«ايالاعان استانا» سەرپىن بەردى
استانا قالاسى اكىمدىگى مەن رەسەيدىڭ «ارس» كومپانياسى بىرلەسىپ ەلوردانىڭ 15 جىلدىق مەرەيتويى قۇرمەتىنە ۇيىمداستىرعان رەسپۋبليكالىق «ايالاعان استانا» بالالار بايقاۋى قازاقستاندىقتار ءۇشىن كەرەمەت سىيلىق بولدى. بۇل بايقاۋدا ەلىمىزدىڭ بارلىق ايماقتارىنان 950-دەن استام ۇمىتكەر باق سىناپ, ونەرلەرىن كورسەتكەن.
مۋزىكالىق جارىستىڭ سوڭىندا قازاقستاندىق جانە رەسەيلىك ەسترادانىڭ حاس شەبەرلەرى – روزا رىمباەۆا, نۇرلان ابدۋللين, بايعالي سەركەباەۆ, دومينيك دجوكەر جانە باسقا دا ادامدار باعالاعان بايقاۋدىڭ جەڭىمپازدارى انىقتالدى. ناتيجەسىندە استانا قالاسى اكىمىنىڭ جۇلدەسى جاھانگەر جۇماباەۆقا بۇيىرسا, «ايالاعان استانا» تەلەۆيزيالىق بايقاۋىنىڭ باس جۇلدەسى – گران-پري كوكشەتاۋدان كەلگەن ون ءۇش جاسار بولات باتىرباەۆقا تاپسىرىلدى. ەندى ول حالىقارالىق «ارتەك» لاگەرىندە وتەتىن «بالالار جاڭا تولقىنى-2013» حالىقارالىق بايقاۋىندا ەلىمىزدىڭ نامىسىن قورعايتىن بولادى.
گران-پري يەگەرىن جولعا شىعار الدىندا ءتىلشىمىز از-كەم اڭگىمەگە تارتقان. ول دودادا ءوزىنىڭ باعاسىن كوتەرگەن جاياۋ مۇسانىڭ «اق سيسا» ءانى ەكەنىن ماقتانىشپەن ايتادى.
«ناعاشى جۇرتىم شەتىنەن جەزتاڭداي انشىلەر. سولاردان جۇعىستى بولسا كەرەك, كىشكەنە كەزىمنەن ءان سالدىم. «ايالاعان استانا» بايقاۋى ماعان سەرپىن مەن شابىت سىيلادى. ارينە, مۇندا باعىم جانىپ, باس جۇلدەنى قانجىعالايمىن دەپ ويلاعان جوق ەدىم. ويتكەنى, باسەكەلەستەرىمنىڭ ءبارى كۇمىس كومەيلەر. دەسە دە, حالىق ءاندەرىن جان-جۇرەگىممەن ورىندايمىن. سول قىرىم كورەرمەندەر مەن قازىلاردىڭ وڭ باعاسىن الدى. الداعى حالىقارالىق ءان جارىسىندا دا ەل نامىسىن بار جىگەرىممەن قورعاۋعا سەرت بەرەمىن» دەيدى جاس ءانشى.
شاحناز اسحاتقىزى