استانا اكىمى باقىت سۇلتانوۆ ۇكىمەت وتىرىسىندا ەسەپ بەرىپ, كەيبىر ازىق-تۇلىك تاۋارلارىنىڭ باعاسىنىڭ ءوسۋى ماۋسىمدىق سيپات الىپ وتىرعانىن مالىمدەدى. قالا باسشىسى ەلوردادا دەمالىس كۇندەرى وتكىزىلەتىن اۋىل شارۋاشىلىعى جارمەڭكەسى جەمىس-جيدەكتەردىڭ باعاسىن ارزانداتۋعا ىقپال ەتكەنىن اتاپ ايتتى. سەيسەنبى كۇنى ۇكىمەت ۇيىندە پرەمەر-مينيستر باقىتجان ساعىنتاەۆتىڭ توراعالىعىمەن وتكەن وتىرىستا 2018 جىلدىڭ 9 ايىنداعى ينفلياتسيا دەڭگەيى جانە الەۋمەتتىك ماڭىزى بار ازىق-تۇلىك تاۋارلارى باعاسىن وسىرمەۋ باعىتىندا جاسالىپ جاتقان ءىس-شارالار باياندالدى.
قازاقستانداعى جىلدىق ينفلياتسيا 6%-عا ءوستى
جىل باسىنان بەرى قازاقستانداعى ينفلياتسيا دەڭگەيى 6,1 پايىزدىق كورسەتكىشكە ءوستى. بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترىنىڭ ءبىرىنشى ورىنباسارى رۋسلان دالەنوۆ حابارلادى. «بىرقاتار وڭىردە باعا ورتاشا رەسپۋبليكالىق دەڭگەيدەن اسىپ ءتۇستى. بۇل جاعداي ماڭعىستاۋ, اتىراۋ, پاۆلودار وبلىستارىندا, استانا, الماتى, شىمكەنت قالالارىندا بايقالادى» دەدى ر.دالەنوۆ. ونىڭ ايتۋىنشا, قازىر الەۋمەتتىك ماڭىزى بار ازىق-تۇلىكتەردىڭ تىزىمىنە 19 (ۇن, نان, ماكارون, قاراقۇمىق, كۇرىش, كارتوپ, ءسابىز, پياز, قىرىققابات, قانت, كۇنباعىس مايى, سارى ماي, سيىر ەتى, تاۋىق ەتى, ءسۇت, ايران, جۇمىرتقا, تۇز, سۇزبە) ءونىم كىرەدى. 2018 جىلدىڭ 9 ايىندا وسى تاۋارلاردىڭ باعاسى 0,7%-عا ءوسىپتى. بىرقاتار تاۋار بويىنشا شەكتەۋلى باعا 15%-عا دەيىن قىمباتتاعان. مۇندايدا ساۋدا قىزمەتى سالاسىنداعى زاڭناماعا سايكەس, كەشەندى ءىس-شارالار جۇزەگە اسىرىلادى. سونىڭ ءبىرى – تۇراقتاندىرۋ قورىنداعى رەزەرۆتى پايدالانۋ.
ۇلتتىق ەكونوميكا مينيسترلىگىنىڭ مالىمەتتەرى بويىنشا, قىركۇيەك ايىندا ينفلياتسيا دەڭگەيى 0,4%-دى قۇراعان. جالپى تۇراقتى احۋالعا قاراماستان, كەيبىر تاۋارلاردىڭ باعاسى ايتارلىقتاي ءوسىپ بارادى. جىلدىق ولشەممەن العاندا قارقىندى ءوسىم تومەندەگى تاۋارلار مەن قىزمەت تۇرلەرى بويىنشا بايقالىپ وتىر:
ديزەلدى وتىن – 38,2%-عا;
قىزىلشا – 18,3%-عا;
قالا ماڭىنداعى جول اقىسى – 18,1%-عا;
قىرىققابات – 16,7%-عا;
تاس كومىر – 15,2%-عا.
سونىمەن قاتار, ينفلياتسيانىڭ ۇلعايۋىنا مىناداي تاۋارلاردىڭ قۇنىنىڭ ءوسۋى اسەر ەتتى: مىسالى, كومىر – 15,2%-عا, اي-92 ماركالى جانارماي – 5,7%-عا, ديزەلدىك وتىن 38,2%-عا قىمباتتادى. وڭىرلىك بولىنىستە ينفلياتسيانىڭ ورتاشا رەسپۋبليكالىق دەڭگەيىنەن مىناداي وبلىستار مەن قالالار اسىپ وتىر. ماڭعىستاۋ وبلىسى – 4,1%, اتىراۋ وبلىسى – 3,9%, پاۆلودار وبلىسى – 3,4%, استانا قالاسى – 3,8%, شىمكەنت قالاسى – 3,5%, الماتى قالاسى – 3,4%.
«باعانىڭ ءوسۋى ماۋسىمدىق سيپات الىپ وتىر…»
ۇكىمەت باسشىسى باقىتجان ساعىنتاەۆ ازىق-تۇلىك ونىمدەرىنىڭ باعاسى قىمباتتاعان وڭىرلەردىڭ اكىمدەرىنە ءسوز بەرىپ, باعانى وسىرمەۋ ءۇشىن قانداي ءىس-شارالار جۇرگىزىپ جاتقانىن سۇرادى. استانا اكىمى باقىت سۇلتانوۆ كەيبىر ازىق-تۇلىك تاۋارلارىنا باعانىڭ ءوسۋى ماۋسىمدىق سيپات الىپ وتىرعانىن ءمالىم ەتتى. باقىتجان ساعىنتاەۆ قالانىڭ تۇراقتاندىرۋ قورىنىڭ شوتىندا 1,5 ملرد تەڭگەنىڭ يگەرىلمەي جاتقانىن ايتتى. «قازىرگى كەزدە تۇراقتاندىرۋ قورىنىڭ كولەمى 940-تان 770 تونناعا دەيىن تومەندەدى. ءبىز ءاربىر پايىزدىق وسىمگە تالداۋ جاسادىق. بارلىق وڭىرلەردە باعانىڭ ءوسۋى ماۋسىمدىق سيپاتقا يە بولۋدا. قوسىمشا ءىس-شارالاردى قولعا الامىز. ەلوردانىڭ تۇراقتاندىرۋ قورىندا 1,5 ملرد تەڭگە بار. ماسەلەن, ساۋدا-ساتتىقپەن اينالىساتىن ۇيىمدارعا 25 ءونىم تۇرلەرى بويىنشا پايىزسىز نەسيەلەر بەرەمىز. سونىڭ ناتيجەسىندە باعالاردى تۇراقتاندىرامىز» دەپ جاۋاپ بەردى باقىت سۇلتانوۆ.
ەلوردا اكىمى وتكەن ايمەن سالىستىرعاندا كوكونىس ونىمدەرى باعاسىنىڭ ارزانداعانىن مالىمدەدى. بۇعان ءار دەمالىس كۇندەرى وتكىزىلەتىن وڭىرلەردىڭ اۋىل شارۋاشىلىعى جارمەڭكەسى وڭ ىقپال ەتىپتى. باقىت تۇرلىحانۇلى اۋىل شارۋاشىلىعى جارمەڭكەلەرىنىڭ ازىق-تۇلىك باعالارىن تۇراقتاندىرۋعا ىقپالى زور ەكەنىن اتاپ ايتتى. ونىڭ ايتۋىنشا, تەك قانت پەن كۇرىشتىڭ باعاسى 21%-عا ءوسىپتى. ۇكىمەت وتىرىسىندا ءسوز سويلەگەن اۋىل شارۋاشىلىعى ءمينيسترىنىڭ ءبىرىنشى ورىنباسارى ارمان ەۆنيەۆ قۇزىرلى ۆەدومستۆونىڭ اتىنان قولدا بار قاراجاتتى بارلىق وڭىرلەرگە 10 مىڭ تونناعا دەيىن قانت ساتىپ الۋعا جۇمساۋ تۋرالى ۇسىنىس ايتتى. جيىندى قورىتىندىلاعان ۇكىمەت باسشىسى باقىتجان ساعىنتاەۆ: «بۇل جۇمىستاردىڭ بارلىعى اكىمدەردىڭ تۇراقتى باقىلاۋىندا بولۋى ءتيىس. مونيتورينگتى كۇشەيتىپ, قاجەت بولعان جاعدايدا بارلىق رەسۋرستاردى جىلدام ىسكە قوسۋدى تاپسىرامىن» دەدى.
