استانا كۇنى مەرەكەسىندە جاۋعان جاڭبىر جارتى ساعات ىشىندە ەلوردانىڭ ءبىراز ايماعىن سۋعا تولتىرعانى بەلگىلى. سول كۇنى بار-جوعى 25 مينۋت ىشىندە سەگىز ميلليمەتر كولەمىندە ىلعال تۇسكەن ەكەن. بۇل قالىپتاعى نورمادان بىرنەشە ەسە جوعارى. سونىڭ سالدارىنان قالاداعى كوممۋنالدىق قىزمەت اياعىنان تىك تۇرىپ, كۇشەيتىلگەن رەجيمدە جۇمىس ىستەۋگە ءماجبۇر بولدى.
مەرەكە كۇندەرى ەلوردادا ەسەپسىز جاۋعان جاۋىننان جينالعان سۋدى سورۋعا ءجۇز جاقتى مامانداندىرىلعان تەحنيكا, 2 جىلجىمالى سورعى ستانسا, 7 موتوپومپا, 21 سورعى سياقتى قۇرال مەن تەحنيكالار جۇمىلدىرىلعان بولاتىن. ناتيجەسىندە ەكى ساعات كولەمىندە جاۋىننىڭ سالدارى جويىلدى.
قازىرگى ۋاقىتتا جاڭبىر سۋىن اعىزاتىن كارىز قۇرىلىسى قالاي ءجۇرىپ جاتىر؟ قالاداعى كوممۋنالدىق قىزمەت سۋ باسۋ قاۋپىن الدىن الۋدا قانداي ىستەر اتقارۋدا؟ وسى ماسەلەنىڭ جاي-جاپسارىن ءبىلۋ ماقساتىندا استانا قالالىق كوممۋنالدىق شارۋاشىلىق باسقارماسى باستىعىنىڭ ورىنباسارى تيمۋر ابيجانوۆقا بىرنەشە ساۋال جولدادىق.
– بۇل ماسەلەگە قاتىستى قالا اكىمىنىڭ ءوزى جاقىندا جان-جاقتى ايتىپ ءوتتى. نەگىزىندە, قالاداعى سۋ باسۋ قاۋپىن تولىقتاي جويۋ ءۇشىن ءۇش جىلدىق ارنايى باعدارلاما قاجەت. قالا اكىمى وسى باعىتتا ناقتى تاپسىرمالار بەردى. قازىردىڭ وزىندە نەگىزگى جوبالارى جاسالۋدا. وزدەرىڭىز بىلەسىزدەر, وسىدان وتىز-قىرىق جىل بۇرىن تۇرعىزىلعان ۇيلەردىڭ جانىنان قاردىڭ, جاڭبىردىڭ سۋىن اعىزاتىن ارنايى قۇبىرلار سالىنباعان. قازىر سونىڭ زاردابىن تارتىپ وتىرمىز. ال سول جاعالاۋداعى سۋ اعىزاتىن قۇبىرلاردىڭ قۋاتى تومەندەۋ بولىپ قالدى. ويتكەنى, قالا اي سايىن ۇلكەيىپ, كولەمى ارتىپ كەلەدى. قازىرگى كەزدە №31 جانە №27 تازارتۋ قۇرىلىستارى ىسكە قوسىلدى, جىل سوڭىنا دەيىن سۋ اعىزاتىن جاڭا كوللەكتور پايدالانۋعا بەرىلەدى, – دەپ ءتۇسىندىردى تيمۋر جۇماجانۇلى.
مامانداردىڭ ايتۋىنشا, جاڭا سۋ اعىزاتىن كوللەكتور ىسكە قوسىلعاندا, بيىلعى جىلدىڭ اياعىنا دەيىن سول جاعالاۋدى سۋ باسۋ قاۋپى تولىقتاي جويىلادى ەكەن. ال جالپى قالانى مۇنداي قاۋىپتەن قۇتقارۋ ءۇشىن كەمى ەكى-ءۇش جىل قاجەت بولادى. قالا اكىمى اسەت يسەكەشەۆ تە قالالىق «نۇر وتان» پارتياسىنىڭ كەزەكتەن تىس كونفەرەنتسياسىنداعى ءبىر ۇزىلىستە سۋ اعىزاتىن قۇبىرلار سالۋ – اكىمدىكتىڭ ەڭ ماڭىزدى جۇمىستارىنىڭ ءبىرى بولاتىنىن ايتىپ وتكەن ەدى. سول سەبەپتەن قالا بويىنشا تۇراقتى سۋ بۇرۋ جۇيەلەرى قۇرىلىسىن جوسپارلاۋ باعىتىندا ناقتى جۇمىستار قولعا الىنا باستاعان. بيىلعى جىلى ەكى تازارتۋ قۇرىلىمىن جانە ءبىر سۋ اعىزاتىن كوللەكتور قۇرىلىسىن اياقتاۋ جوسپارلانعان. سول كەزدە جاڭبىر جاۋسا, سۋعا لىق تولاتىن تۇران داڭعىلى مەن قابانباي باتىر داڭعىلى مۇنداي ازاپتان قۇتىلادى. جالپى, ەلوردانىڭ سول جاعالاۋ اۋدانىندا كەلەر جىلعا دەيىن سۋ باسۋ قاۋپى تولىقتاي جويىلماق. ەكى-ءۇش جىل شاماسىندا, بۇيىرتسا, استانا كولەمىندە مۇنداي ماسەلە تولىق شەشىمىن تاباتىن بولادى.
مەڭدوللا نۇرىمۇلى
