جالپىۇلتتىق سوتسيال-دەموكراتيالىق پارتياسى اتىنان ۇسىنىلعان ۇمىتكەر نۇرلان اۋەسباەۆ اقمولا وبلىسى قوسشى قالاسىنا سايلاۋالدى ناۋقانمەن كەلدى.
قوسشى وتكەن جىلى قالا مارتەبەسىن الدى. بۇگىندە مۇندا 65 مىڭعا جۋىق ادام تۇرادى. دەسە دە, ەلدى مەكەندە شەشىمىن تاپپاي جۇرگەن بىرقاتار ماسەلەلەر بار. جەرگىلىكتى جىلىتۋ قازاندىعى كوڭىل كونشىتپەيدى, تۇرعىن ءۇي مەن بيزنەس نىساندارىن ەلەكترلەندىرۋگە قاتىستى ماسەلەلەر بار, جول جاعدايىنا كەلەر بولساق, ورتالىق كوشەلەردىڭ ءوزى جوندەۋدى تالاپ ەتەدى.
ساپار بارىسىندا نۇرلان اۋەسباەۆ قوسشى كوشەلەرىمەن ءجۇرىپ ءوتىپ, تۇرعىندارمەن سويلەستى. پرەزيدەنتتىككە ۇمىتكەر اتاپ وتكەندەي, قالادا ءبىر جىل ىشىندە ماسەلەلەر كوبەيمەسە, ازايماعان.
ۇمىتكەردىڭ پىكىرىنشە, قيىندىقتاردىڭ باستى سەبەبى – جۇيەلى جۇمىستىڭ جۇرگىزىلمەۋىندە جانە شەنەۋنىكتەردىڭ نەمقۇرايلىلىق تانىتۋىندا.
كەيىن پرەزيدەنتتىككە ۇمىتكەر قالالىق مادەنيەت ۇيىندە تۇرعىندارمەن كەزدەسۋ وتكىزىپ, حالىقتى مەملەكەتتى باسقارۋدىڭ پارلامەنتتىك-پرەزيدەنتتىك نىسانىنا كوشۋدى جەدەلدەتۋدى ۇسىناتىن ءوزىنىڭ سايلاۋالدى باعدارلاماسىمەن تانىستىردى.
– پارلامەنتتى كۇشەيتۋ, سەناتتى تاراتۋ جانە سول ارقىلى ماجىلىسمەندەردىڭ سانىن كوبەيتۋ كەرەك. ودان بولەك, ءماجىلىس قۇرامىنىڭ 50%-ىن ءبىر مانداتتىق وكرۋگتاردان قۇرۋ قاجەت. بۇل ناعىز حالىقتىق باقىلاۋدى قامتاماسىز ەتۋگە مۇمكىندىك بەرەدى. جانە وسىنىڭ ارقاسىندا ينفراقۇرىلىمدى دامىتۋعا بولىنەتىن قاراجات نىسانالى ماقساتقا جۇمسالاتىن بولادى, – دەدى نۇرلان اۋەسباەۆ.
