2008 جىل. قاڭتار. ارقانىڭ ساقىلداعان سارى ايازى بۋىپ تۇر. اۋىر ناۋقاستان ايىعا الماعان جايلاۋ اعامنىڭ جۇرەگى سوعۋىن توقتاتتى. داۋاسىز دەرت ولىمگە اپاردى. ومىرلىك جارى – قاماش جەڭگەم مەن ۇلى جومارتىن تاستاپ, 45 جاسىندا باقيلىق بولدى. اۋىر قازا اقشي اۋىلىنداعى تىلەۋباي اۋلەتىن قاتتى ەسەڭگىرەتىپ تاستادى. حالىق قايعىعا ورتاقتاسىپ, قاڭتاردىڭ قاقاعان ايازىنا قاراماستان ك-700 تراكتورىنىڭ دوڭعالاعىن جاعىپ, جەرلەيتىن جەردى دايىندادى. سول قىستىڭ سۋىعى ءالى ەسىمنەن كەتپەيدى. جەرلەۋ ءراسىمىن, قوناقاسىن وتكىزىپ, اۋلەتىمىزبەن ەندى ەسىمىزدى جيا بەرگەندە بالقاش قالاسىنان سۋماڭداعان سۋىق حابار جەتتى. وي, دۇنيە-اي! جايلاۋ اعامنىڭ قازاسىنا ءبىر اي تولماي, ۇلكەن اعام سايلاۋ دۇنيەدەن وزىپتى. اجالعا وندىرىستەگى قايعىلى وقيعا سەبەپ بولعان. ونسىز دا قايعىدان كوكىرەگى قارس ايرىلعان اكە-شەشەم, قۇرال اعام, اۋىلداس اعايىندارمەن بىرگە ءبىر اۆتوبۋسقا ءمىنىپ, بالقاشقا اتتاندىق.
كولدىڭ جاعاسىنداعى شاعىن قالا كۇڭىرەنىپ قارسى الدى. سايلاۋ اعام 13 جىل قالالىق تەتس-تە تراكتورشى-بۋلدوزەرشى بولىپ جۇمىس ىستەدى. وتە ەڭبەكقور, كاسىبىنە ادال جان ەدى. قۇدايدىڭ جازۋىنا امال بار ما, اعام تراكتوردىڭ شىنجىر تابانىنا قۇلاپ, مەرت بولىپتى. مۇنى ەستىگەندە ءوز قۇلاعىمىزعا ءوزىمىز سەنبەدىك. تراكتوردى ۇرشىقشا يىرەتىن ماماننىڭ ءولىمى نەگە تەحنيكادان بولعان؟ ونى جان بالاسى ءتۇسىندىرىپ بەرە المادى. بالقاش بىرنەشە كۇن جىلۋسىز قالدى. بۇرسەڭ قاققان ەل. قارا جامىلعان شاڭىراق. مۇندايدى كورگەن ادام قاتتى شوشيتىن ەدى. باسقا سالسا – باسپاقشىل. بىرىنەن سوڭ ءبىرى كەلگەن اۋىر قازا اسىرەسە, اكەم مەن انامنىڭ جان-جۇرەگىن جانشىپ, كۇيىكتىڭ وتىنا اياۋسىز كۇيدىردى. بالاسىن جوقتاپ اڭىراعان انا, جارىنان ايرىلىپ بوزداعان ايەل, اكەسىن جوقتاپ جىلاعان بالانىڭ داۋسى ساي-سۇيەگىڭدى سىرقىراتادى. قارالى اقپان ەسىمنەن كەتپەيدى. كول جاعاسىنداعى قالادا ءۇشىنشى كۇنى اياعىمىزداعى اياق كيىمىمىزدى شەشە المادىق. قالا باسشىلىعى مەن تەتس اكىمشىلىگى قاتتى داعداردى. اعامنىڭ قازاسى كۇللى بالقاشتىقتاردىڭ ارقاسىنا ايازداي باتتى. مارقۇمنىڭ دەنەسىن اق ماتاعا وراپ, قارا جەردىڭ قوينىنا تاپسىردىق. اللا مۇنداي اۋىر سىناقتى جان بالاسىنىڭ باسىنا بەرمەسىن دەپ تىلەيمىن.
اسقار تاۋداي اكەمىز ءزارۋباي تىلەۋبايۇلى مەن ءمولدىر بۇلاقتاي انامىز تىلەۋجان دوسىمبەكقىزى 9 پەرزەنتىن قاناتتىعا قاقتىرماي, تۇمسىقتىعا شوقىتپاي ءوسىردى. وكىنىشتىسى, اكەمنىڭ الدىندا قوس قۇلىنى, انامنىڭ الدىندا ءۇش بالاسى باقيلىق بولدى. ءبىرى 45, ەكىنشىسى 48 جاسىندا ومىردەن وزعان قوس اعامدى بۇگىن ساعىنىشپەن ەسكە الامىز. ەڭبەكقور, مەيىربان, ادال, باۋىرمال اعالارىمنىڭ ورنى ۇڭىرەيىپ تۇر. سايلاۋ اعامنىڭ كوزىنىڭ نۇرى, ءۇش جاۋقازىنى ء(ۇش قىزى) جايقالىپ ءوستى. جايلاۋ اعامنىڭ ارتىندا قالعان تۇياعى – جومارتىمىز جىگىت بولىپ قالدى. باۋىر ەتى بالالارىنىڭ ومىرلىك قىزىعىن كورە الماعانى جانعا باتادى. الاتاۋداي اعالارىمنىڭ ارمانى كوپ ەدى. جالعان دۇنيەدە سەندەر كورمەگەندى رايا جانە قاماش جەڭگەلەرىم, ارتتا قالعان بارلىق ۇرپاقتارىڭ كورسىن! رۋحتارىڭ پەيىشتىڭ تورىندە شالقىسىن!
مارقۇمداردىڭ قايتىس بولعانىنا 10 جىل وتۋىنە وراي 2018 جىلى 29 ماۋسىمدا ساعات 12.00-دە بالقاش قالاسىندا اس بەرىلەدى.
