1 قىركۇيەكتە ەلوردادا «نازار اۋدارىڭىز: بالالار!» جەدەل-الدىن الۋ شاراسى باستالدى. رەيد 1-30 قىركۇيەك ارالىعىندا وتەدى.
قالالىق پوليتسيا دەپارتامەنتى ءمالىم ەتكەندەي, وقۋ جىلىنىڭ باستالۋىنا وراي پوليتسەيلەر مەكتەپتەر ماڭىنداعى جول بەلگىلەرى مەن جاياۋ جۇرگىنشىلەر جولاقتارىن تەكسەرىپ شىققان. «قازىرگى كەزدە 91 مەكتەپ, 100-دەن استام بالاباقشا مەن شاعىن ورتالىق, 42 كوللەدج ماڭىنا تەكسەرىستەر جۇرگىزىلدى. انىقتالعان كەمشىلىكتەردى جويۋ بويىنشا ءتيىستى مەكەمەلەرگە حاتتامالار جىبەرىلدى. سونىمەن قاتار, وقۋشىلاردى تاسىمالدايتىن مەكتەپ اۆتوبۋستارى تەكسەرىلدى» دەيدى اتالعان ۆەدومستۆو وكىلدەرى.
سونداي-اق يۋۆەنالدىق جانە اكىمشىلىك پوليتسيا قىزمەتكەرلەرى بالالار مەن اتا-انالار ءۇشىن پروفيلاكتيكالىق ءىس-شارالار وتكىزەدى, جول ءجۇرۋ ەرەجەلەرىنىڭ بۇزىلۋىن بولدىرماۋ ماقساتىندا رەيدتەر ۇيىمداستىرادى. ايتا كەتەيىك, شاھاردا وسى جىلدىڭ جەتى ايى ىشىندە كامەلەتكە تولماعان بالالارعا قاتىستى 67 جول-كولىك وقيعاسى بولعان. سونىڭ سالدارىنان 3 بالا مەرت بولىپ, 70-ءى ءتۇرلى دەڭگەيدە دەنە جاراقاتىن العان. ال بالالاردىڭ كىناسىنەن بولعان 37 جول-كولىك اپاتى تىركەلگەن.
