«اۋىل» پارتياسىنان قر پارلامەنتىنىڭ ءماجىلىسى دەپۋتاتتىعىنا كانديداتتار قايرات ايتۋعانوۆ, نيكولاي ارسيۋتين, سەرىك ەگىزباەۆ, رابيعا توقسەيىتوۆا, سوفيا ابدىرازاقوۆا قازاقستاننىڭ سولتۇستىگىندەگى ءۇش وبلىستى اۋىزسۋمەن قامتاماسىز ەتىپ وتىرعان «ەسىل سۋ» رمك ۇجىمىمەن كەزدەستى.
قۇرامىنا بۋلاەۆ, ەسىل, سوكولوۆ, پرەسنوۆ توپتىق سۋ قۇبىرى كىرەتىن «ەسىل سۋ» رمك سولتۇستىك قازاقستان, اقمولا, قوستاناي وبلىسىنىڭ 250-گە جۋىق ەلدى مەكەنىن, 200 مىڭعا جۋىق تۇرعىنىن اۋىزسۋمەن قامتاماسىز ەتەدى. جيىندا ءسوز سويلەگەن ءماجىلىس دەپۋتاتتىعىنا كانديداتتار الەمدىگى تازا سۋ تاپشىلىعى جايلى جالپى مالىمەت كەلتىرىپ, اتالعان ءۇش ءوڭىر حالقىن تىرشىلىك نارىمەن قامتاماسىز ەتىپ وتىرعان كاسىپورىن قىزمەتكەرلەرىنىڭ جۇمىسىن ەرەن ەڭبەك دەپ باعالادى.
– بۇۇ-نىڭ مالىمەتى بويىنشا, الەم حالقىنىڭ جارتىسىنا جۋىعى سۋ تاپشىلىعىن سەزىنەدى. سونىڭ ىشىندە, اسىرەسە, تازا اۋىزسۋ ماسەلەسى وزەكتى. ساراپشىلاردىڭ ايتۋىنشا, جەر بەتىندە 780 ميلليوننان استام ادام تازا اۋىزسۋعا قول جەتكىزە الماي وتىر. ال 1,7 ميلليارد ادام تۇششى سۋ كوزدەرىنە ءزارۋ. الەمدە جىل سايىن تازا سۋدىڭ جوقتىعىنان, سونىڭ سالدارىنان بولاتىن انتيسانيتاريادان مىڭداعان ادام كوز جۇمادى. ەلىمىزگە كەلەر بولساق, 2025 جىلعا دەيىن قالالار 100 پايىز, ەلدى مەكەندەر 80 پايىزعا اۋىزسۋمەن قامتىلماق. بۇل – سىزدەردىڭ جانە سىزدەردىڭ ارىپتەستەرىڭىزدىڭ ەرەن ەڭبەگىنىڭ ارقاسى. سىزدەر تارتقان سۋ قۇبىرى الەم بويىنشا تارتىلعان ەڭ ۇزىن سۋ قۇبىرى رەتىندە گيننەستىڭ رەكوردتار كىتابىنا كىردى. «اۋىل» پارتياسىنىڭ باستى ماقساتتارىنىڭ ءبىرى – سىزدەردەي ەڭبەك ادامىنا دەگەن قۇرمەتتى قايتارۋ. ءبىز تەك سىزدەرمەن عانا ەلىمىزدى يندۋستريالدى-اگرارلىق دەرجاۆاعا اينالدىرامىز جانە سول ارقىلى باقۋاتتى اۋىل, دامىعان قالا مەن قۋاتتى مەملەكەت قالىپتاستىرامىز, – دەدى «اۋىل» پارتياسى اتىنان ءماجىلىس دەپۋتاتتىعىنا كانديدات قايرات ايتۋعانوۆ.
