كونستيتۋتسيا كۇنى قارساڭىندا ۇلى وتان سوعىسىنىڭ مۇگەدەكتەرىنە ارنالعان ورتالىق كلينيكالىق گوسپيتالدە قازاق حالقىنىڭ داڭقتى باتىرى – راقىمجان قوشقارباەۆتىڭ تۋعانىنا 90 جىل تولۋىنا ارنالعان عىلىمي-پراكتيكالىق كونفەرەنتسيا ءوتتى. مەكەمە ديرەكتورى ءادىلحان ءابدۋليننىڭ جەتەكشىلىگىمەن ۇيىمداستىرىلعان شاراعا رەسەيدىڭ قازاقستانداعى توتەنشە جانە وكىلەتتى ەلشىسى م.بوچارنيكوۆ, پارلامەنت ءماجىلىسىنىڭ دەپۋتاتى ن.پەتۋحوۆا جانە ءبىر توپ عالىم قاتىستى.
جيىن راقىمجان قوشقارباەۆ پەن گريگوري بۋلاتوۆتىڭ رەيحستاگ عيماراتىنا تىككەن جەڭىس تۋى سالتاناتتى جاعدايدا اكەلىنىپ, ەرلىككە تاعزىم ەتۋدەن باستالدى.
مەملەكەت تاريحى ينستيتۋتىنىڭ جەتەكشى عىلىمي قىزمەتكەرى سەيىتقالي دۇيسەن «راقىمجان قوشقارباەۆتىڭ ءومىرى مەن جاۋىنگەرلىك ەرلىگى» تۋرالى بايانداما وقىسا, ل.گۋميلەۆ اتىنداعى ەۇۋ دوكتورانتى ماحاببات قوزىباەۆا گريگوري بۋلاتوۆ جونىندە تىڭ دەرەكتەرمەن ءبولىستى. ءوز كەزەگىندە ءسوز العان الپينيستەر وداعىنىڭ ۆيتسە-پرەزيدەنتى سەرىكقالي مۇقانوۆ «جەڭىس تۋىنىڭ جاۋىنگەرلىك جولى: «رەيحستاگ-ماسكەۋ-استانا» تاقىرىبىندا بايانداما جاسادى. ال, بەرلين سوعىسىنىڭ ءتىرى كۋاگەرلەرى قادان بەكەنوۆ, مويسەي گولدبەرگ جانە ءىلياس ەكىباەۆ سۇم سوعىستا كورگەن قيىنشىلىقتارىن ايتا كەلە, جاستاردى وتاندى سۇيۋگە شاقىردى.
گۇلميرا شارحانقىزى
