ەلوردالىق «بارىس» كلۋبى قۇرلىقتىق حوككەي ليگاسى اياسىندا رەسەيدىڭ ماگنيتورسك قالاسىنان كەلگەن «مەتاللۋرگ» كومانداسىن قابىلدادى. ماتچ ايدىن يەلەرىنىڭ باسىمدىعىمەن اياقتالدى.
ەدۋارد زانكوۆەتس, «بارىس» كومانداسىنىڭ باس باپكەرى:
– بۇگىن ساتتىلىك ءبىزدىڭ جاعىمىزدا ەكەنىن ءبىرىنشى تايمدا-اق اڭعارتتى. كوپ جەردە ءبىزدىڭ جولىمىز بولىپ كەتكەنىمەن, نەگىزىندە ءبىز بۇل ماتچقا تاس-ءتۇيىن دايىن
بولدىق. ارينە, قارسىلاس وڭاي شاعىلاتىن جاڭعاق ەمەس. ەكىنشى جانە ءۇشىنشى اينالىمداردا جىگىتتەرگە قيىنعا سوققانىن بىلەمىن. قاقپاشى بىرنەشە قاۋىپتى ساتتەردە سالقىنقاندىلىق تانىتا ءبىلدى. بارشاڭىزدى بۇگىنگى جەڭىسپەن قۇتتىقتاعىم كەلەدى.
«بارىستىڭ» جىگىتتەرىن ايدىنعا برەندون بوچەنسكيدىڭ ورنىنا نايدجەل دوۋس باستاپ شىقتى. ول ناعىز كوشباسشى ەكەنىن العاشقى اينالىمدا-اق دالەلدەپ تاستادى. ويىن باستالىسىمەن ءبىر مينۋتقا جەتپەي ەسەپتى اشقان دوۋس ءا دەگەننەن حەت-تريك اۆتورى اتاندى. بۇل – ونىڭ قحل-داعى سەگىزىنشى حەت-تريگى جانە جاڭا رەكورد. ونىڭ ارتىنان كەلە جاتقان, جەتى حيت-تريك جاساعان حوككەيشى سەرگەي موزياكين «مەتاللۋرگتىڭ» نامىسىن قورعايدى. سوندىقتان بۇل ماتچتا ەكەۋىندە دە رەكورد جاڭارتۋعا مۇمكىندىك بولدى. ال ءبىرىنشى اينالىمداعى تاعى ءبىر شايبانى نيكيتا يۆانوۆ سالدى.
ال ەكىنشى اينالىمدا بەسكە ءۇش ويىنشىمەن قارسى ويناعان «بارىسقا» گاگارين كۋبوگىنىڭ قازىرگى يەگەرلەرى ەكى گول سالىپ ۇلگەردى.
ءۇشىنشى اينالىمدا ەسەپ تاعى ءبىر گولعا قىسقاردى. جوعارىدا ايتقان موزياكين اقىرى ءبىر گولىمەن ەرەكشەلەندى. ەسەپ 4:3-كە جەتتى. جەڭىستىڭ تايىپ بارا جاتقانان سەزگەن «بارىستىڭ» جىگىتتەرى بەسىنشى شايباسىن سالىپ, العا ايقىن باسىمدىقپەن شىقتى.
ەندى استانالىقتاردىڭ كەلەسى قارسىلاسى – ومسكتىك «اۆانگارد». كەزدەسۋ 28 جەلتوقسان كۇنى «بارىس ارەنادا» وتەدى.
ورىنبەك وتەمۇرات
