استانا قالاسى ىشكى ىستەر دەپارتامەنتىنىڭ جەرگىلىكتى پوليتسيا قىزمەتى قازىرگى كۇندەرى جۇرتشىلىق اراسىندا «باقىتتى وتباسى – باقىتتى ەل» اقپاراتتىق اكتسياسىن وتكىزىپ جاتىر. ول ايەلدەردى زورلىق-زومبىلىقتان قورعاۋ جونىندەگى جۇمىستاردى ۇيىمداستىرۋ ماقساتىندا قولعا الىنعان.
بيىلعى جىلدىڭ ءۇشىنشى توقسانىنداعى ءىس-شارالار شەڭبەرىندە وتكىزىلىپ جاتقان اكتسيا 15 تامىز كۇنى باستالدى. ول بۇگىن ءوزىنىڭ مارەسىنە جەتەدى.
ءىس-شارانىڭ نەگىزگى ماقساتى – زورلىق-زومبىلىققا ۇشىراعان وتباسى مۇشەلەرىنە پسيحولوگيالىق, قۇقىقتىق كومەك كورسەتۋ, وتباسى قۇندىلىقتارىن ارتتىرۋ, زورلىق-زومبىلىق قۇرباندارىن وڭالتۋ باعىتىندا قىزمەت كورسەتۋ, بۇقارالىق اقپارات قۇرالدارىندا «سەنىم تەلەفوندارى» جانە داعدارىس ورتالىقتارى تۋرالى ماعلۇمات بەرۋ, حالىق اراسىندا قۇقىقتىق ءتۇسىندىرۋ جۇمىسىن وتكىزۋ, تۇرمىستىق قىلمىستار مەن قۇقىق بۇزۋشىلىقتاردىڭ الدىن الۋ.
شارا بارىسىندا 15 تامىز كۇنى «Keruen Sity» ساۋدا ويىن-ساۋىق ورتالىعىندا اقپاراتتىق ءىس-شارا وتكىزىلدى. ول 100-گە تاياۋ ادامدى قامتىدى. وندا كەلۋشىلەر سۇراقتارىنا جاۋاپ بەرىلدى. سونداي-اق بارلىق كەلۋشىلەرگە اقپاراتتىق كىتاپشالار مەن بۋكلەتتەر تاراتىلىپ, اكتسيانىڭ سىيلىعى رەتىندە تۇرعىندارعا بەيسبولكالار تابىس ەتىلدى.
