ەلوردا تورىندەگى «بايتەرەك» اياسىندا دۋمان قىزىعى جالعاسۋدا. مونۋمەنت الاڭىندا ەڭبەكتەگەن بالادان ەڭكەيگەن قارياعا دەيىن كوكتەم مەيرامىنا كوڭىلدەنىپ, شات-شادىمان كۇيمەن سەرۋەن قۇرىپ ءجۇر. كەشەدەن بەرى مۇندا قازاقى داستارقان جيىلمادى, ساۋىق-سايران سالتاناتى تارقامادى…
«بايتەرەك» جانىندا قۇرىلعان مەرەكەلىك ساحنا شىمىلدىعىن بۇگىن ساعات 11:00-دە «جاستار» تەاترىنىڭ ارتىستەرى اشادى. باعدارلاما بارىسىندا كورەرمەن نازارىنا «ناز» بي ءانسامبلى مەن «قاللەكي» تەاترى ونەر كورسەتەدى. كەشكە دەيىن جالعاساتىن كونتسەرتتە ەركىن نۇرجانوۆ, جاڭاباي وتەگەنوۆ, قۇرماش ماحانوۆ, دوس, «جىگىتتەر» كۆارتەتى, «دابىل» مەن «الامان» توبى, ايگۇل يمانباەۆا, ءمولدىر اۋەلبەكوۆا, باۋىرجان يساەۆ, الماس كىشكەنباەۆ, تاعى دا باسقا ەسترادا جۇلدىزدارى ءان شىرقايدى.
جاڭا جىلدى قارسى الار قالا تۇرعىندارى مەن قوناقتارى ءۇشىن «ءومىر اعاشىنىڭ» ماڭايىندا التى اقشاڭقان كيىز ءۇي تىگىلگەن. بۇل – جولاۋشىلار كولىگى, اۋىل شارۋاشىلىعى, ساۋلەت جانە قالا قۇرىلىسى, ينۆەستيتسيا-لار جانە دامۋ, جۇمىسپەن قامتۋ جانە الەۋمەتتىك باعدارلامالار سىندى قالا اكىمدىگىنە قاراستى باسقارمالاردىڭ وتاۋى. ۇلتتىق ناقىشتا بەزەندىرىلگەن كيىز ۇيدە جايىلعان داستارقانعا قازى-قارتا, قۇرت-ىرىمشىك, قىمىز, باۋىرساق قويىلعان. كەز كەلگەن ادام تورگە شىعىپ, ءداستۇرلى تاعامنان ءدام تاتا الادى. سونداي-اق, كيىز ءۇيدىڭ قۇتتى قوناقتارى «تۇساۋ كەسۋ», «بەسىككە بولەۋ», «بەتاشار», «سالەم سالۋ» راسىمدەرىنىڭ كۋاسى بولادى.
ناۋرىزدىڭ دۋماندى الاڭىندا ورىن تەپكەن التىنشى كيىز ءۇيدىڭ زاتى ەرەكشە. مۇندا «ەكسپو – 2017» ۇلتتىق كومپانياسىنىڭ برەند-ايماعى ورنالاسقان. «بارشا كەلۋشىلەردى ۇلىستىڭ ۇلى كۇنىمەن قۇتتىقتاي وتىرىپ, ەلىمىز اسىعا كۇتەتىن ەكسپو جايلى كەڭىرەك ماعلۇمات بەرەمىز. حالىقارالىق كورمەنىڭ تاريحى مەن سونىڭ شەڭبەرىندە قازاقستاندا وتكىزىلگەن شارالارمەن تانىستىرامىز. وسى ايتىلعان اقپاراتتارعا بايلانىستى ۆيكتورينا ويناتامىز. دۇرىس جاۋاپ بەرگەندەرگە كومپانيا اتىنان ەستەلىك سىيلىقتار تارتۋ ەتىلەدى» دەيدى مودەراتور ءادىل جۇمەكەنوۆ. كيىز ءۇي جانىندا كۇن ساۋلەسىنەن قۋات الاتىن بالامالى ەنەرگيا كوزى تۇرعىزىلعان. تۇرعىندار سونىڭ كومەگىمەن ىسكە قوسىلعان ءتورت تەلەديدار كورىنىسىن تاماشالايدى.
كورمە نىشانىنا تاڭدالعان «ءمولدىر», «قۋات», «ساۋلە» اتتى ءۇش كەيىپكەردى ارنايى ىلىنگەن تاقتادا پازل ارقىلى قۇراستىرۋ جارىسى وتەدى. كەشە بالشىرىن ەسىمدى 9 جاسار قىز مۇنداي پازلدى جىلدام جيناستىرىپ, ۇيىمداستىرۋشىلار ۇسىنعان سىيلىققا كەنەلدى.
استانا قالاسى كاسىپكەرلىك جانە ونەركاسىپ باسقارماسى حالىقتىڭ اشىق اسپان استىندا شاي ءىشىپ, تاماقتاناتىن مۇمكىندىكتەرىن دە قاراستىرعان. بەلگىلەنگەن تارتىپكە ساي الاڭدا ءتاتتى-دامدىلەر ساتاتىن ءدامحانالار ورنالاستىرىلعان.
كوپشىلىك ورتاعا «مەرەكەلىك ءىس-شاراعا كوڭىلىڭىز تولا ما؟» دەگەن ساۋال تاستاعان ەدىك, جارقىنبەك ءجۇمادىل اتتى استانالىق تۇرعىننىڭ جاۋابى جۇرەككە جىلۋلىق ۇيالاتتى. «ۇلىستىڭ ۇلى كۇنىن شىن كوڭىلىممەن مەيرام دەپ قابىلداعاندىقتان, وسى جەردە ءۇش ادام ۇيىمداسىپ ءبىر كيىز ءۇي تىگىپ قويسا دا قۋانامىن» دەيدى ول. ال, «بايتەرەكتىڭ» الدىنداعى مەرەكەلىك باعدارلامانىڭ شەت شاعاسىن ايتتىق. قالعانىن الاڭعا كەلىپ, ءوز كوزىڭىزبەن تاماشالاڭىز.
ءمادينا جاقىپ
astana-akshamy.kz
