الداعى بەس جىلدا استانادا 197 شاقىرىم تاس جولداردى سالۋ جوسپارلانىپ وتىر. جول قۇرىلىسىنىڭ ىشىندەگى اسا ماڭىزدى جوبا – ەسىلدىڭ سول جاعالاۋىن, ەكسپو-قالاشىق جانە جاڭا تەمىرجول ۆوكزالى اۋداندارىن بايلانىستىراتىن ۇلى دالا كوشەسى.
بۇعان قوسا, كەنەسارى كوشەسىن كۇمىسبەكوۆ كوشەسىنەن باستاپ كىشى اينالما جولعا دەيىن, بەيسەكوۆ كوشەسىنە دەيىن, سەيفۋللين كوشەسىن پۋشكين كوشەسىنە دەيىن جانە اسانقايعى كوشەسىن تاشەنوۆ كوشەسىنەن باستاپ بوگەنباي باتىر داڭعىلىنا دەيىن ۇزارتۋ جوسپارلانعان. «وسى ماسەلەگە كەشەندى تۇردە قاراپ وتىرعانىمىزدى ەسكەرەتىن بولساق, مۇنداي جوسپار قالاداعى كولىكتەرگە قاتىستى احۋالدى تۇبەگەيلى وزگەرتەدى» دەيدى استانا قالاسى اكىمىنىڭ ءبىرىنشى ورىنباسارى سەرگەي حوروشۋن.
ول پرەزيدەنتتىك ساياباقتى جوندەۋگە قاتىستى اكىمدىكتىڭ جۇمىس جوسپارلارىمەن ءبولىستى. وسىدان 15 جىل بۇرىن سالىنعان ساياباقتىڭ اۋماعىندا قازىر بەلسەندى قۇرىلىس جۇرگىزىلۋدە. بۇل جۇمىستار سوڭعى ەكى-ءۇش جىلدا اياقتالادى. وسىنى ەسكەرە وتىرىپ, ساياباقتى تولىقتاي جوندەۋدەن وتكىزۋ جوباسى جاسالعان. بۇل – تاۋەلسىزدىك سارايى, «شابىت» مۋزىكالىق اكادەمياسىنىڭ اۋدانى. «ءبىز ءادىل, اشىق شەشىم قابىلداپ, جاڭا يدەيالارعا نازار اۋدارۋ ماقساتىندا بايقاۋ جاريالادىق. وتىنىشتەر 2018 جىلدىڭ سوڭىنا دەيىن قابىلدانادى. الدىن الا مالىمەتتەر بويىنشا, وسى بايقاۋعا 20-دان اسا فيرمالار ءوتىنىش بەرگەن. بايقاۋدىڭ قورىتىندىسى بويىنشا, ساياباق تۇجىرىمداماسىنىڭ جەڭىمپازىن انىقتايمىز. ودان كەيىن جوبالىق-سمەتالىق قۇجاتتار دايىندالادى. كەلەر جىلدان باستاپ ىسكە كىرىسەمىز» دەپ ءتۇسىندىردى سەرگەي حوروشۋن.
