ورتالىق كوممۋنيكاتسيالار قىزمەتىنىڭ الاڭىندا «استانا قالاسى ءبىلىم سالاسىنىڭ دامۋى, ناتيجەلەرى مەن پەرسپەكتيۆالارى» تۋرالى استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ بريفينگ وتكىزدى. ديالوگ الاڭىندا ءبىلىم سالاسىنىڭ وزەكتى تاقىرىپتارى ءسوز بولدى. باس قالادا ءبىلىم سالاسىنداعى سەرپىندى جوبالار جۇزەگە اسىپ جاتىر. مەملەكەت باسشىسىنىڭ تاپسىرماسىن ورىنداۋ ءۇشىن ەلوردادا ءبىرشاما جۇمىس اتقارىلدى.
قانشا ءبىلىم بەرۋ ۇيىمى بار؟
استانادا قازىرگى تاڭدا 365544 بالانى قامتىپ وتىرعان 757 ءبىلىم بەرۋ ۇيىمى جۇمىس ىستەيدى. ونىڭ ىشىندە 525 بالاباقشا, 172 مەكتەپ, 32 كوللەدج, 11 قوسىمشا ءبىلىم بەرۋ ۇيىمى جانە 15 ارنايى ءبىلىم بەرۋ ۇيىمى بار. وتكەن جىلى ءبىلىم بەرۋ ۇيىمدارى 102-گە ارتقان.
استانا قالاسىندا 2023 جىلى 11 مەكتەپ ىسكە قوسىلىپ, جاڭا مەكتەپتەر قالاداعى 3 مەكتەپتە ءۇش اۋىسىممەن وقۋ ماسەلەسى شەشىلدى. وقۋ جىلىنىڭ اياعىنا دەيىن تاعى دا 4 مەكتەپتى ىسكە قوسۋ جوسپارلانعان.
ەرەكشە بالالارعا – ەرەكشە كوزقاراس
ەرەكشە بالالار دا قوعامدا وزدەرىن ەركىن سەزىنۋى قاجەت. سوندىقتان بۇگىندە ەلوردادا ايرىقشا كۇتىمگە مۇقتاج بالالارعا قولايلى ورتا قالىپتاستىرىپ, ءبىلىم بەرۋدىڭ ماڭىزى زور.
ەلوردادا ەرەكشە ءبىلىم بەرۋدى قاجەت ەتەتىن بالالارعا مەملەكەتتىك قىزمەت كورسەتۋ شەڭبەرى كەڭەيەتىن بولادى. بۇگىندە 470 مىڭعا جۋىق بالاعا 8 پسيحولوگيالىق-مەديتسينالىق-پەداگوگيكالىق كونسۋلتاتسيا جۇمىس جاساۋدا. بۇل جۇمىس الداعى ۋاقىتتا جالعاسىن تابادى.
قاۋىپسىزدىك – باستى نازاردا
بالالاردىڭ قاۋىپسىزدىگىن قامتاماسىز ەتۋ ماسەلەسى – مەملەكەتتىڭ اسا ماڭىزدى مىندەتىنىڭ ءبىرى. وسى ماقساتتا استانا قالاسى ءبىلىم باسقارماسى تاراپىنان كەشەندى جۇمىس جۇرگىزىلۋدە. بۇگىنگى تاڭدا ەلوردادا بارلىق ءبىلىم بەرۋ ۇيىمى تسيفرلى بەينەباقىلاۋمەن قامتاماسىز ەتىلگەن. بارلىق كامەرا مەن دابىل تۇيمەسى پوليتسيا دەپارتامەنتىنىڭ جەدەل باسقارۋ ورتالىعىنا قوسىلعان. ورناتىلعان كامەرالار بارلىق تالاپقا سايكەس كەلەدى. استانا قالاسىندا بالالاردىڭ قاۋىپسىزدىگىن ساقتاۋ ماقساتىندا بارلىق ءبىلىم بەرۋ ۇيىمى تولىعىمەن تسيفرلى بەينەباقىلاۋ كامەرالارىمەن, تۋرنيكەتتەرمەن, دابىل تۇيمەلەرىمەن جانە جوعارى جىلدامدىقتاعى ينتەرنەت جەلىسىمەن قامتاماسىز ەتىلگەن. مەكتەپ قاۋىپسىزدىگىن قامتاماسىز ەتۋ باعىتىندا جۇيەلى شارالار قابىلداۋ جالعاسادى.
بالاباقشامەن قامتۋ جايى قالاي؟
بالالاردى مەكتەپكە دەيىنگى تاربيەمەن جانە وقىتۋمەن قامتۋدى ۇلعايتۋ ماقساتىندا 2023 جىلى 10214 ورىنعا مەملەكەتتىك تاپسىرىس ورنالاستىرىلىپ, اعىمداعى جىلى تاعى 10000-نان اسا ورىنعا مەملەكەتتىك تاپسىرىس ورنالاستىرىلماق. سونىمەن قاتار بالاباقشالارداعى ورىن تاپشىلىعىن جويۋ ماقساتىندا 60 بالاباقشا سالۋ جوسپارلانۋدا. بۇگىندە 10 بالاباقشانىڭ جەر تەلىمى بەلگىلەنىپ, جوبالاۋ جۇمىسى باستالعان. 2024 جىلى 4 شاعىن ورتالىقتا ينكليۋزيانى قولداۋ كابينەتى اشىلادى.
كادر تاپشىلىعى بولمايدى
سۇرانىسقا يە كادرلاردى دايارلاۋ ماقساتىندا ماماندارعا قاجەتتىلىكتىڭ وڭىرلىك كارتاسى – جاڭا كاسىپتەر اتلاسى ازىرلەنگەن. 2025 جىلعا قاراي جاستاردىڭ 100 پايىزى تەگىن تەحنيكالىق جانە كاسىپتىك بىلىممەن قامتاماسىز ەتىلەدى. سونداي-اق باسقا ايماقتاردان كەلگەن ستۋدەنتتەردى جاتاقحانامەن قامتاماسىز ەتۋ ماقساتىندا 1000 ورىندىق «ستۋدەنتتەر ءۇيى» سالىنادى.
قاسىمحان سەنعازىەۆتىڭ ايتۋىنشا, جىل سايىن مەكتەپ وقۋشىلارى سانىنىڭ وسۋىنە بايلانىستى 2026-2027 وقۋ جىلىنا قاراي استانادا 5 مىڭ مۇعالىمگە قاجەتتىلىك تۋىندايدى. مەملەكەت باسشىسىنىڭ ەلوردادا پەداگوگيكالىق جوعارى وقۋ ورنىن اشۋ تۋرالى تاپسىرىسىن ورىنداۋ ماقساتىندا مەملەكەتتىك-جەكەشەلىك ارىپتەستىك جوباسى اياسىندا پەداگوگيكالىق كوللەدجدى پەداگوگيكالىق ۋنيۆەرسيتەتكە ترانسفورماتسيالاۋ جۇمىسى باستالعان. وسى ماقساتتا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ بازاسىندا اباي اتىنداعى قازۇپۋ فيليالى اشىلادى.
ءبىلىم باسقارماسى باسشىسىنىڭ ايتۋىنشا, بيىل ەلوردادا 6 مىڭنان استام مۇعالىم بىلىكتىلىگىن ارتتىرۋ كۋرسىنان وتەدى. 2023 جىلى مەملەكەتتىك ءبىلىم بەرۋ ۇيىمدارىنىڭ باسشىلارى مەن پەداگوگ قىزمەتكەرلەرىن قىزمەتكە تاعايىنداۋ جانە قىزمەتتەن بوساتۋ قاعيدالارىنا وزگەرىس ەنگىزىلگەن. وزگەرىسكە سايكەس, ءبىلىم بەرۋ سالاسىنداعى كوشباسشىلاردى ىرىكتەۋ جانە دايارلاۋ جونىندەگى نورما ەنگىزىلدى. بۇگىنگى تاڭدا ءبىلىم ءمينيسترىنىڭ بۇيرىعىمەن رەسپۋبليكالىق كادر رەزەرۆىنە ەنگىزىلگەن كانديداتتاردىڭ ءتىزىمى بەكىتىلىپ, استانا قالاسى بويىنشا وسى كادرلىق رەزەرۆكە 18 ادام كىرگەن.
ءبىلىم باسقارماسى اعىمداعى جىلى ءبىلىم ساپاسىن ارتتىرۋ بويىنشا جۇمىس جۇيەسىن جەتىلدىرۋگە ناقتى قادام جاسادى. ءبىلىم باسقارماسىنىڭ مالىمەتىنشە, قالادا قازىرگى ءبىلىم ساپاسى – 59,7 پايىز. الداعى ۋاقىتتا ءبىلىم ساپاسىن ارتتىرۋعا باعىتتالعان بىرنەشە جوبانى جۇزەگە اسىرۋ, ينفراسترۋكتۋرانى دامىتۋ جۇمىسى جوسپارلانعان. قازىرگى تاڭدا ەلوردا مەكتەپتەرى ەلەكتروندى وقۋلىقتارمەن 100 پايىز قامتاماسىز ەتىلگەن.
