قازاقستان حالىق پارتياسىنىڭ توراعاسى ايقىن قوڭىروۆ ەلىمىزدە بالالار اراسىنداعى قىلمىس پەن قاتىگەزدىكتىڭ ءورشىپ بارا جاتقانىنا قوعام نازارىن اۋداردى. ول «نەمولچي» قورىنىڭ جەتەكشىسى دينا سمايىلوۆانىڭ الەۋمەتتىك جەلىدەگى جازباسىنا قاتىستى ءوزىنىڭ وي-پىكىرلەرىن جاريالادى.
دينا قاراعاندى وبلىسىندا 4-سىنىپ وقۋشىلارىنىڭ 8 جاستاعى ۇل بالانى زورلىقپەن بەيادەپ فيلم كورۋگە, بالالاردىڭ كوزىنشە جىنىستىق قاتىناسقا ماجبۇرلەگەنى جونىندە جازدى.
ايقىن قوڭىروۆ ءبىر-بىرىنە اياۋسىز زورلىق كورسەتكەن بالالاردىڭ قىلمىسىن كورىپ, تۇلا بويىڭ تىتىركەنەتىنىن, قارشادايىنان قاتىگەزدىككە ۇرىناتىن بالالاردىڭ بولاشاعىنا الاڭداۋشىلىق ءبىلدىردى. «بۇل قىلمىسقا كۇدىكتىلەردىڭ جاسى 11-دە عانا. بۇلار ءالى جاپ-جاس بالالار عوي. ولاردىڭ ارەكەتى جاسىمەن سايكەسپەيدى. ءوزىڭىز ويلاڭىزشى, 11 جاسار بالادا قانداي زورلىق, جابىرلىك كورسەتۋ, قاتىگەزدىك بولۋى مۇمكىن؟ ولار قاي ۋاقىتتا قاتىگەزدىككە بوي ۇرىپ ءجۇر؟ كىم كىنالى؟ نە ىستەۋ كەرەك؟ مەنىڭ ويىمشا, مۇنداي ساۋالداردىڭ جاۋابىن اۋەلى سول بالانىڭ وتباسىنان, وقيتىن مەكتەبىنەن, ءومىر سۇرەتىن ورتاسىنان ىزدەۋ كەرەك» دەپ جازدى ايقىن قوڭىروۆ ءوزىنىڭ Facebook-تەگى پاراقشاسىندا.
قازاقستان حالىق پارتياسى توراعاسىنىڭ پايىمداۋىنشا, بالا – ادامنىڭ باۋىر ەتى, ءومىرىنىڭ ايناسى. ەگەر بالانىڭ ساناسى, جۇرەگى قاتىگەز بولسا, وندا ءبىزدىڭ قوعام دا ساۋ ەمەس دەگەن ءسوز! «ءجاسوسپىرىم كەزەڭ – بۇل ادام ومىرىندەگى ەڭ ماڭىزدى, ءوزىن-ءوزى قالىپتاستىراتىن, ساناسى مەن زەردەسى جەتىلەتىن شاعى. بۇل – بىرەۋلەرگە ەلىكتەيتىن كەزەڭ. ال ەگەر سول بالانىڭ ءوسىپ-ونگەن ورتاسىندا, ۇشقان ۇياسىندا بىردەڭە دۇرىس بولماسا, كىنانى ونىڭ اتا-انالارى مەن تاربيەلەۋشىلەرىنەن ىزدەۋ كەرەك. بۇل – وتە كۇردەلى, كۇرمەۋى قيىن ماسەلە» دەدى ا.قوڭىروۆ.
