قوعامدىق كولىكتەگى جولاقىنى كوتەرۋ, كوندۋكتورلاردى جۇمىستان بوساتۋ جانە سارالانعان تاريف ەنگىزۋ ماسەلەلەرى حالىقتى ءبىراز دۇرلىكتىرگەن بولاتىن. كەشە استانا قالاسى قوعامدىق كەڭەسى ۇيىمداستىرعان تىڭداۋ كەزىندە «استانا LRT» جشس باسقارما توراعاسى بەكمىرزا يگەنبەردينوۆ جاڭا جۇيە تۋرالى بايانداپ بەردى.
جاڭا جۇيەگە سايكەس, قالاداعى اۆتوبۋستاردا كوندۋكتورلار بولمايدى. «سارالانعان ءتاريفتى ەنگىزگەن ساتتەن باستاپ مىڭداعان كوندۋكتورلار بوسايدى. ءوز جۇمىسىن بىلەتىن بىلىكتى ماماندار اۆتوبۋس پاركىنىڭ باقىلاۋ جەلىسىنە نەمەسە كولىك باقىلاۋ قىزمەتىنە اۋىستىرىلادى. مۇنى شامامەن شىلدەنىڭ سوڭىنا دەيىن جۇزەگە اسىرامىز» دەدى «استانا LRT» كومپانياسىنىڭ باسشىسى.
بەكمىرزا يگەنبەردينوۆ جول ءجۇرۋ قۇنى Astra plat كارتاسىمەن تولەۋ كەزىندە 90 تەڭگە بولىپ قالاتىنىن ايتتى. ال كولىك كارتاسىن ساتىپ العىسى كەلمەيتىندەر اۆتوبۋس جۇرگىزۋشىسىنە – 180 تەڭگە, ال ەكسپرەسس باعدار ءۇشىن 250 تەڭگە تولەۋى ءتيىس. قوعامدىق كولىكتە جەڭىلدىكپەن جۇرەتىن ازاماتتار ءماسليحات بەكىتكەندەي سول قالپى قالادى. ەسكەرۋ كەرەك, اۆتوبۋستاعى ۆاليداتور ىستەن شىققان جاعدايدا, جولاۋشى تەگىن جۇرۋگە قۇقىلى.
بۇگىنگى تاڭدا 218 مىڭنان استام جولاۋشى اتاۋلى كولىك كارتاسىن پايدالانادى. Astra plat كولىك كارتاسىن استانالىقتار ارنايى كاسسالاردان ساتىپ الا الادى. ول ءۇشىن قالادا 6 كاسسا جانە 30 اۆتومات ورناتىلعان. سونداي-اق, جاقىن ارادا كولىكتىك كارتالارىن Qiwi, Kaspi.kz تەرمينالدارى جانە ينتەرنەت-بانكينگ ارقىلى تولتىرۋ مۇمكىندىگى پايدا بولادى.
