حالىقارالىق ۆاليۋتا قورىنىڭ وڭىرلىك كونفەرەنتسياسىنا قاتىسۋ ءۇشىن اتالمىش قارجى قۇرىلىمىنىڭ باسقارۋشى ديرەكتورى كريستين لاگارد استاناعا كەلدى.
استانا ەكونوميكالىق فورۋمى اياسىندا ۇيىمداستىرىلعان كونفەرەنتسيا سوڭىندا حۆق باسشىسى وتاندىق ەكونوميكانى تۇراقتاندىراتىن داعدارىسقا قارسى شارالار جايلى ايتتى.
– قازاقستان ەكونوميكاسىنىڭ بيىلعى ءوسىمى نەبارى 1 پايىزدى قۇرادى, ال سوڭعى 15 جىلدا ورتاشا كورسەتكىش 7,5 پايىز بولعان ەدى. الايدا الداعى جىلى وڭ سەرپىن بەرۋى مۇمكىن, – دەي كەلە ول ەل بيلىگىنىڭ تەڭگەنى ەركىن اينالىمعا جىبەرۋىن دۇرىس قادام دەپ باعالادى.
بۇدان سوڭ كريستين لاگارد سالىق, بيۋدجەت ساياساتى, بيۋدجەتتەن تىس قورلاردىڭ قىزمەتى ەلەۋلى رەفورماعا ءزارۋ ەكەنىنە توقتالدى. قور باسشىسىنىڭ پىكىرىنشە, ەگەر مۇناي باعاسى وسى دەڭگەيدە تۇرا بەرسە, وندا ۇكىمەتتىڭ بيۋدجەت قارجىسىن قايتا بولۋىنە تۋرا كەلەدى.
– قازاقستان ديۆەرسيفيكاتسيا جولدارىن ىزدەستىرۋى كەرەك. سونىڭ ارقاسىندا ەكونوميكا الدەقايدا باسەكەگە قابىلەتتى, وڭىرلىك جانە جاھاندىق دەڭگەيدە بىرىكتىرىلگەن قالىپقا كوشەدى. كوپ مەملەكەت قازاقستاندى ەۋروپا مەن ازيا اراسىنداعى «كوپىر» دەپ تانيدى. وسى قىزىعۋشىلىق ارقىلى سىزدەر ءۇشىن وراسان زور مۇمكىندىكتەر اشىلادى. سول رەسۋرستاردى ەلدەگى ەكونوميكالىق ءوسىم مەن جاڭا جۇمىس ورىندارىن قۇرۋعا جۇمساۋ كەرەك, – دەدى ول.
سونداي-اق, قارجى قۇرىلىمىنىڭ باسشىسى رەفورمالاردىڭ جۇزەگە اسۋ بارىسىنا توقتالىپ:
– رەفورمالاردى جاساۋ وڭاي ەمەس. باستىسى, كەز كەلگەن جاعدايدا ماسەلەنىڭ ءمانىسىن, رەفورمانىڭ ماقساتىن بارلىق تاراپقا ءتۇسىندىرۋ قاجەت. بۇل ورايدا مەن قازاقستاندىق بيلىك حالىقپەن اراداعى ديالوگتىڭ مەيلىنشە تەرەڭ وربۋىنە مۇددەلى ەكەنىن بايقادىم, – دەدى.
مەڭدوللا شامۇراتوۆ
