وتكەن بەيسەنبى كۇنى بايقوڭىر عارىش ايلاعىنىڭ گاگارين ستارت الاڭىنان ۇشىپ شىققان «سويۋز مس-10» كەمەسى اۋەگە كوتەرىلگەن سوڭ ساناۋلى ۋاقىتتان كەيىن اپاتقا ۇشىرادى.
اۋە كەمەسىنىڭ بورتىندا روسكوسموس عارىشكەرى الەكسەي وۆچينين مەن NASA استروناۆتى نيك حەيگ بولعان. عارىشكەرلەر ءدىن امان, جاعدايلارى جاقسى, مەديتسينالىق كومەككە جۇگىنگەن جوق.
– زىمىران اۋەگە كوتەرىلگەن سوڭ شامامەن 11-سەكۋندىندا ءبىرىنشى ساتىسى اجىراعاننان كەيىن شتاتتان تىس جاعداي بولدى. سونىڭ سالدارىنان ەكيپاج مۇشەلەرى عارىش كەمەسىنەن كاپسۋلامەن ءبولىنىپ شىعۋ تۋرالى شەشىم قابىلداعان. كاپسۋلا جەزقازعان قالاسىنان 25 شاقىرىم تىسقارى جەرگە شتاتتىق رەجيمدە قوندى, – دەدى قر ءىىم توتەنشە جاعدايلار كوميتەتىنىڭ توراعاسى ۆلاديمير بەككەر.
ونىڭ ايتۋىنشا, جۋىردا قازاقستاندىق جانە رەسەيلىك تاراپ وكىلدەرىنىڭ قاتىسۋىمەن ارنايى ۇكىمەتتىك كوميسسيا قۇرىلادى. ونىڭ قۇرامىنا مۇددەلى مەملەكەتتىك ورگاندار كىرەدى. وقيعا تەكسەرىلىپ, ناتيجەسى شىعارىلادى.
«سويۋز مس-10» رەسەيدە جاسالعان. ول – «سويۋز تما»-نىڭ جەتىلدىرىلگەن نۇسقاسى. بۇل عارىش كەمەسى العاش رەت 2016 جىلى ۇشىرىلعان. ونىڭ سالماعى 7 توننادان اسادى, ال قوناتىن اپپاراتىنىڭ سالماعى – 2900 كەلى. ەكيپاجى 3 ادامعا ارناپ ازىرلەنگەن. سونداي-اق ونىڭ ۇشۋ رەسۋرسى 200 تاۋلىككە ارنالعان. ال جەرگە قونۋ جىلدامدىعى – 6,8 م/س.
