بۇگىن استانا ۆوكزالىنان ساعات 13:35-تە قازاقستان حالقى اسسامبلەياسىنىڭ ەل تاۋەلسىزدىگىنىڭ 25 جىلدىعىنا ارنالعان «تاۋەلسىز قازاقستانىم» پويىزى سالتاناتتى تۇردە ساپارعا اتتاندى.
حالىققا مەديتسينالىق, الەۋمەتتىك جانە قۇقىقتىق قىزمەت كورسەتۋدى ماقسات ەتكەن پويىز 43 كۇن بويى قازاقستاننىڭ 35 ەلدى مەكەنىنە ايالدايدى. بۇيىرتسا, 14 جەلتوقسان كۇنى ساپاردى الماتى قالاسىندا اياقتاماقشى.
پويىز قىزمەتى اياسىندا ەلىمىزدىڭ شالعاي وڭىرىندەگى تۇرعىندارعا ەرەكشە كوڭىل بولىنبەكشى. ونىڭ قۇرامىندا پارلامەنت ءماجىلىسىنىڭ دەپۋتاتتارى, اسسامبلەيا مۇشەلەرى, مادەنيەت جانە سپورت مايتالماندارى, مەديتسينا قىزمەتكەرلەرى جانە الەۋمەتتىك سالا ماماندارى بار. ءوز سالاسىنىڭ بىلىكتى دارىگەرلەرى حالىققا مەديتسينالىق قىزمەت كورسەتىپ, جان-جاقتى كەڭەس بەرمەكشى.
-الەۋمەتتىك اكتسيانىڭ ماقساتى – ەلىمىزدىڭ جەتىستىكتەرىن تانىستىرۋ, حالىقتىڭ بىرلىگىن نىعايتۋ, قوعامدىق ءىس-شارالار وتكىزىپ قانا قويماي, حالىققا دارىگەرلىك قىزمەت كورسەتۋدى كوكسەيدى. بۇل اۋقىمى كەڭ شارا. ولاي دەيتىن سەبەبىم, قايىرىمدىلىق اكتسيالارى مەن مەرەكەلىك كونتسەرتتەر ۇيىمداستىرىلادى. ءتۇرلى سالاداعى مينيسترلىكتىڭ وكىلدەرى تۇرعىنداردىڭ ماسەلەسىن تىڭداپ, كوكەيىندە جۇرگەن ساۋالدارىنا جاۋاپ بەرەدى, – دەيدى «تاۋەلسىز قازاقستانى» پويىزىنىڭ شتاب جەتەكشىسى ءامىرجان الپەيىسوۆ.
ونىڭ ايتۋىنشا, تولىققاندى مەديتسينالىق تەكسەرۋدەن باستاپ, الەۋمەتتىك ماسەلەلەر بويىنشا كەڭەس بەرىلەدى. ياعني, «جۇمىسپەن قامتۋ -2020» جول كارتاسىنا قاتىسۋ, قىزمەتكەرلەردىڭ ەڭبەك قۇقىعىن قورعاۋ, زەينەتاقىمەن قامتاماسىز ەتۋ, جاردەماقى تولەۋ بويىنشا ءتۇسىندىرۋ جۇمىستارى جۇرگىزىلەدى. سونىمەن قاتار, جىلجىمايتىن مۇلىك قۇقىعىن تىركەۋ, بورىشكەر مۇلكىنە تىيىم سالۋدى بولدىرماۋ, كاسىپوداق قىزمەتى بويىنشا دا قاجەتتى كەڭەستەر ۇسىنىلادى. اۋىلشارۋاشىلىق, ءبىلىم بەرۋ سالاسى جانە تۇتىنۋشى قۇقىن قورعاۋ ماسەلەلەرى دە شەت قالمايدى.
گۇلميرا ايماعانبەت
