كونستيتۋتسيا كۇنى جۋرناليستەر قاۋىمى ءۇشىن سپورت مەرەكەسىنە دە اينالدى. قر پرەزيدەنتىنىڭ ءباسپاسوز قىزمەتى ۇيىمداستىرعان فۋتبول جارىسىنا رەسپۋبليكانىڭ تۇپكىر-تۇپكىرىنەن 25 كوماندا كەلىپ قاتىستى.
جارىستىڭ اشىلۋ سالتاناتىنا قاتىسقان قر مادەنيەت جانە سپورت ءمينيسترى توتى رايىمقۇلوۆا مەن نۇر-سۇلتان قالاسىنىڭ اكىمى التاي كولگىنوۆ تۇڭعىش رەت ۇيىمداستىرىلىپ وتىرعان پرەزيدەنت كۋبوگىنا قاتىسۋشىلاردى كونستيتۋتسيا كۇنىمەن قۇتتىقتاپ, جاسىل الاڭداعى ويىندارىنا ساتتىلىك تىلەدى. مەملەكەتتىك ءانۇرانىمىز شىرقالعاننان كەيىن «جان الىپ, جان بەرىسكەن» ويىندار باستالىپ كەتتى.
الدىمەن توپتىق ويىندار ءوتتى. ودان سۋىرىلىپ شىققاندار پلەي-وففقا قاتىسىپ, جەڭگەندەر شيرەك فينالعا ءوتتى. تۇركىستان وبلىسىنىڭ جۋرناليستەر قۇراماسى, الماتى قالاسىنىڭ «اپورت» جانە پرەزيدەنت اكىمشىلىگى كوماندالارى العاشقى ويىنداردان-اق جۇلدەگە تالاساتىندارىن اڭعارتىپ ۇلگەرگەن-ءدى. ال كوپشىلىك جانكۇيەر «حابار», «ەلوردا اقپارات», «ەگەمەن قازاقستان», «ەلارنا» كوماندالارىنا جارىستىڭ باس جۇلدەسىن الدىن الا ۇلەستىرىپ قويعان ەدى. الايدا جاسىل الاڭداعى ويىنداردا كۇتپەگەن كورسەتكىشتەر تىركەلىپ جاتتى.
سونىمەن كۇنى بويى بولعان ويىنداردا شەبەرلىك تانىتقان «حابار» مەن «حابار 24», «قازسپورت» پەن «ەگەمەن قازاقستان» جارتىلاي فينالعا شىقتى. تارتىستى ويىنداردا العاشقىلاردىڭ جولى بولىپ, اقتىق سىنعا جولداما الدى. ءۇشىنشى ورىن ءۇشىن وتكەن كەزدەسۋدە «حابار 24» «ەگەمەندىكتەردى» ۇتىپ, 300 مىڭ تەڭگەنى قانجىعاسىنا بايلادى. ال وسى تۋرنيردە كۇتپەگەن تابىسقا كەنەلگەن «قازسپورت» كومانداسىن تىزە بۇكتىرگەن «حابار» كومانداسى 1 ملن 500 مىڭ تەڭگەنىڭ سەرتيفيكاتىن يەلەندى. «سپورتشىلار» بولسا 700 مىڭ تەڭگە ولجالادى. بىرنەشە ۇزدىك ويىنشىلارعا دا قارجىلاي جۇلدە بەرىلدى.
سونىمەن قازاقستان رەسپۋبليكاسى پرەزيدەنتىنىڭ كۋبوگى ءۇشىن وتكەن تۋرنير مارەسىنە جەتتى. جۋرناليستەر قاۋىمى وسى جارىستىڭ ءداستۇرلى بولۋىنا تىلەكتەستىك ءبىلدىردى.
