بيىل استانادا قار كوبەسى ەرتە سوگىلدى. كوكتەم لەبىن سەزىنگەن جۇرتشىلىقتىڭ كوڭىل-كۇيى دە جوعارى. ادەمى مەزگىلمەن بىرگە, جاقسىلىق اتاۋلىنىڭ جارشىسىنداي بولىپ جەتەتىن ناۋرىزدا دا كۇن ادەتتەگىدەن جارقىراپ, اينالاسىن نۇرلاندىرىپ تۇردى. ءماز-ءمايرام بولعان ەل قالالىق اكىمدىك الدىنداعى الاڭعا مەرەكەنى تويلاپ, كوڭىلدى سەرگىتۋ ءۇشىن جينالدى.
ورتالىق الاڭنان اۋەلەگەن اسەم اندەر اينالانى كەرنەپ تۇر. قاز-قاتار تىزىلگەن اقشاڭقان كيىز ۇيلەر الىستان مەنمۇندالايدى. جۇرتشىلىق ولاردىڭ ارقايسىسىنا كەزەكپەن-كەزەك كىرىپ, ارالاپ ءجۇر. بۇرىن كيىز ۇيلەرگە لاۋازىمدى تۇلعالار عانا كىرىپ, قاراپايىم حالىققا ونىڭ ەسىگى جابىق بولاتىنى ءجيى سىنعا الىنۋشى ەدى. ال استانا بيىل جاقسى ءداستۇردى قولعا الىپ, ءاربىر كيىز ءۇيدى ۇلتتىق ءبىتىم-بولمىسىمىزدان سىر شەرتەتىن مۋزەي سەكىلدى جاساقتاپتى. ولاردىڭ ارقايسىسىندا تۇسكيىزدەر ءىلىنىپ, دومبىرا, قىلقوبىز سەكىلدى ۇلتتىق اسپاپتار, اعاشتان, تەرىدەن جاسالعان قولونەر بۇيىمدارى قويىلىپتى. سالت-ءداستۇرىمىزدى ۇلىقتاعان سەگىز كيىز ءۇيدىڭ قاتارىندا ءبىلىم, ەنەرگەتيكا باسقارمالارىنىڭ, «استانا-تازالىق» جشس-نىڭ, جاستار ساياساتى ماسەلەلەرى جونىندەگى باسقارمانىڭ تىككەن ۇيلەرى بار. سونداي-اق, ۋنيۆەرسيتەت پەن كوللەدج ۇجىمدارى دا ءبىر-ءبىر ۇيدەن تىگىپتى.
ايتپاقشى, الاڭداعى ءىس-شارالارعا نەگىزىنەن, سارىارقا اۋدانىنىڭ اكىمدىگى جاۋاپتى بولعانىن اتاپ وتكەن ءجون. ال الاڭنىڭ قاق ورتاسىنداعى ءسان-سالتاناتى كەلىسكەن ساحنادان اندەر اۋەلەپ, جىردان شاشۋ شاشىلدى. مىڭ بۇرالعان قىزدار بي بيلەپ, مەرەكەنىڭ كورىگىن قىزدىردى. ەلوردا جۇرتشىلىعىن ۇلىستىڭ ۇلى كۇنىمەن قۇتتىقتاپ, اسەم ءان-كۇيىن تارتۋ ەتكەندەردىڭ قاتارىندا دوسىمجان تاڭاتاروۆ, الماس كىشكەنباەۆ, بيبىگۇل ىسقاقوۆا, البينا وگانەسيان, جادي, اسەل نۇرتازينا, بەرىك سەكسەمباەۆ سىندى ونەرپازدارمەن بىرگە, «ناز», «ارتيست» انسامبلدەرى مەن «ديارت», «حانزادا», «ارت-دومبىرا» توپتارى بار.
مەرەكەلىك دۋماندى قىزدىرعان الاڭدى ارالاي ءجۇرىپ, قاز-قاتار تىزىلگەن 10 پالاتكاعا تابان تىرەدىك. بۇلاردىڭ توعىزىندا – تاعام تۇرلەرى, ويىنشىقتار, كۇندەلىكتى قولدانىلاتىن تۇرمىستىق زاتتار ساتىلسا, ىشكى ساياسات باسقارماسىنىڭ پالاتكاسىندا ۇلتتىق تاعامدار, اتاپ ايتقاندا, باۋىرساق, ناۋرىز كوجە, پالاۋ تەگىن ۇلەستىرىلىپ جاتىر ەكەن. حالىق دامنەن اۋىز ءتيىپ كەتىپ جاتىر. شەتتە تۇرعان جاستاۋ ايەلدى سوزگە تارتتىق. ءوزىن كۇلاش دەپ تانىستىرعان ول: «مەن جىل سايىن ناۋرىزدى تاعاتسىزدانا كۇتەمىن. ۇلىستىڭ ۇلى كۇنىندە جەگەن تاعامنىڭ ءدامى دە ءتاتتى كورىنەدى ماعان. «كوپپەن كورگەن ۇلى توي» دەيدى عوي قازاق. اق تۇيەنىڭ قارنى جارىلعان بۇگىنگى مەرەكەدە تاراتىلىپ جاتقان باۋىرساقتاردىڭ ءدامى ءتىل ۇيىرەدى. ۇيدە دە پىسىرەسىڭ عوي باۋىرساقتى. بىراق ءدال وسىلاي ءدامدى شىقپايدى» دەپ كۇلەدى كۇلاش. ال ەلگە قازان-قازان پالاۋ ۇلەستىرىپ, باۋىرساقتان اۋىز تيگىزىپ, العىسقا بولەنىپ جاتقان قىزداردى اڭگىمەگە تارتتىق. اتى-جوندەرى جاڭاگۇل مۇحانمەدينوۆا, گۇلدەن بايكەنوۆا جانە ءلايلى مۇحانمەدينوۆا ەكەن. ولار ءتاپ-ءتاتتى باۋىرساقتى وزدەرىنىڭ فاتيما, سالتانات اتتى اسپازدارى پىسىرگەنىن ايتتى.
جاعالاي ءجۇرىپ, ۋ-شۋ بولىپ ارقان تارتىسىپ, قول كۇرەستىرىپ جاتقان ادامدارعا قاراي جاقىندادىق. قالالىق اكىمدىك پەن دەنە تاربيەسى جانە سپورت باسقارماسى سالاۋاتتى ءومىر سالتىن دامىتۋ ءۇشىن ارقان تارتىسۋ, توعىزقۇمالاق, قول كۇرەستىرۋ سەكىلدى ويىندار ۇيىمداستىرىپتى. مىنە, بىلەكتى جىگىتتەر ارقان تارتىسۋدا. بەس ادامنان توپ-توپقا بولىنگەن جاستار ءبىر-بىرىنە دەس بەرەر ەمەس. بۇل جارىستا «چەمپيوندار» توبى ءبىرىنشى ورىندى, ال توتەنشە جاعدايلار باسقارماسىنىڭ «جاس-تار» توبى ەكىنشى ورىندى, «ارىن» توبى ءۇشىنشى ورىندى يەلەندى. ال قور كۇرەستىرۋ سايىسىندا 70 كگ سالماقتاعى ازاماتتاردىڭ اراسىندا رۋسلان داۋتوۆ اتتى قالا تۇرعىنى ءبىرىنشى ورىندى ەنشىلەدى. ەكىنشى ورىن ايدوس قادىرعا بۇيىرسا, ءۇشىنشى ورىندى ءاليجان مۇراتوۆ الدى. جەڭىمپازدار قۇر قول قايتقان جوق. ۇيىمداستىرۋشىلار ولارعا سىيلىقتار مەن ارنايى ديپلومدار تابىس ەتتى.
سپورتتىق شارالاردان بالالار دا قالىسار ەمەس. ولار توعىزقۇمالاقتىڭ قىزىعىنا تۇسكەن. شەتكەرى تۇرعان ەكى قىزدى اڭگىمەگە تارتتىق. ونىڭ ەرەسەكتەۋى – ارۋجان ساعىندىقوۆا ەكەن. №64 مەكتەپ-ليتسەيىنىڭ 5-سىنىپ وقۋشىسى. ەكىنشىسى – گۇلسەزىم ساعىندىقوۆا. ول №15 مەكتەپ-ليتسەيىنىڭ 3-سىنىبىندا وقيدى. «مەن ۇيگە قوناققا كەلگەن بالالاردىڭ بارىنە توعىزقۇمالاقتى ۇيرەتەمىن. اكەم توعىزقۇمالاق ميدىڭ ويلاۋ قابىلەتىن دامىتادى دەگەن. ۇيدە مەن, اعام, اكەم وينايمىز. بۇل – ءبىزدىڭ قازاقتىڭ ۇلتتىق ويىنى. ول ماعان ۇنايدى» دەيدى ارۋجان.
استانا قالاسى دەنە تاربيەسى جانە سپورت باسقارماسىنا قاراستى سپورتتىق-بۇقارالىق ءىس-شارالاردى وتكىزۋ ديرەكتسياسىنىڭ مەنەدجەرى ەرجىگىت وسەربايدىڭ ايتۋىنشا, سپورتتىق شارالار بۇگىن كەشكە دەيىن جالعاسادى. جوعارىدا ايتىلعان سايىستاردان باسقا, تۇرعىندار اراسىندا قازاقشا كۇرەس, اسىق اتۋ, گير كوتەرۋ, نىسانا اتۋدان دا جارىس بولادى. ۇيىمداستىرۋشىلار تۇرعىنداردى بۇقارالىق شارالارعا بەلسەنە اتسالىسۋعا شاقىردى.
قالالىق الاڭداعى مەرەكەلىك شارالار كەشكە دەيىن جالعاسىپ, استانا اسپانىن ءان مەن كۇيگە كومكەردى.
قىمبات توقتامۇرات
