويىلدى. سونىڭ ىشىندە «مەنىڭ زامانداستارىم» اتتى جانرلىق پورترەتتەر توپتاماسى ۇلكەن ورىن الادى. بۇعان 20-دان اسا كارتينا ەنگەن. سونىڭ ىشىندە ەلباسىدان باستاپ, ونەر, ءبىلىم, عىلىم, ادەبيەت سالالارىنا ولشەۋسىز ۇلەس قوسقان تۇلعالاردىڭ پورترەتتەرى بار. اتاپ ايتساق, بەلگىلى سىنشى ساعات اشىمباەۆتىڭ, اقىن جاراسقان ءابدىراشۇلىنىڭ, مەملەكەت قايراتكەرى ماقسۇت نارىكباەۆتىڭ, ت.ب. بەلگىلى ادامداردىڭ بەينەلەرى كەسكىندەلگەن. سۋرەتشى اتالمىش جوباعا ون جىلدان استام ۋاقىتىن جۇمسادى. الدا تاعى بۇل جۇمىستى جالعاستىرماق.
تاۋەلسىزدىك سارايىنا اماندوس اقاناەۆتىڭ جانە ونىڭ وتباسى مۇشەلەرىنىڭ تۋىندىلارىمەن قوسا قىتاي سۋرەتشىلەر وداعىنىڭ مۇشەسى سيۋي ءينليدىڭ دە كارتينالارى قويىلدى.
ەكسپوزيتسيا كەنەپكە سالىنعان كارتينالاردان, كوللاج, رەلەفتى كەسكىندەمە, گرافيكا, قابىرعاداعى سۋرەتتەردىڭ نوبايلارى جانە ينستاللياتسيالاردان تۇرادى.
سۋرەتشى اقاناەۆتار اۋلەتىنىڭ قالىپتاسقانىنا كوپ جىل بولدى. ونىڭ باسىندا اماندوس اقاناەۆ پەن قازاقستاننىڭ ەڭبەك سىڭىرگەن قايراتكەرى نەللي بۋبە تۇر. بالالارى رۋسلاننىڭ, بوتاگوزدىڭ, ەسكەندىردىڭ كارتينالارى دا قازاقستاندا جانە شەتەلدە تانىمال. نەمەرەلەرى اسپارۋح, مۇحيت, رادا, گلەب, الەكساندرا جانە مۇحيتتىڭ زايىبى دارينا دا شىعارماشىلىقپەن اينالىسادى. ولاردىڭ تۋىندىلارى دا وتباسىلىق كورمەلەردە كوپشىلىك نازارىنا ۇسىنىلدى.
«اقاناەۆتار اۋلەتى» كورمەسى 9 تامىزعا دەيىن جالعاسادى.
