19 قاراشا كۇنى ساعات 17.00-دە تاۋەلسىزدىك سارايىندا «Kazakhstan Kids Fashion Show-2016» اتتى بالالار ءسان كورسەتىلىمى وتەدى دەپ كۇتىلۋدە.
وسىمەن ءتورتىنشى مارتە ۇيىمداستىرىلىپ وتىرعان ءسان شەرۋى بالا مەن وتباسى تاقىرىبىندا بولماق. وعان قاتىسۋشىلاردى ەكى اي بويى ارنايى كاستينگ ارقىلى تاڭدادى. ناتيجەسىندە شاراعا ءتورت جاستان باستاپ, ون التى جاسقا دەيىنگى جۇزگە جۋىق بالا ىرىكتەلىنىپ الىندى.
بالالار ءسان كورسەتىلىمىنىڭ باس پروديۋسەرى, بەلگىلى جۋرناليست ماحاببات ەسەننىڭ ايتۋىنشا, بۇل – تەك قانا شوۋ ەمەس. «شارانى قاتىسۋشىلاردىڭ تۇلعا بولىپ قالىپتاسۋىنا بىردەن-ءبىر سەبەپ بولاتىن باسپالداق رەتىندە باعالاۋىمىز كەرەك» دەيدى ول. سونداي-اق, بۇل كەشتە كوپتەگەن وتاندىق ديزاينەرلەر, بەت ارلەۋشى, فوتوگراف, رەجيسسەر جانە حورەوگرافتار شىعارماشىلىق بايلانىس ورناتۋعا مۇمكىندىك الادى. ال 27 قاراشادا «سارىارقا» ساۋدا ورتالىعىندا جاس ديزاينەرلەر ۇزدىك جۇمىستارىن ۇسىنادى.
الدىڭعى جىلى كىشكەنتاي سانقويلار ميلاندا وتكەن EXPO-2015 كورمەسىندە ەلىمىزدى تانىستىرىپ, ءسان شەرۋىن كورسەتتى. جوبانىڭ قاتىسۋشىلارى تۇركيادا وتكەن EXPO-2016 كورمەسىنە دە جولداما العان بولاتىن.
گۇلدانا تالعاتقىزى
