ەكى exit poll-دىڭ قورىتىندىسى جاريا بولعاننان كەيىن ق.توقاەۆتىڭ قارسىلاستارى ونى جەڭىسىمەن قۇتتىقتادى. ولاردىڭ بارلىعى سايلاۋدىڭ اشىق, ءادىل وتكەنىن, بيلىك تاراپىنان ەشقانداي كەدەرگىلەر بولماعانىن مالىمدەدى. پرەزيدەنتتىڭ باستى قارسىلاسى بولعان ءامىرجان قوسانوۆ جاڭا مەملەكەت باسشىسىنىڭ بالامالى پىكىرگە قۇرمەتپەن قاراپ, قوعاممەن ديالوگ جۇرگىزۋگە دايىن ەكەنىن ايتتى.
«مەنىڭ بۇل سايلاۋدا 16,2 پايىز داۋىس جيناعانىم – بۇل ۇلكەن ساياسي جانە پسيحولوگيالىق جەڭىسىم. بۇل – 1,5 ملن-عا جۋىق ادام. وسى كورسەتكىش پارلامەنتكە وتەتىن پارتيانىڭ دەڭگەيىنەن ەكى ەسەگە ارتىق. سوندىقتان بۇل مۇمكىندىكتى پايدالانامىن» دەپ مالىمدەدى ول ءباسپاسوز جيىنىندا.
ءامىرجان قوسانوۆ سونداي-اق ءوزىنىڭ سايلاۋدا جەڭىپ العان داۋىستارى ءۇشىن زاڭدى جولمەن كۇرەسەتىنىن جەتكىزدى. «مەن قاسىم-جومارت توقاەۆتىڭ جەڭىسىن مويىندادىم. بۇعان ەلدىڭ كوزقاراسى قانداي بولاتىنىن سەزەمىن. نەلىكتەن مۇنداي قادامعا باردىم؟ ويتكەنى پارلامەنت سايلاۋى وتەتىن كۇن جاقىن. مەن قاراپايىم حالىقتىڭ قولداۋىن 16,2 پايىزعا دەيىن جەتكىزدىم. بۇدان ءارى بيلىك مەنەن كەيىن سايلاۋعا تۇسەتىن وپپوزيتسيانىڭ ۇمىتكەرى نەمەسە پارتيا كورسەتكىشىن 6-9 پايىزعا دەيىن تومەندەتە المايدى» دەپ ءتۇسىندىردى ءوز ويىن ۇمىتكەر. تىلشىلەردىڭ پارتيا قۇراسىز با دەگەن ساۋالىنا: «ەگەر جوق دەپ ايتسام, وتىرىك بولار, بىراق ول ماسەلە كوپتەگەن جاعدايلارعا, سونىڭ ىشىندە بيلىكتىڭ سول پارتيا قۇرىلادى دەگەن كوزقاراسىنا بايلانىستى بولماق» دەپ جاۋاپ بەردى.
