بالا باقىلاۋسىز قالماسىن
سارىارقا اۋدانىنىڭ اكىمى پاۆەل كۋلاگيننىڭ ءتوراعالىعىمەن كامەلەتكە تولماعانداردىڭ قۇقىعى مەن قىلمىسىنا قاتىستى جيىن ءوتتى. وعان جەرگىلىكتى پوليتسيا قىزمەتى مەن پروكۋراتۋرا وكىلدەرى, كاسىپكەرلەر جانە قالا تۇرعىندارى قاتىستى.
ءىس-شارا بارىسىندا سارىارقا اۋدانى پروكۋراتۋراسىنىڭ الەۋمەتتىك-ەكونوميكالىق سالاداعى زاڭدىلىقتى باقىلاۋ ءجونىندەگى ءبولىم پروكۋرورى عالى بەكسۇلتانوۆ بايانداما جاساپ, بالالار اراسىنداعى سۋيتسيد ماسەلەسىنە توقتالدى. «بۇگىندە قازاقستان وسى پروبلەما بويىنشا الەم ەلدەرىنىڭ تىزىمىندە العاشقى ورىندا تۇر. مۇنىڭ ءوزى – قىنجىلتارلىق دەرەك. ايتكەنمەن, جىل سايىن سۋيتسيد كورسەتكىشى ازايىپ كەلەدى. ماسەلەن, 2013 جىلى 21 فاكتى تىركەلسە, 2014 جىلى 6 بالا ءوز-وزىنە قول جۇمساۋعا ارەكەتتەنگەن. بىراق 2015 جىلى بۇل تسيفر 20-عا دەيىن جەتتى. ونىڭ ىشىندە 2 جاعداي ءولىممەن اياقتالدى. ال بيىل ازىرگە 5 وقيعا بەلگىلى. اتالعان ىندەتتىڭ الدىن الۋ ءۇشىن ءتيىستى جۇمىستاردى اتقارىپ جاتىرمىز. مەكتەپ پسيحولوگتارىمەن بىرلەسىپ, وقۋشىلارمەن اشىق اڭگىمە جۇرگىزۋدەمىز. الەۋمەتتىك جەلىدەگى كۇدىكتى پاراقشالاردى باقىلاپ, ءبىزدىڭ ءبۇلدىرشىندەرىمىزگە تەرىس اسەر ەتپەۋىن قاداعالاۋدامىز» دەدى ول. وسى تۇستا اۋدان اكىمى پاۆەل كۋلاگين سۋيتسيدكە مۇمكىندىك بەرەتىن جولداردىڭ ءبارىن جاۋىپ, اسىرەسە, كوپقاباتتى ۇيلەردىڭ شاتىرىنا شىعاتىن ەسىكتەردى مىقتاپ بەكىتۋ كەرەكتىگىن ايتتى.
بۇدان سوڭ, ىشكى ىستەر باسقارماسىنا قاراستى سارىارقا اۋداندىق يۋۆەنالدى پوليتسيا ءبولىمىنىڭ باسشىسى, پوليتسيا مايورى ءاليا قولىشپاەۆا ءسوز الىپ, كامەلەتكە تولماعانداردىڭ ۇرىناتىن قىلمىسى جايلى ءمالىمدەدى. «جىل باسىنان بەرى بالالار مەن ءجاسوسپىرىمدەر تاراپىنان 196 قىلمىس جاسالعان. كوبىنەسە, ۇيالى تەلەفون مەن اقشا ۇرلىعى ءجيى كەزدەسەدى» دەي كەلە ءتارتىپ ساقشىسى تاربيەنىڭ ءرولىن شەگەلەي جەتكىزدى. يۋۆەنالدى پوليتسيانىڭ ۇيىمداستىرۋىمەن بالالار قىلمىسىنىڭ الدىن الۋعا باعىتتالعان اكتسيالار, جەدەل ءىس-شارالار, سالاۋاتتى ءومىر سالتىن ناسيحاتتايتىن ەستافەتالار تۇراقتى تۇردە وتكىزىلىپ وتىرادى ەكەن. سونىمەن قوسا, پوليتسيا مايورى بالالارعا الكوگولدى ىشىمدىك پەن تەمەكى ونىمدەرىنىڭ ساتىلۋى تۋراسىندا دا اڭگىمە قوزعادى. بىلتىرعى جىلمەن سالىستىرعاندا بيىل مۇنداي فاكتىلەر ەداۋىر ازايعان.
بوتاگوز ماراتقىزى