تۇڭعىش پرەزيدەنت كۇنى مەملەكەت باسشىسى, «نۇر وتان» پارتياسىنىڭ توراعاسى نۇرسۇلتان نازارباەۆ رەسپۋبليكالىق قوعامدىق قابىلداۋدىڭ ەلورداداعى جاڭا عيماراتىندا وتىنىشپەن كەلگەن ازاماتتاردى قابىلدادى. سولاردىڭ اراسىندا استاناداعى مامانداندىرىلعان بالالار ءۇيىنىڭ ديرەكتورى گۇلنار قۇلىشەۆا دا بولدى.
وسىدان ەكى جىل بۇرىن «قاسيەتتى جول» قايىرىمدىلىق قورىنىڭ قولداۋىمەن ساپالى قۇرال-جابدىقتار ساتىپ الىپ, سال اۋرۋى دياگنوزى قويىلعان بالالارمەن جۇمىس ىستەي باستاعاندارى تۋرالى اڭگىمەلەگەن باس دارىگەر الدىمەن ءتورت بالانى شەتەلگە اپارىپ تەكسەرتىپ اكەلگەندەرىن ولار بىردەن شەتەلگە شىقپاي, اۋەلى بىزدەگى دارىگەرلەردىڭ تەكسەرىلۋىنەن ءوتىپ, كەڭەس العاندارىن, سودان كەيىن بارىپ قانا مامانداردىڭ كەلىسىمىمەن شەتەلگە جىبەرىلگەنىن جەتكىزدى.
«دەنى ساۋ بالا – ۇلت بولاشاعى» جوباسىنىڭ ارقاسىندا كورەيادا, رەسەيدە ەم العان 16 بالانىڭ ونى وڭ ناتيجەگە قول جەتكىزگەن. سونداي-اق, اتالمىش قوردىڭ قولداۋىمەن رەسپۋبليكامىزدىڭ التى ايماعىنداعى بالالار ۇيىنە جالپى سوماسى 7,5 ملن تەڭگەنىڭ وڭالتۋ قوندىرعىلارى ساتىپ الىندى. قالعان ون وبلىس تا باعدارلامادان تىس قالمايدى. بۇل رەتتە اينۇر مىرزاحانقىزىنىڭ ەڭبەگىن ەرەكشە اتاپ وتكەن ءجون. ول جەتەكشىلىك ەتەتىن ۇجىمنىڭ كۇن سايىن جۇرگىزگەن يننوۆاتسيالىق جاڭا ادىستەمەلەرىنىڭ ارقاسىندا بالالار ۇيىندەگى ديليارا, يسلام ەسىمدى بالاقايلار اياعىنان تۇرىپ, ءوز بەتتەرىمەن وتىراتىن حالگە جەتكەن. سال اۋرۋىنا شالدىققان باسقا دا بالالاردىڭ پسيحيكالىق جاعدايلارى جاقسارىپ, ەشتەڭەگە ءمان بەرمەيتىن كەيبىر سابيلەر اينالاسىنداعى قۇبىلىستارعا كوز توقتاتىپ قارايتىن بولعان.
جالپى, بۇل جوبا استانا قالاسى اكىمدىگىنىڭ جانە دەنساۋلىق ساقتاۋ باسقارماسىنىڭ قولداۋىمەن جۇزەگە اسىرىلۋدا.
«بالالاردى نەعۇرلىم ەرتە ساۋىقتىرساق, ناتيجەسى دە سوعۇرلىم كوپ بولادى. يننوۆاتسيالىق جاڭا ءادىس-تاسىلدەردى كۇن سايىن قولدانۋدىڭ ارقاسىندا بىزدەگى وتىرا المايتىن بالالار اياعىنان تۇرىپ, قوزعالمايتىن بالالار ەڭبەكتەپ كەتتى. ەندەشە, كەز كەلگەن بالالار ۇيىندە وسىنداي ورتالىق بولۋى كەرەك» دەدى «نۇر وتان» پارتياسىنىڭ 50 تۇلعاسى» جوباسىنىڭ قاتىسۋشىسى گ.قۇلىشەۆا.
مەملەكەت باسشىسى بالالار ۇيىندەگى مۇنداي ناتيجەلەرگە قۋانىشىن جاسىرماي, سال اۋرۋى دياگنوزى بار بالالاردى وڭالتۋ ورتالىعىنا قولداۋ ءبىلدىردى. ودان ءارى «نۇر وتان» توراعاسى اكىمدىكتەرگە تاپسىرما بەرىلەتىنىن, ال پارتيا جۇيەسىنىڭ بۇل باستامانى قامقورلىعىنا جانە باقىلاۋىنا الاتىنىن اتاپ ءوتتى.
«نۇر وتان», شىن مانىندە, حالىقتىق پارتيا ەكەنىن ەسكەرە كەلە, سوڭعى ەكى جىل بويى وسى پارتيامەن بىرگە قويىڭ-قولتىق جۇمىس ىستەگەندەرىنە توقتالعان گۇلنار قۇلىشەۆا ەلىمىزدەگى انا مەن بالاعا دەگەن ەرەكشە قامقورلىعى ءۇشىن ەلباسىنا العىس ايتتى.
گۇلبارشىن وكەشقىزى
