بەيبىتشىلىك پەن كەلىسىم – ەڭ قاستەرلى قازىنا
ەلباسى قازاقستان حالقى اسسامبلەياسىنىڭ رەسپۋبليكالىق فەستيۆالىنە قاتىستى, دەپ حابارلادى پرەزيدەنتتىڭ ءباسپاسوز قىزمەتى.
نۇرسۇلتان نازارباەۆ ءىس-شاراعا قاتىسۋشىلارعا ارناعان سوزىندە مەملەكەتتىڭ دامۋى مەن ءوسىپ-وركەندەۋى جولىندا قازاقستان حالقى اسسامبلەياسىنىڭ ايرىقشا ءرول اتقارىپ وتىرعانىن اتاپ ءوتتى.
– وسى جىلدارى اسسامبلەيا ۇلتى مەن ءدىنى ءارتۇرلى ادامداردى ءوزارا جاقىنداستىرا ءتۇستى, سان الۋان مادەنيەت پەن سالت-داستۇردەگى جاقسى نارسەنىڭ ءبارىن كورسەتىپ بەردى. بەيبىتشىلىك پەن كەلىسىم – تاۋەلسىزدىكتىڭ 25 جىلىنىڭ ەڭ قاستەرلى قازىناسى, – دەدى قازاقستان پرەزيدەنتى.
مەملەكەت باسشىسى قازىرگى الەمدە مەملەكەتتىڭ ەتنومادەني بىرلەستىكتەرگە قولداۋ ءبىلدىرۋى ەرەكشە تاجىريبە بولىپ وتىرعانىن ايتتى.
– بۇل – قازاقستانداعى ناقتى شىندىق. مەملەكەت بارلىق ەتنومادەني بىرلەستىكتەرگە تۇراقتى تۇردە جانە كەڭ اۋقىمدى قولداۋ كورسەتىپ, بالالاردى انا تىلىنە وقىتاتىن مەكتەپتەردى قارجىلاندىرىپ كەلەدى. گازەتتەرىمىز بەن جۋرنالدارىمىز ون بەس تىلدە شىعادى, تەاترلارىمىز جەتى تىلدە سويلەيدى, – دەدى ەلباسى.
فەستيۆال بارىسىندا نۇرسۇلتان نازارباەۆ كورەي, نەمىس جانە ۇيعىر ۇلتتىق تەاترلارىنا اكادەميالىق مارتەبە بەردى.
سوڭىندا مەملەكەت باسشىسى ءىس-شاراعا قاتىسۋشىلاردى قازاقستان تاۋەلسىزدىگىنىڭ 25 جىلدىعىمەن قۇتتىقتاپ, بارشاعا يگىلىك پەن باق-بەرەكە تىلەدى.