«جايدارمان» الاڭىندا – جاس ماماندار
استانا قالاسى اكىمدىگى تىلدەردى دامىتۋ باسقارماسىنىڭ ۇيىمداستىرۋىمەن قر تاۋەلسىزدىگىنىڭ 25 جىلدىعىنا ارنالعان «مەملەكەتتىك ءتىل – بارلىق سالادا» اتتى جاس مامانداردىڭ اراسىنداعى «جايدارمان» ويىندارى ءوتتى.
بۇل سىننىڭ باستى ەرەكشەلىگى ويىنعا كاسىبي «جايدارمانشىلار» ەمەس, ءارتۇرلى سالادا قىزمەت ەتىپ جۇرگەن جاس مامانداردىڭ قاتىسۋى بولسا كەرەك.
مەملەكەتتىك ءتىلدىڭ مەرەيىن كوتەرۋگە ارنالعان «جايدارمان» ويىندارىنا 11 كوماندا قاتىسىپ, ءوز ونەرلەرىن ورتاعا سالدى. ولاردىڭ ىشىندە استانا قالاسى اكىمدىگى ءبىلىم باسقارماسى, سارىارقا اۋدانى اكىمدىگى مەن استانا قالالىق ءدىن ىستەرى باسقارماسى, «KEGOC» جانە «ترانستەلەكوم» اق قۇراما كوماندالارى بار. مەملەكەتتىك قىزمەتشىلەر مەن اكتسيونەرلىك قوعامنىڭ جاس ماماندارى كورەرمەنگە كوتەرىڭكى كوڭىل-كۇي سىيلاي ءبىلدى. سونداي-اق, ءازىل كەشىنە س.سەيفۋللين اتىنداعى قازاق اگروتەحنيكالىق ۋنيۆەرسيتەتى, قازاق ەكونوميكا قارجى جانە حالىقارالىق ساۋدا ۋنيۆەرسيتەتى, استانا قالاسى كولىك جانە كوممۋنيكاتسيا كوللەدجى مەن اسۋ كوللەدجىنىڭ ۇستازدارى قاتىسىپ, ءوز شاكىرتتەرىن كۇلكىگە قارق قىلدى.
ويىن باستالماي تۇرىپ كورەرمەن «جايدارمانعا» قاتىسپاعان جاس ماماندار ساحنادا قالاي ونەر كورسەتەر ەكەن؟» دەپ كۇدىكتەنگەن بولاتىن. ءتىپتى, مۇنداي كۇدىكتىڭ بولعانىن كورەرمەننەن بۇرىن قازاقستان كۆن وداعىنىڭ پرەزيدەنتى ەسەن ەلەۋكەننىڭ ءوزى تىلگە تيەك ەتتى. الايدا 11 كوماندانىڭ ىشىندە ونەرىمەن جۇرتشىلىقتى ءتانتى ەتكەن دە, سونىمەن قاتار «اتتەگەن-اي» دەگىزگەن دە قۇرامالار بولدى. دەسەك تە, جاس مامانداردىڭ استارلى ازىلدەرى كەيبىر كەمشىلىكتەردى جۋىپ-شايىپ كەتكەندەي بولدى. بۇدان بولەك, كورەرمەن مەن قازىلار القاسىن «جايدارمانشىلاردىڭ» ساياسي ءازىل ايتا بىلگەن قاسيەتى تامساندىردى. سەبەبى «قازاق كوڭىلدى تاپقىرلار كلۋبى ساياسي ازىلدەر ايتپايدى» دەگەن قوعامدا سىني كوزقاراس بار بولاتىن.
سونىمەن, قازىلار القاسىنىڭ شەشىمى بويىنشا استانا قالاسى كولىك جانە كوممۋنيكاتسيا كوللەدجى «جايدارمان» سايىسىندا ەڭ ۇزدىك ونەر كورسەتكەنى ءۇشىن «ۇزدىك ويىنشى» نوميناتسياسىن يەلەندى. سونداي-اق, ءۇشىنشى ورىندى سارىارقا اۋدانى اكىمدىگى مەن استانا قالالىق ءدىن ىستەرى باسقارماسىنىڭ بىرلەسكەن قۇراماسى مىسە تۇتسا, ەكىنشى ورىندى قاراعاندى قالاسىنىڭ جاس ماماندارى ولجالاپ كەتتى.
ال باس جۇلدە مەن كۋبوكتى «قازاقستان» رەسپۋبليكالىق تەلەراديوكورپوراتسياسى» اكتسيونەرلىك قوعامىنىڭ اتىنان قاتىسقان «ءتورتىنشى بيلىك» كومانداسى جەڭىپ الدى.
سەرىك قۇدايبەرگەنۇلى