23-24 قاڭتار كۇندەرى «استانا وپەرا» تەاترى ۇلتتىق كلاسسيكا قازىناسى – مۇقان تولەباەۆتىڭ «ءبىرجان-سارا» وپەراسىن (ليبرەتتو اۆتورى – قاجىم جۇماليەۆ) جاڭا مۋزىكالىق-ساحنالىق رەداكتسيادا ۇسىنادى. قويۋشى رەجيسسەرى – اسحات ماەميروۆ, رەجيسسەر كەڭەسشىسى – ميحايل پاندجاۆيدزە جانە قويۋشى ديريجەر – ابزال مۇحيتدين.
قويىلىمدا كەيىپكەرلەردىڭ بەينەسى جاڭاشا قۇرىلىپ, قازاق كلاسسيكاسى باسقا قىرىنان بەرىلەدى. سپەكتاكلدە تەاتردىڭ جاس ارتىستەرىنىڭ دەبيۋتى بولادى. ءبىرجان پارتياسىن قازاقستاننىڭ ەڭبەك سىڭىرگەن قايراتكەرى مەيىر باينەش پەن بەيىمبەت تاڭارىقوۆ ورىندايدى, ال سارانىڭ ءرولىن قازاقستاننىڭ ەڭبەك سىڭىرگەن قايراتكەرلەرى بيبىگۇل جانۇزاق پەن ايگۇل نيازوۆا سومدايدى. دەبيۋتتەردى اتاپ وتسەك, ۇلپان اۋباكىروۆا التىناي بەينەسىندە العاش شىعادى. «دارىن» مەملەكەتتىك جاستار سىيلىعىنىڭ لاۋرەاتى التىنبەك ءابىلدا (جيەنقۇل), ۆالەري سەليۆانوۆ (قوجاعۇل), مەرەي قادىرحانوۆ (سەرىك) وسى وپەراداعى پارتيالاردى تۇڭعىش ورىندايدى. قويىلىمدا 3D-تەحنولوگيا, يتاليالىق مامان سەردجيو مەتالليدىڭ بەينەپروەكتسيالارى قولدانىلادى.
مۇقان تولەباەۆتىڭ «ءبىرجان-سارا» وپەراسىنىڭ شىققانىنا ەكى جىلدان كەيىن 80 جىل تولادى. «استانا وپەرا» تەاترى 2013 جىلى ۇلتتىق كلاسسيكانىڭ التىن قورىنداعى ءدال وسى سپەكتاكلمەن اشىلدى. بىرنەشە جىل سپەكتاكل رەسەيدىڭ حالىق ءارتىسى, قازاقستاننىڭ مەملەكەتتىك سىيلىعىنىڭ لاۋرەاتى يۋري الەكساندروۆتىڭ قويىلىمىندا ءجۇردى. 2014 جىلى سانكت-پەتەربۋرگ قالاسىنداعى اتاقتى ماريا تەاترىنىڭ ساحناسىندا ۇسىنىلدى.
