بالا شىعارماشىلىعىن بايىتتى
«استانا ارەنا» ستاديونى الاڭىندا بالالارعا ارنالعان قايىرىمدىلىق شاراسى ءوتتى. پسيحولوگتار مەن ارت-تەراپەۆتەر بالالار ءۇيىنىڭ تاربيەلەنۋشىلەرىنە ارناپ كوممۋنيكاتيۆتىك داعدىلاردى دامىتۋعا جانە ءوز-وزىنە دەگەن سەنىمدى ارتتىرۋعا باعىتتالعان ءتۇرلى ويىندار ۇيىمداستىردى.
اكتسيا باعدارلاماسىن ءتاجىريبەلى ماماندار ازىرلەگەن. ارت-تەراپيانىڭ ءتۇرلى ادىستەرى بالالاردىڭ شىعارماشىلىق الەۋەتىن اشۋعا, ويلاۋ قابىلەتتىلىگى مەن قاجەتتى الەۋمەتتىك ماشىقتارىن دامىتۋعا ءمۇمكىندىك بەردى.
– مۇنداي قايىرىمدىلىق شاراسى ەلوردادا العاش رەت وتكىزىلىپ وتىر. اكتسيانىڭ ماقساتى – ويىن, ءىس-قيمىل جانە ەلەس-قيال ارقىلى بالانىڭ شىعارماشىلىعىن شىڭداۋ. بۇل ءوز كەزەگىندە بالالاردى الەۋمەتتىك بەيىمدەۋگە جانە ءوز بەتىنشە ءومىر سۇرۋگە ۇيرەتەدى, – دەيدى «Best for Kids» قوعامدىق قورىنىڭ پرەزيدەنتى سايا كاكىم.
ايتا كەتەيىك, شاراعا استانالىقتار عانا ەمەس, اقمولا وبلىسىنىڭ بالالارى دا قاتىستى.